Ondersoek Lüderitz-raad, vra bekommerde groep

’n Klagskrif waarin ’n forensiese en grondoudit van die finansiële en eiendomsbestuur van die Lüderitz-dorpsraad gevra word, het reeds meer as 1 500 handtekeninge gewerf sedert dit verlede week die ronde begin doen het.’n Lid van ’n groep bekommerde inwoners wat die klagskrif begin het, Dirkie Stevens, het dit bevestig. Die klagskrif wat aan die minister van stedelike en landelike ontwikkeling, James Sankwasa, en lede van die dorp se bestuurkomitee, gerig is, vra vir ’n onmiddellike forensiese oudit van die raad se finansiële bestuur vir die tydperk 2014 tot 2024. “Ons doen ’n beroep op die minister om sy statutêre mag ingevolge die wet op plaaslike owerhede te gebruik en dadelik op te tree. “Die mense van Lüderitz verdien deursigtige bestuur, regverdige grondpraktyke en verantwoordbaarheid in die gebruik van openbare fondse. “Inwoners het ernstige ekonomiese terugslae weens finansiële wanbestuur, korrupsie en gebrek aan deursigtigheid binne hul plaaslike regering verduurDringende en beslissende ingryping is nodig om goeie regering en openbare vertroue te herstel,” lui die klagskrif. KOMMERDie groep beswaardes sê hulle is erg bekommerd oor wat hulle beskryf as die toenemende beriggewing van beweerde sistemiese finansiële wanbestuur, ongemagtigde grondtransaksies asook die wanbesteding van die opbrengste van visvangkwotas wat vir openbare ontwikkeling bedoel is. Ten spyte van verskeie mosies wat deur sittende raadslede ingedien is om die groeiende kommer oor beweerde wanbestuur en korrupsie te takel, is geen betekenisvolle stappe gedoen om die mosies te implementeer wat daarop gemik is om hierdie kwessies te takel nie. “Raadsbesluite, veral dié wat vir ’n oudit vra oor die bewerings van die onwettige verkoop van erwe en twyfelagtige finansiële gedrag, is nie teruggestuur of aan die publiek bekend gemaak nie, wat die gevaarligte verder laat flikker,” lui die klagskrif. Volgens die groep dui die voortgesette ongunstige en gekwalifiseerde ouditmenings op ernstige finansiële ongerymdhede en die moontlike wanbestuur van openbare fondse.“Die verslae dui op ongemagtigde finansiële transaksies en die herleiding van fondse vir private voordeel. Daar is ’n gebrek aan deursigtigheid in finansiële verslagdoening en ’’n versuim om regstellende maatreëls te tref, ten spyte van herhaalde rooi vlae van ouditowerhede,” aldus die groep beswaardes. GRONDDie groep verwys ook na verskeie erwe op Lüderitz wat na bewering teenstrydig met afdeling 30 en 36 van die wet op plaaslike owerhede verkoop is. Laasgenoemde vereis deursigtigheid, openbare deelname en ook resolusies van die raad vir die grondtransaksies. Sekere transaksies het na bewering wetlike verkrygings- en goedkeuringsprosesse omseil.“Sommige eiendomme is na bewering herverkoop voordat betalings ten volle gemaak is, wat moontlike oortredings van bedrog laat ontstaan. Verslae dui ook daarop dat sleutel- finansiële en grondtransaksiedokumente doelbewus vernietig is om bewyse van wanbestuur te verdoesel,” lui die klagskrif.VISVANGKWOTASVolgens die groep is opbrengste van ’n visvangkwota wat deur die ministerie van landbou, visserye, water en grondhervorming aan die dorpsraad toegeken is, na private trusts van voormalige raadslede herlei. “Net twee rekeninge van die Lüderitz Crayfish Festival Trust wat nou 18 jaar bestaan, is geoudit. Die begunstigdes is steeds onbekend en geen verslag is by die dorpsraad ingedien nie. “Bewyse dui daarop dat hierdie geld deur ’n verkose groep voormalige en huidige raadslede wanbestee is. Dit regverdig ’n ondersoek ingevolge die Wet op die Voorkoming van Misdaad van 2004,” het die klagskrif benadruk.BURGEMEESTER REAGEERVolgens die dorp se burgemeester, Phillipus Balhao, is die raad bewus van die klagskrif.“Ons is tans besig om die besonderhede na te gaan. Ons loof die deelnemende benadering en diegene betrokke wat die dorpsraad en leierskap verantwoordbaar hou. “Ons sal ons amptelike verklaring uitreik wanneer ons ons ontleding gedoen het,” het hy by navraag gesê. – republikein@republikein.com.na

Ondersoek Lüderitz-raad, vra bekommerde groep

Kommentaar

Republikein 2025-11-03

Meld asseblief aan om kommentaar te lewer

Ondersoek Lüderitz-raad, vra bekommerde groep

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.