Outjo is keelvol

Inwoners van Outjo is besig om massa-optrede te beplan om hulle vir die onmiddellike afdanking van dié munisipaliteit te uitvoerende hoof, Josef Urib, te beywer, asook vir behoorlike dienslewering.Dit volg ná ’n plofbare gemeenskapsvergadering die afgelope Donderdag waartydens tweederdes van die teenwoordiges uitgeloop het nadat Urib glo beweer het die meeste stellings wat teen hom gemaak word, polities gedrewe is. Deon Verster, ’n Outjo-inwoner, sê hy raam daar was tussen 160 en 180 mense by die vergadering – mense van alle gebiede en kulture was teenwoordig.“Inwoners kla oor jarelange probleme met onder meer daaglikse wateronderbrekings, vullis wat vir maande lank nie in informele nedersettings en elders verwyder word nie, ’n ongeorganiseerde finansiële departement, ’n onvoltooide water- en rioolprojek asook ’n ernstige tekort aan gedienste erwe,” het hy verduidelik. Urib het Donderdag glo 40 minute laat vir die vergadering opgedaag wat hy self geskeduleer het, terwyl die gemeenskap die dorpsraadslede wat teenwoordig was glo moes vra om hul selfone neer te sit en belangstelling in die vergadering te toon – ’n versoek wat na bewering blatant deur een raadslid geïgnoreer is.“Gemeenskapslede was woedend toe Urib geen agenda van die vorige vergadering beskikbaar gehad het nie, daar nie ’n verslag van uitgawes van die vorige boekjaar beskikbaar was nie en dit blyk asof min pogings oor die afgelope jaar aangewend is vir skuldinvordering.“Daarbenewens word rekeninge nie opgedateer nie en gebreekte watermeters nie herstel nie. Inwoners het ook nie saamgestem met die vullisverwyderingskedule wat voorgelê is nie,” het Verster gesê en bygevoeg dat hulle boonop gesukkel het om te hoor weens ’n mikrofoon wat foutief nie. CHAOSDit het daartoe gelei dat ’n gemeenskapslid glo aan Urib gevra het of hy dink Outjo-inwoners is “simpel bobbejane” om dit alles te glo, want die hope vullis – wat menslike ontlasting insluit – groei op ’n daaglikse basis in Etoshapoort en informele nedersettings.Verskeie inwoners het toe glo beweer dat Urib, onder meer onbevoeg is en het versoek dat hy sy pos onmiddellik verlaat – iets wat glo luide applous ontlok het. Koos Mazenge, ’n gemeenskapsleier het aan Republikein gesê die vergadering was “chaoties”, met die dorpsraad wat nie hul vrae kon beantwoord nie. Hy sê terwyl gemeenskapsvergaderings drie maal per jaar moet plaasvind, is dié een slegs geskeduleer ná die gemeenskap daarop aangedring het. “Ons grootste probleem is ’n gebrek aan dienslewering – daar is probleme met die verskaffing van water, die riool en vullisverwydering, terwyl die dorp nog steeds – 33 jaar ná onafhanklikwording – met ’n emmerstelsel sit,” het Mazenge gesê.Hy sê vir die gemeenskap is een van die belangrikste kwessies dat die uitvoerende hoof nou die tuig sal neerlê. Hulle is egter nie tevrede met die persoon wat sy opvolger sal wees nie. URIB SêUrib het verlede Vrydag aan Republikein gesê terwyl hy toegee dat dit inwoners se reg is om hul menings by die afgelope gemeenskapsvergadering te lug, is hy baie ontevrede daarmee dat hy en lede van die dorpsraad met so min respek behandel is. “Ek is ook nie van voorneme om langer as die dorp se uitvoerende hoof aan te bly nie,” het Urib gesê oor beweringe dat hy weier om af te tree. “Ek sal nie my kontrak weer hernu nie en is reeds vir 23 jaar lank die dorp se uitvoerende hoof.” Hy sê hy is nie meer die uitvoerende hoof omdat hy daar wíl wees nie, maar omdat die dorpsraad hom versoek het om ná sy aftrede verlede jaar Desember, langer aan te bly totdat sy plaasvervanger aangestel kan word. Hy het ’n brief getoon wat hy in Julie 2022 aan die dorpsraad geskryf het om hulle in kennis te stel dat hy beplan om af te tree. Urib erken dat die munisipaliteit bewus is daarvan dat hulle tekort skiet as dit by diensverskaffing kom. “Ons sit nie en doen niks nie – ons doen ons beste om die situasie te beredder.“Die gemeenskap moet egter daarvan kennis neem dat hulle ’n klein dorp soos Outjo N$38 miljoen skuld. Dit belemmer ons kontantvloei en vermoë om dienste te lewer.”Hy voeg by dat, as dit by vullisverwydering kom, sukkel die munisipaliteit met ou lorries, waarvan net sommige in ’n werkende toestand is. – elvira@republikein.com.na

Outjo is keelvol

Kommentaar

Republikein 2026-02-03

Meld asseblief aan om kommentaar te lewer

Outjo is keelvol

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.