Lüderitz verdrink in vullis

Die burgemeester van Lüderitz, Phil Balhao, het die dorpsraad erg gekritiseer vir hul versuim om die ernstige omgewings- en gesondheidsgevare wat deur onvoldoende afvalbestuurspraktyke inhou, aan te pak.Volgens Balhao is daar ’n blatante “gebrek aan nakoming” van gesondheids- en omgewingsregulasies, wat kwansuis op inwoners en beleggers afgedwing word, maar deur owerhede afgeskeep word.Hy het die ministerie van die omgewing, bosbou en toerisme daarvan beskuldig dat hulle die situasie ignoreer. “Hulle laat die vrystelling toe van onbehandelde rioolwater vanaf ’n niefunksionerende bakteriese afvalwaterbehandelingsaanleg, sowel as rommel van ’n onbestuurde [en beslis ’n] stortingsterrein om te bestaan wat nie aan enige nasionale vereistes voldoen nie," het hy in ’n plasing op sy sosialemediablad geskryf.Hy het bygevoeg dat hierdie situasie die afgelope vier jaar voortduur en dit as onaanvaarbaar beskryf.“Ons het te lank stilswye aangemoedig en diegene wat gepraat het, geviktimiseer. Selfs al het die sosialemediametode nie altyd resultate opgelewer nie, het dit byna altyd die beoogde oë bereik van diegene in posisies wat hierdie bekommernisse kan takel en wat andersins nie toeganklik was nie,” het Balhao aangevoer.Die burgemeester het beklemtoon dat die probleem van afval en rommel wat in die Tsau ||Kheib Nasionale Park en omliggende gebiede waai tot ondenkbare vlakke toegeneem het. “Die impak wat dit op ons omgewing het, is onberekenbaar. Ons word voortdurend aangesê om die beeld van die instelling wat ons dien te beskerm en dat ons die regte kanale moet volg. Wat ook al die verskoning mag wees, ek wil dit nie meer hoor nie,” het hy verklaar.Balhao het ook die plaaslike owerheid gekritiseer omdat dit soos ’n “snoepie” bestuur word, met verwysing na onbehandelde afvalwater wat in die see vloei en kleinskaalse landbouprojekte wat dieselfde onbehandelde water gebruik. “Daar is eenvoudig geen nakoming van Namibiese afvalbestuurspraktyke nie en ons het reeds nagenoeg N$1 miljoen aan regskoste bestee vir die afdwinging van gesondheidspraktyke met geen selfregulering nie,” het hy onthul.Die burgemeester het daarop gewys dat die stortingsterrein buite die dorpsgrense geleë is, binne die Sperrgebiet en Tsau ||Khaeb Nasionale Park, wat hy beskryf het as ’n duidelike teken van die onbevoegdheid van die Lüderitz-dorpsraad se administrasie. Hy het opgemerk dat gebiede noord van die stortingsterrein vir “myle en myle” met rommel bedek is. Balhao sê die meegaande foto’s “is ’n onmiskenbare bewys van die geweldige omvang van die omgewingskade”. Hy het ook genoem dat die pad na Agathe-strand in ’n betreurenswaardige toestand is en dat die vallei agter Area 7 na die Ombepo-windplaas besaai is met rommel so ver as wat die oog kan sien.Hy het ’n beroep op die omgewingsministerie gedoen om onmiddellik in te gryp. “Dit is hoog tyd dat julle dit stopsit. Lüderitz word in ’n stortingsterrein omskep en die dorpsraad moet verantwoordelik gehou word vir die skade aan die omgewing. Die gebrek aan aanspreeklikheid moet verander. Dit is growwe nalatigheid,” het hy beklemtoon.Balhao het genoem dat hy ’n gesamentlike onderneming-oplossing deur ’n mosie voorgestel het, maar dit is geïgnoreer. Boonop is ’n Memorandum van Verstandhouding (MoU) met die Universiteit van Magdeburg in Duitsland vir kundigheid in afvalbestuur nie uitgevoer nie.In reaksie op Balhao se sosialemediaplasing het Yvonne Amiss-Albertse, ’n inwoner van Lüderitz, haar frustrasie oor die vullisprobleem uitgespreek en ’n skoonmaakveldtog voorgestel. “Almal is veronderstel om hul deel te doen, ons dorp het die ondersteuning nodig. Ons kan elke derde maand skoonmaak,” het sy voorgestel. – republikein@republikein.com.na

Lüderitz verdrink in vullis

Kommentaar

Republikein 2025-06-17

Meld asseblief aan om kommentaar te lewer

Lüderitz verdrink in vullis

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie