Skoonste informele markte aangewys

Internasionale Handewasdag is Sondag onder die tema “Skoon hande is binne bereik” herdenk.Dié dag val ook in die gesondheids- en higiënemaand wat die Windhoekse munisipaliteit Donderdag gevier het met ’n geleentheid om die skoonste informele gemeenskapsmarkte in die hoofstad te vier.Die hoofstad se burgemeester, Joseph Uapingene, het tydens die geleentheid gesê dit is hoogtyd om bewustheid te skep oor die kritieke rol wat goeie gesondheid en volhoubare higiëniese praktyke in ons daaglikse lewens speel.“Ons gesondheid is ons waardevolste bate en die behoud daarvan behoort ons topprioriteit te wees,” het hy gesê.Uapingene sê om hande te was maak nie net hande skoon nie, dit verwyder ook skadelike bakterieë en bekamp virusse.“Die gesondheid van die individu moet erken word asook die gesamentlike verantwoordelikheid om higiëne in ons gemeenskappe te bevorder,” sê hy.Hy sê die nasionale demografiese opname van 2016 het getoon dat 46% van die bevolking steeds in die openbaar ontlas.“Die onhigiëniese omgewing wat ons soms in ons markte sien, tesame met onvoldoende infrastruktuur, kan ons handelaars se verkope ondermyn, en ook ernstige gesondheidsrisiko vir handelaars en hul kliënte inhou,” sê hy. ’n Kompetisie is in 2018 van stapel gestuur om informele handelaars aan te moedig om hul verkoopsruimte ten alle tye skoon te hou en om goeie higiëne ’n daaglikse praktyk te maak, brei hy uit.Die Soweto-mark is vanjaar as die skoonste groot informele mark aangewys, en die Limbandungila-mark in die noordelike nywerheidsgebied as die skoonste klein mark. Die Stokes-mark naby die Ou Kragstasie-kompleks is as die mark aangewys wat die meeste verbeter het. Kasukoo Uamunika, Rabbi Kayoo en Hileni Hamutenya bedryf die skoonste individuele stalletjies by die Soweto-mark. Ander wenners wat Donderdag vereer is, sluit in Tusneld Uusiku, Helvi Likondja, Livongani Mebby, Otilie Mutota, Pius Daniel en Albertina Amwaama. Helena Junias, Marthin Nakathingo Junias, Elise Nangolo, Marakia Shikomba Marakia, Toini Diinineni Kanime, Emgardt Tjizo, Reginalda Negumbo, Katrina Mbadi en Albertina Sheuyange is ook as wenners aangewys. Die Windhoekse munisipaliteit het 19 informele markte in en om die hoofstad gevestig en volgens die stad se woordvoerder, Lydia Amutenya, het elkeen van dié markte toiletgeriewe en waterkrane. In terme van toiletgeriewe vir die hoofstad se groeiende informele nedersettings, erken sy dat hulpbronne beperk is terwyl die nood gedurig toeneem.Data van 2011 het getoon dat 32% van die hoofstad se bevolking in nedersettings bly, terwyl dit tot 43% in 2016 toegeneem het en teen 2020 op 44% geskat is.Stad Windhoek (CoW) is tans besig om ’n vyfjaarplan tot Junie 2025 te implementeer, waar woonbuurte insluitend Tobias Hainyeko, Moses Garoeb, Samora Machel, Khomasdal, Windhoek Landelik, Katutura-Oos en die informele markte onder die vergrootglas geplaas word. Die doel is om die aantal huishoudings wat een toilet moet deel tot 20 te verminder, en om hierdie toilette binne 100 meter van die betrokke huise te plaas. Een waterkraan moet binne 200 meter van elke 40 huise opgerig word, volgens die plan. Die opeenhoping van huise in informele nedersettings is ’n groot uitdaging, wat vererger word deur vandalisme van die toilette en waterkrane. Teen Augustus was die helfte van alle munisipale toilette en krane beskadig en moet herstel word, volgens inligting wat Amutenya gedeel het. Betrokke gemeenskappe neem nie eienaarskap van die infrastruktuur nie, en mag dit ook beskadig om toegang tot gratis water te verkry, voeg sy by. Stad Windhoek benodig sowat N$50 miljoen om sy korttermynplan uit te kan voer, wat die munisipaliteit nie self kan bekostig nie, sê sy. – augetto@republikein.com.na

Skoonste informele markte aangewys

Kommentaar

Republikein 2025-05-01

Meld asseblief aan om kommentaar te lewer

Skoonste informele markte aangewys

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie