Olie vir beter lewensomstandighede
‘Sektor moet ophef, nie verdeel nie’
Die president wil hê die olie- en gassektor moet 'n katalisator – en nie 'n kruk – vir plaaslike ontwikkeling wees nie.
Augetto Graig
“Aan beleggers sê ek, Namibië verwelkom julle, maar julle moet saam met ons werk op ons terme, terme wat ons omgewing bewaar, ons gemeenskappe respekteer en die voordele regverdig verdeel.”
Só het die adjunk- eerste minister en minister van nywerheidsontwikkeling, myne en energie, Natangwe Ithete, Woensdag by die amptelike opening van die 2025 Namibië olie- en gaskonferensie in die hoofstad gesê.
Sy boodskap is tuisgebring in die toespraak wat Kornelia Shilunga, die adviseur van die president en hoof van die Upstream-petroleumeenheid in die kantoor van die president, namens president Netumbo Nandi-Ndaitwah gelewer het. Volgens die president is die olie- en gasbedryf in Namibië op die drempel van buitengewone moontlikhede. Sy wil hê dié bedrywe moet ’n katalisator vir plaaslike ontwikkeling wees, nie ’n kruk nie.
Welvaart uit hierdie hulpbronne moet nywerheidsontwikkeling en breë deelname aanspoor, voer sy aan.
“Plaaslike inhoud is ononderhandelbaar, maar ’n pilaar van ons olie- en gasbestuur. Ek waarsku julle dat ons regering bedrywighede in die sektor noukeurig sal monitor om die streng handhawing van Namibiese wette en regulasies te verseker,” het die president gesê.
“Die olie- en gassektor moet ophef, nie verdeel nie, dit moet verenig, nie marginaliseer nie,” volgens Nandi-Ndaitwah.
Die president verwag dat die sektor ordentlike werksgeleenthede sal skep, vaardighede en tegnologie sal oordra, met ander sektore soos vervaardiging en energie sal skakel, en natuurlik inkomste sal genereer.
Volgens Ithete kan olie en gas tot N$7,7 miljard jaarliks tot die staatskas bydra, en hy sê hierdie inkomste moet nie verkwis word nie, maar moet omskep word in werksgeleenthede en beter lewensomstandighede vir elke Namibiër.
“Ons het gesien hoe nasies ryk aan olie en gas arm van gees en slagoffers van hul eie hulpbronne word. Namibië sal nie daardie pad stap nie,” voer hy aan.
Inteendeel, Namibië se olie- en gashulpbronne moet vrede, eenheid en welvaart in die land aanmoedig, sê hy.
“Aan Namibiërs sê ek – dit is julle olie, dit is julle gas, julle toekoms. Staan op, berei voor en neem julle plek in op hierdie nuwe grens,” sê Ithete.
Die tema van vanjaar se konferensie, die derde sedert die geleentheid se ontstaan, is “Van eksplorasie tot aksie: Die posisionering van Namibië as die volgende energiegrens”.
Ithete sê dit moes eerder die posisionering van Suider-Afrika aangespreek het, want Namibië se onlangse olie-ontdekkings benodig gesamentlike optrede.
“Ontwikkeling is nie ’n eenmanvertoning nie,” sê hy.
Ook aan die woord by die amptelike opening was Mohamed Hamel, die sekretaris-generaal van die forum vir gasuitvoerlande (GECF). Hy verwag dat Namibië binnekort by die forum sal aansluit.
Dr. Abdulmalik Halilu van Nigerië se raad vir inhoudsontwikkeling en -monitering het praktiese ervaring en raad gedeel rakende die groeiende deelname aan die groter oliebedryf. Hy sê Nigerië is gereed om saam met Namibië te werk en moedig die ontwikkeling van gesamentlike pogings aan om toerusting vir olie-ontginning binne Afrika te vervaardig.
Die uitvoerende hoof van Rhino Resources, Travis Smithard, wat tans die Volans 1X-boorgat in die Oranjekom langs die suide van Namibië laat boor, sê dit is nou ’n keerpunt in Namibië se geskiedenis en ’n tyd van olie-ontdekkings wat ’n generasie sal definieer.
“Namibië se oomblik in die Oranjekom is nou,” het hy gesê.
Smithard sê die N$3,8 miljard wat sy maatskappy reeds aan sy plaaslike olie-eksplorasie bestee het, insluitend vir die boor van Rhino se vorige Sagittarius 1X- en Capricornus 1X-boorgate, beteken aansporing tot meer waardigheid en groter welvaart vir die mense van Namibië.
Hy doen ’n beroep op Namibiërs om soos Rhino Resouces, vrymoedigheid en moed te toon, en sy raad aan mede-olieverkenners en -ontwikkelaars is: “Hier moet julle braaf wees, want Namibiërs is braaf.”
