Sankwasa vra vir oudits

Die minister van stedelike en landelike ontwikkeling, Sankwasa James Sankwasa, sê die finansiële rekords van tradisionale owerhede gaan geoudit word. Dit volg op kommer oor onverklaarde onttrekkings uit rekeninge wat geld bevat wat deur middel van die staat se visvangkwotas gegenereer is.Tydens die 27ste jaarvergadering van die Raad van Tradisionele Leiers Maandag op Otjiwarongo, het Sankwasa gesê amptenare van sy ministerie en die ministerie van finansies sal ondersoek instel na wie die geld onttrek het, hoe dit bestee is en of die uitgawes gemagtig was.“Noudat julle ingelig is: Ouditeure van my ministerie en die ministerie van finansies sal kom om julle boeke te oudit,” het Sankwasa gesê.Hy wou weet wat het met die geld gebeur wat in die tradisionele owerhede se rekeninge inbetaal is. Volgens die minister is onttrekkings soms gemaak sonder duidelike verduidelikings oor watter dienste met die geld gefinansier moes word.“Dis nie persoonlike geld nie; dis staatsgeld, dis gemeenskapsgeld,” het Sankwasa gesê, terwyl hy tradisionele leiers gewaarsku het om nie die fondse as hul eie te beskou nie.Hy het gesê die geld behoort gemeenskappe te bevoordeel deur projekte soos kragaansluitings vir huishoudings, tuinbou-inisiatiewe en bystand aan siek mense wat hospitaalsorg benodig. Hy het gewaarsku diegene wat die fondse misbruik, kan vervolg word.Die reëling vir visvangkwotas behels die Oonani Investments Group – die beleggingstak verbonde aan die Namibië Tradisionele Owerhede Trust (NTAT), wat erkende tradisionele owerhede verteenwoordig.Die kwessie van inkomste uit kwotas het voorheen reeds tot geskille tussen tradisionele leiers gelei. In 2021 het Republikein berig oor meningsverskille oor ongeveer N$24 miljoen wat gegenereer is uit die verkoop van ’n kwota van 8 000 ton maasbanker deur Hompa Investments, destyds die beleggingsmaatskappy van NTAT. Sommige leiers het vrae geopper oor die bestuur en deursigtigheid van die inkomste, terwyl ’n direkteur van die maatskappy hul kritiek betwis het.KOMMUNALE GRONDSankwasa het ook sommige tradisionele owerhede daarvan beskuldig dat hulle kommunale grond verkoop. Hy het gesê hy het inligting ontvang dat grond vir tussen N$50 000 en N$60 000 per hektaar verkoop word. “Voor onafhanklikwording het geen hoofman grond verkoop nie. Geen distrikshoofman of -hoofvrou het enige stuk grond in Suidwes-Afrika verkoop nie. Waarom nou?” het hy gevra. Sankwasa het gesê kommunale grond bly staatseiendom en tradisionele owerhede is eerder bewaarders as eienaars wat daarop geregtig is om die grond te verkoop.“Julle weet watter riglyne gegee is: Dat julle slegs administratiewe fooie mag hef van diegene wat om grond aansoek doen en administratiewe fooie vir die hantering van aansoeke,” het hy gesê. Volgens die minister is daar egter sommige owerhede wat die wet verontagsaam.Sankwasa het gevra wie die pryse bepaal wat in kommunale gebiede gevra word en dit vergelyk met grondpryse in stedelike gebiede, wat volgens hom deur die regering bepaal word.Hy het ook gewaarsku tradisionele leiers loop die risiko om die respek van hul gemeenskappe te verloor indien daar bevind word dat hulle die wette oortree wat hulle veronderstel is om te handhaaf.“As hoofmanne nie die wette respekteer nie, wie verwag julle dan moet julle respekteer?” het hy gevra. – phillipus@nmh-hub.com.na

Sankwasa vra vir oudits

Kommentaar

Republikein 2026-10-21

Meld asseblief aan om kommentaar te lewer

Sankwasa vra vir oudits

Kommentaar

Republikein 2026-10-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.