Sindikaat oopgevlek wat glo albino’s teiken

Twee mans het Dinsdag in die landdroshof in Katutura verskyn nadat hulle in hegtenis geneem is oor hulle na bewering deel was van ’n vermeende sindikaat wat die hare, geslagsorgane en naels van mense met albinisme aangekoop het om weer in die buiteland te verkoop.

Die voorval is as “skokkend” beskryf deur beide die polisie en die albino-gemeenskap, wat al vir dekades glo Namibië is ’n relatiewe veilige hawe vir mense met die toestand.

Mnre. Simasiku Fred Kaombo en Liwela Obrine is verlede Vrydag tydens ’n polisieklopjag in Windhoek in hegtenis geneem waarby polisiehoofinspekteur Christina van Dunem Dafonsech betrokke was.

Die mans het glo vir hul slagoffers gesê hulle verkoop “albino-hare” aan ’n man wat in Katima Mulilo woon en ’n ander persoon in Europa wat Namibië soms besoek om dié liggaamsdele op te tel.

Hulle is daarvan aangekla dat hulle die proklamasie vir die onderdrukking van heksery van 1933 oortree het, en die saak is tot 29 Junie uitgestel vir verdere polisieondersoek.

Kaombo en Obrine is borgtog geweier weens die erns van die saak en die openbare belang daarvan.

Mnr. Joseph Ndinomupya, president van die Namibië Albino-verenigingtrust (NAAT), en sy ondervoorsitter, mnr. Walde Kambabi, het Dinsdag se hofverrigtinge bygewoon om die beweerde dade te veroordeel.

Namibië het die meeste mense met albinisme per capita ter wêreld. Die land, met ’n bevolking van sowat 2,5 miljoen, het tussen 1 800 tot 2 000 mense met albinisme. Die vlakke van moord en marteling van mense met die toestand – wat in dele van Afrika voorkom – was tot dusver nie ’n probleem in Namibië nie.

DIE LOKVAL

Mnr. Simon Ndali* (skuilnaam) is die man wat die polisie gehelp het om die mense vas te trek wat diegene met albinisme in Namibië teiken.

Ndali, wat met die toestand saamleef, het in ’n telefoniese onderhoud aan ons susterkoerant Namibian Sun gesê hy het verlede jaar ’n vreemde oproep tydens die vakansie ontvang. Dié persoon het hom toe vir ’n ruk lank nie weer gekontak nie, so hy het nie veel daarvan gedink nie.

Toe, op 12 Maart, kry hy weer ’n oproep – dié keer van ’n ander nommer af.

Ndali het gesê die persoon het gevra waar hy woon, en hy het gelieg om meer te hoor.

Volgens hom het ’n man hom ingelig dat hy wil besigheid praat, maar nie oor die telefoon nie.

“My vrou werk in Windhoek en ons kinders is daar in die skool. So, ek het stad toe gegaan. Ek het vir hom gesê ek woon in Havana en hy het voorgestel ons ontmoet naby ’n sekere kleuterskool. Ek het ingestem. Ek het daar aangekom en onder ’n doringboom gewag,” onthou Ndali.

Hy vertel toe die man daar aankom, het hy dadelik begin besigheid praat en vir hom gesê hy benodig hare en liggaamsdele van mense met albinisme. Ndali het gesê die koper het hom verseker al wat hulle van hom wou hê, was sy hare vir N$1 miljoen per geskeerde kop, en dat hulle hom nie gaan doodmaak nie.

“Ek was dadelik geïrriteerd en kwaad. Maar ek het kalm gebly sodat ek meer kon hoor en agter die kap van die byl kon kom. Ek het gesê ek sal aan die skema deelneem om vinnig geld te maak. Ek het ingestem om my hare aan hom te verkoop.

“Die gesprek het geëindig ná hy gesê het hy sal sy sakevennote kontak en hulle sal my laat weet wanneer die hare afgelaai moet word,” het hy gesê.

Ndali het gesê nadat die beskuldigdes weg is, het hy geskok en in ongeloof vir Kambabi gebel en hom vertel wat gebeur het.

Dafonsech is van die voorval ingelig en het belowe om die voorval te ondersoek.

VREEMDE REëLS

“Ek het my toneelspel op 14 Maart voortgesit. Toe die kopers my weer kontak, het ek vir hulle gesê ek het ’n suster met dieselfde toestand as myne en haar vriendin wat ook graag hul hare wil verkoop,” het Ndali gesê.

“Hy was opgewonde en het vir my gesê om my suster se hare sowel as dié van haar vriendin af te sny.”

Maar eers was daar reëls om te volg vir die “items” om te werk.

“Hy het vir my gesê my suster en haar vriendin mag nie seksuele omgang met enige man hê die aand voordat ek hul hare afsny nie. Daar is van my verwag om dieselfde te doen. Hy het gesê ons moet ook nie vleis met sout eet nie, en ons moet ons koppe bedek wanneer ons slaap,” het hy gesê.

In ’n opname van hul beweerde gesprek, waarna Namibian Sun geluister het, kan gehoor word hoe een van die beskuldigdes sê die kopers is van Europa en betaal van N$1 miljoen tot N$5 miljoen per geskeerde kop.

KLOPJAG

Ndali het die “aflewering” op 16 Maart gemaak. Hy het blonde vlegsels wat in stukke gesny is in ’n koevert by hom gehad, wat hy by Dafonsech ontvang het.

Die polisie het die transaksie op ’n afstand dopgehou. Hy was ook in verbinding met Dafonsech sodat die polisie die gesprek maklik kon volg.

Die kopers het toe vir Ndali gesê hy moet saam met hulle na Katima Mulilo ry sodat hy daar persoonlik betaal kan word. Hy het geweier.

“Die polisie het ons genader en gevra wat ons onder die boom doen. Die verdagtes het vir die polisie gesê hulle is profete en dat hulle vir my bid. Alles het so vinnig gebeur. Ons is almal in hegtenis geneem so ek het net so skuldig soos die ander gelyk. Ek is eers later by die polisiekantoor vrygelaat,” het Ndali gesê.

“Sedert daardie voorval is ek bang om alleen uit te gaan. Ek het nooit gedink ek sou in só ’n Namibië woon nie.”– [email protected]