Meer as kos

Gobabis spog sedert April 2025 met ’n nuwe kulinêre juweel. Boerderij, die droom van bestuurder Anhia du Preez, maak sy merk met ’n uitgebreide spyskaart en unieke atmosfeer.“Van hamburgers en pizzas tot steaks, schnitzels, pasta, slaaie en wraps – ons wil iets vir almal bied,” sê Du Preez. “En ons gaan net aanhou groei.”PEUSEL EN KOOPMaar Boerderij is veel meer as net ’n restaurant. Die ruimte sluit ook ’n boetiekwinkel in waar handsakke en ander aandenkings te koop is. Daar is boonop planne om ’n klein museum in te rig wat die plaaslike geskiedenis sal uitbeeld, met bydraes van besoekers wat selfs van Suid-Afrika afkomstig is.Die restaurant plaas ’n sterk fokus op diversiteit en inklusiwiteit, met die doel om elke gas tuis te laat voel.“Ons kry mense van oraloor, ook uit die oostelike dele van die land. Ons wil vir elkeen iets bied wat bekend en gemaklik voel,” verduidelik sy.DIE NAAMDie naam Boerderij, wat ’n Nederlandse plaas of plaaswerf beteken, gee ’n speelse kulturele karakter aan die onderneming. ’n Toevallige ontmoeting met ’n Nederlandse plaasrestaurant het bevestig hoe uniek die Gobabis-onderneming se konsep is en die span verder gemotiveer om hoë standaarde te handhaaf en ’n verwelkomende omgewing te skep.Taal en kultuur staan sentraal tot die ervaring. Hoewel die spyskaart hoofsaaklik in Afrikaans is, werk die span aan ’n Engelse weergawe om die restaurant vir alle besoekers toeganklik te maak.“Ons wil hê Afrikaans moet hier aanhou leef en asemhaal,” beklemtoon sy, “maar ons wil ook hê almal moet die ervaring geniet.”KIES JOU WYNWynliefhebbers word ook nie vergeet nie. Boerderij se wynversameling groei voortdurend en gaste kan self ’n bottel uit die kelder kies.Met langer aandure, ’n verwelkomende instapbeleid en persoonlike diens, streef Boerderij daarna om ’n gesellige maar lewendige eetervaring te bied.Vir Du Preez is die groter droom egter om Boerderij tot meer as net ’n restaurant uit te bou – ’n kulturele ontmoetingsplek waar kos, erfenis en gemeenskap onder een dak saamkom.“Ons wil hê dat elkeen wat by ons deur instap, welkom en gemaklik moet voel – en dalk ’n bietjie geïnspireer moet word deur dit wat ons hier besig is om te bou.”

Meer as kos

Kommentaar

Republikein 2026-08-19

Meld asseblief aan om kommentaar te lewer

Meer as kos

Kommentaar

Republikein 2026-08-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.