Ouma, kleinkind van verdrinking gered

Die vinnige optrede van twee lede van die publiek het die lewe van ‘n driejarige meisie en haar ouma van verdrinking gered wat deur ‘n brander naby die Platz am Meer-inkoopsentrum in Swakopmund oorval is.

Die meisie het saam met haar ouma en ‘n bejaarde vriendin op die strand, net suid van die waterfront, gestap toe die voorval gebeur het.

Die meisie het in die vlakwater gestap, toe ‘n reusebrander haar die see ingetrek het. Haar ouma het haar gegryp en is saam met haar kleinkind verder die see ingetrek.

‘n Vrou wat dit sien gebeur het, het tot hul redding gekom en kon daarin slaag om albei tot op die strand te bring.

Lede van die Namibian Marshall Rangers was in die omgewing en het dadelik hulp verleen.

Volgens Sean Naude was ‘n man wat ook in die omgewing was, met hul aankoms besig om mond-tot-mond-asemhaling op die meisie toe te pas wat in hierdie stadium nie asem gehaal het nie.

Ouma en kleinkind is onmiddellik na ‘n hospitaal op die dorp vervoer waar hulle tans herstel.

“Danksy dié lede van die publiek wat gehelp het, leef die ouma en haar kleinkind,” het Naudé gesê. – [email protected]