Lüderitz op drumpel van nuwe geleenthede

Die ontwikkelingsagenda van Lüderitz en die ||Kharasstreek hang grootliks af van die beplande uitbreiding van dié kusdorp se hawe.



Dit volgens Susan Ndjaleka, ’n raadslid van die !Nami Nûs-kiesafdeling, wat die Lüderitz-gemeenskap en besighede versoek het om hul steun aan Namport se ontwikkelingsplanne te gee.



“Ons moet vir die regering sê ons is gereed en wil hê dat dit moet gebeur. Indien nie, sal hierdie geleentheid verbygaan. Walvisbaai is gereed en wag,” het sy onlangs aan gemeenskapslede gesê tydens ’n inligtingsessie wat deur die Lüderitz Waterfront Development Company (LWDC) op dié hawedorp gehou is.



Sy het verder verseker dat die hawe se ontwikkeling nie die geskiedkundige terreine wat verband hou met die volksmoord op Shark Island sal benadeel nie en het kommer oor die saak geuiter.



“Die !Aman Tradisionele Owerheid, wat jurisdiksie oor hierdie gebied van die dorp het, ondersteun ons ontwikkelingspogings,” het Ndjaleka bygevoeg.



Sy het beklemtoon die LWDC is in pas met belangrike prioriteitsgebiede van die regering en skep ’n bevorderlike omgewing vir ander besighede.



“Onderrig deur die Namibië Maritieme Museum en die nuwe beplande private hospitaal, wat by die gesondheidsektor aansluit, is voorbeelde.”



Sy het egter gewaarsku: “Ons kan beplan soos ons wil; as die hawe nie ontwikkel word nie, kan ons van enige ontwikkeling vergeet.”



BESPREKINGS



Intussen het die LWDC se uitvoerende hoof, Fluksman Samuehl, gesê die maatskappy volg besprekings oor Shark Island met groot belangstelling.



“Namibië Wildlife Resorts is besig om te onttrek en die Nasionale Erfenisraad en die ministerie van onderwys neem oor. Daar is gesprekke, waarvan ons bewus is, om ’n gedenkmuseum vir die volksmoord te skep. Ons sal hulp aanbied om te verseker dat so ’n bykomende aktiwiteit ’n werklikheid word.”



Hy het ook bevestig die LWDC is besig om vir sy algemene jaarvergadering op 3 September voor te berei.



“Ons gaan ons boeke vir aandeelhouers oopmaak. Hulle sal na ons finansiële prestasies kan kyk.”



Samuehl het die dringendheid beklemtoon om noodsaaklike geriewe en dienste te verbeter om ten volle voordeel uit voortgesette ontwikkelingsplanne te trek.



“Die verwesenliking van olie- en groenwaterstofproduksie sal aanleiding gee tot behoeftes vir akkommodasie, behuising, kantore, restaurante, kleinhandelwinkels en selfs ’n private hospitaal. Die hele ||Kharas- en Hardapstreek het nie ’n private hospitaal nie.”



Hy het aangedui die LWDC, wat reeds 162 werksgeleenthede deur huurderbedrywighede (tenant) geskep het, die mandaat het om ekonomiese groei te stimuleer en te fasiliteer, met die fokus op toerisme, handel- en sake-ontwikkeling deur middel van infrastruktuurprojekte.



“Ons het ’n gesprek met FlyNamibia gehad, want ons kan nie oor ekonomiese groei praat as die lugruim nie oop is om te verseker dat sakelui (beleggers) so gou as moontlik hierheen kom, sake doen en teruggaan nie. Hulle het nie tyd om 10 uur op die pad deur te bring nie,” het hy gesê.



PROJEKTE



Die konstruksie van die LWDC se nuwe hoofkantoor en wasserygeriewe by Lüderitz se ou kragstasie is tans aan die gang, het die uitvoerende hoof gesê.



Gesprekke is ook aan die gang om kantoorruimte aan die Namibiese Toerismeraad (NTB) en die Owerheid vir Sake- en Intellektuele Eiendom (Bipa) te verskaf.



Nuwe LWDC-projekte sluit onder meer in die Seaview Hotel met 120 kamers, wat as ’n gesamentlike onderneming met die private sektor ontwikkel sal word.



Beplande ontwikkelings by die ou kragstasie sluit in ’n kaai wat die gebou via die see met fase 1 van die Waterfront verbind, wat toekomstige ontspanningsaktiwiteite moontlik maak; ’n droogdok vir die Welwitschia-vaartuig as deel van die museumtemapark; die voltooiing van ’n ondergrondse kroeg en ’n sitkamer vir baie belangrike persone (BBP); en ’n promenade tussen die kragstasie en die Nest Hotel.



– [email protected]