– [email protected]
“Aan beleggers sê ek, Namibië verwelkom julle, maar julle moet saam met ons werk op ons terme, terme wat ons omgewing bewaar, ons gemeenskappe respekteer en die voordele regverdig verdeel.”
Só het die adjunk- eerste minister en minister van nywerheidsontwikkeling, myne en energie, Natangwe Ithete, Woensdag by die amptelike opening van die 2025 Namibië olie- en gaskonferensie in die hoofstad gesê.
Sy boodskap is tuisgebring in die toespraak wat Kornelia Shilunga, die adviseur van die president en hoof van die Upstream-petroleumeenheid in die kantoor van die president, namens president Netumbo Nandi-Ndaitwah gelewer het. Volgens die president is die olie- en gasbedryf in Namibië op die drempel van buitengewone moontlikhede. Sy wil hê dié bedrywe moet ’n katalisator vir plaaslike ontwikkeling wees, nie ’n kruk nie.
Welvaart uit hierdie hulpbronne moet nywerheidsontwikkeling en breë deelname aanspoor, voer sy aan.
“Plaaslike inhoud is ononderhandelbaar, maar ’n pilaar van ons olie- en gasbestuur. Ek waarsku julle dat ons regering bedrywighede in die sektor noukeurig sal monitor om die streng handhawing van Namibiese wette en regulasies te verseker,” het die president gesê.
“Die olie- en gassektor moet ophef, nie verdeel nie, dit moet verenig, nie marginaliseer nie,” volgens Nandi-Ndaitwah.
Die president verwag dat die sektor ordentlike werksgeleenthede sal skep, vaardighede en tegnologie sal oordra, met ander sektore soos vervaardiging en energie sal skakel, en natuurlik inkomste sal genereer.
Volgens Ithete kan olie en gas tot N$7,7 miljard jaarliks tot die staatskas bydra, en hy sê hierdie inkomste moet nie verkwis word nie, maar moet omskep word in werksgeleenthede en beter lewensomstandighede vir elke Namibiër.
“Ons het gesien hoe nasies ryk aan olie en gas arm van gees en slagoffers van hul eie hulpbronne word. Namibië sal nie daardie pad stap nie,” voer hy aan.
Inteendeel, Namibië se olie- en gashulpbronne moet vrede, eenheid en welvaart in die land aanmoedig, sê hy.
“Aan Namibiërs sê ek – dit is julle olie, dit is julle gas, julle toekoms. Staan op, berei voor en neem julle plek in op hierdie nuwe grens,” sê Ithete.
Die tema van vanjaar se konferensie, die derde sedert die geleentheid se ontstaan, is “Van eksplorasie tot aksie: Die posisionering van Namibië as die volgende energiegrens”.
Ithete sê dit moes eerder die posisionering van Suider-Afrika aangespreek het, want Namibië se onlangse olie-ontdekkings benodig gesamentlike optrede.
“Ontwikkeling is nie ’n eenmanvertoning nie,” sê hy.
Ook aan die woord by die amptelike opening was Mohamed Hamel, die sekretaris-generaal van die forum vir gasuitvoerlande (GECF). Hy verwag dat Namibië binnekort by die forum sal aansluit.
Dr. Abdulmalik Halilu van Nigerië se raad vir inhoudsontwikkeling en -monitering het praktiese ervaring en raad gedeel rakende die groeiende deelname aan die groter oliebedryf. Hy sê Nigerië is gereed om saam met Namibië te werk en moedig die ontwikkeling van gesamentlike pogings aan om toerusting vir olie-ontginning binne Afrika te vervaardig.
Die uitvoerende hoof van Rhino Resources, Travis Smithard, wat tans die Volans 1X-boorgat in die Oranjekom langs die suide van Namibië laat boor, sê dit is nou ’n keerpunt in Namibië se geskiedenis en ’n tyd van olie-ontdekkings wat ’n generasie sal definieer.
“Namibië se oomblik in die Oranjekom is nou,” het hy gesê.
Smithard sê die N$3,8 miljard wat sy maatskappy reeds aan sy plaaslike olie-eksplorasie bestee het, insluitend vir die boor van Rhino se vorige Sagittarius 1X- en Capricornus 1X-boorgate, beteken aansporing tot meer waardigheid en groter welvaart vir die mense van Namibië.
Hy doen ’n beroep op Namibiërs om soos Rhino Resouces, vrymoedigheid en moed te toon, en sy raad aan mede-olieverkenners en -ontwikkelaars is: “Hier moet julle braaf wees, want Namibiërs is braaf.”
– [email protected]
Kommentaar
Republikein
Geen kommentaar is op hierdie artikel gelaat nie