Okahandja se sake onder die loep

Die munisipaliteit van Okahandja het bevestig sy kontrak met die skuldinvorderaar RedForce Debt Management sal op 16 Oktober aanstaande jaar ten einde loop. Daar is egter steeds vrae oor die agteruitgang van paaie op die dorp, terwyl inwoners mor oor die plaaslike owerheid wat uit pas met hul behoeftes is. Antwoorde op vrae aan die munisipaliteit het lig op die regulering van straatverkopers gewerp. Inligting is ook gedeel oor die proses vir die moontlike afskrywing van uitstaande waterskuld van pensioenarisse en mense met gestremdhede.Met verwysing na die regulering van straatverkopers het die munisipaliteit gesê ’n ruimte is oorkant die treinstasie aangewys om verkopers tydelik te huisves. Intussen word oorweging aan die vestiging van ’n groter en meer geskikte informele mark geskenk. Die munisipaliteit is tans in gesprek met die ministerie van werke en vervoer oor die moontlike uitruiling van Erf 59, wat sentraal in die dorp geleë is. Kommer is geopper oor straatverkopers wat hul produkte op sypaadjies voor winkels uitstal en sodoende die beweging van voetgangers belemmer. Volgens die munisipale raad is versperrings langs sypaadjies aangebring om straatverkopers te ontmoedig om handel te dryf in gebiede waar voetgangers vrylik beweeg en om hulle na die aangewese perseel te herlei. Met verwysing na uitstaande waterskuld het die raad gesê die skriftelike opdrag van die minister van stedelike en landelike ontwikkeling, Sankwasa James Sankwasa, is eers op 19 Augustus 2026 amptelik aan plaaslike owerhede gestuur. Dit ten spyte daarvan dat inligting oor die opdrag sedert Maart versprei is.Die raad het gesê die skriftelike opdrag was nodig om die vereiste inligting oor bejaarde inwoners en mense met gestremdhede met uitstaande waterrekeninge saam te stel en in te dien. Die minister het die munisipaliteit tot 31 Augustus 2026 gegee om die inligting in te dien, wat beteken dat geen goedkeuring toegestaan kon word voordat die voorlegging gemaak is nie. ’n Vroeëre voorlegging waarin versoek is dat pensioenarisse se uitstaande skuld afgeskryf word – tydens die ampstermyn van voormalige minister Erastus Uutoni – kon nie goedgekeur word nie, volgens die raad. Dit was omdat daar steeds op regsadvies van die kantoor van die prokureur-generaal gewag word. Volgens die raad sal hulle eers met die afskrywing voortgaan sodra die nodige goedkeuring van die minister ontvang is.Geen antwoorde is egter verskaf oor die vraag wanneer die toestand van die dorp se paaie uiteindelik deur die munisipaliteit getakel sal word nie. Dit ten spyte van ’n opdrag wat die adjunkminister van landelike en stedelike ontwikkeling tydens die Okahandja-ekspo in Mei uitgereik het. Daarin word bepaal dat daar aandag aan die dorp se paaie geskenk moet word.Vrae oor die aantal raadsvergaderings wat tot dusver vanjaar gehou is, is ook nie beantwoord nie, ten spyte van die 11 per jaar wat beloof is.Verder is geen verduideliking gegee oor die burgemeester se vergaderings met inwoners van die dorp en waarom dit nie plaasvind nie. ’n Plasing op sosiale media het egter gesê gemeenskapsvergaderings sal wel op 12 en 13 September plaasvind. – aurelia@nmh-hub.com.na

Okahandja se sake onder die loep

Kommentaar

Republikein 2026-09-04

Meld asseblief aan om kommentaar te lewer

Okahandja se sake onder die loep

Kommentaar

Republikein 2026-09-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.