Lüderitz wag vir groenlig vir padprojek

Inwoners van die Nautilus- en NHE-woonbuurte op Lüderitz het hul ontevredenheid uitgespreek oor ’n voorstel dat die grondpad in Gebied 7 op die dorp geplavei word. 

“Ek is ’n belastingbetaler wat in Skoolstraat woon en ly al vir 42 jaar. Die stof is ondraaglik. NHE het al 30 jaar grondpaaie. Dis nie reg nie. Die raad maak al sedert 2014 beloftes en sien nou skielik die behoefte om die Gebied 7-pad te plavei,” sê Anna Bostander. 

Sy het die besluit tydens ’n gemeenskapsvergadering met raadslede en lede van die dorpsraad as “blatante diskriminasie” en onregverdig beskryf. 

Die vergadering is deur die burgemeester van die hawedorp, Brigitte Fredericks byeengeroep om terugvoering aan inwoners oor begrote kapitaalprojekte vir die 2026- ’27-boekjaar te gee. Die vergadering moes ook die behoeftes van die gemeenskap vir die volgende vyf jaar identifiseer.

BEPLANDE PAD

Die beoogde padprojek wat sommige inwoners warm onder die kraag het, behels die plavei van sowat 3,1 kilometer met volledige stormwaterdreinering, sypaadjies vir voetgangers van 10 000 vierkante meter, ’n bushalte met skuilings, padtekens en spoedhobbels by alle kruisings.

Volgens Fredericks volg die projek op ’n voorstel van inwoners van Gebied 7. Die Lüderitz-dorpsraad het gevolglik ’n aansoek by die Padfondsadministrasie (RFA) ingedien waarin N$36,5 miljoen versoek is om die projek vanjaar te finansier. 

Inwoners van Nautilus en Gebied 7 het gevra dat die dorpsraad die opgradering van paaie in die woonbuurte priotiseer en dat vervoermaatskappye hiervoor genader moet word. 

GESONDHEID

In sy motivering vir die opgradering van die pad in Gebied 7 het die dorpsraad verwys na stof wat die gesondheid van inwoners beïnvloed, terwyl dit tydens reën oorstroom en gevolglik ontoegangklik is. Die veiligheid van kinders word ook geraak wat langs vragmotors loop wat die pad gebruik, terwyl pendelaars ook hier vir hul vervoer wag. 

TOEKOMS

Die dorpsraad sal sodra die RFA die groenlig vir finansiering gee, ’n tender aan konstruksiemaatskappye vir konstruksie uitreik. Die padprojek sal na verwagting aanstaande jaar begin en sowat 12 maande duur. Na raming sal 80 tot 100 inwoners vir die duur van die projek in diens geneem word. 

“Dit is ’n strategiese pad wat met die nywerheidsgebiede verbind is. Ons wil nie hê vragmotors moet in of deur residensiële gebiede beweeg nie.”

“Lüderitz groei en die spesifieke pad sal ontwikkel word om ’n strategiese pad te wees. Dit sal deur byna almal wat hier woon in die nabye toekoms gebruik word,” het Austin Mubiana, waarnemende uitvoerende hoof van die dorpsraad verduidelik. 

– [email protected]