Kommer oor korrupsie by streekrade

Die minister van stedelike en landelike ontwikkeling, Sankwasa James Sankwasa, sê daar is ’n misplaaste wanopvatting onder politieke leiers dat daar verskeie regerings is wat onafhanklik van mekaar funksioneer, veral in Kunene, ||Kharas, Hardap en Erongo, waar dit die meeste voorkom.Volgens Sankwasa het hy sedert sy aanstelling as minister twee maande gelede ’n hoë mate van verontagsaming vir die beginsels van goeie bestuur onder diegene wat as leiers verkies is, waargeneem.Dit is volgens die minister daarom nie nuus dat beamptes daarin misluk om doeltreffende openbare dienste te lewer nie. Hy was Maandag aan die woord tydens ’n hoëvlak- raadgewende vergadering vir streekrade en plaaslike owerhede in Windhoek. “Korrupsie is besig om vinnig te versprei, hoofsaaklik onder politieke en verkose beamptes, in streek- en plaaslike regeringstrukture, ministeries en selfs uitvoerende bestuur. Plaaslike owerhede is sentraal tot hierdie kommer en moet verantwoordbaar gehou word. “Daar moet beklemtoon word dat, soos vervat in die Namibiese Grondwet, is die land gevestig as demokraties, soewerein en sekulêr, ’n verenigde staat wat gestig is op die beginsels van demokrasie, die wet en geregtigheid vir almal,” het Sankwasa gesê.“Namibië is eerstens ’n verenigde staat, nie bloot ’n sekulêre staat nie en as lede van hierdie grondwetlike demokrasie moet ons volgens die wil en waardes van die Namibiese mense optree. Tweedens word Namibië deur wette regeer.“Daarom is ek en almal van julle as verkose leiers gebind deur ’n eed om die Grondwet te onderhou en binne sy raamwerk te regeer,” het die minister beklemtoon. As ’n parlementslid, sê Sankwasa word hy gelei deur Artikel 56 van die Grondwet wat bepaal dat elke lid van die Nasionale Vergadering (NV) ’n eed voor die hoofregter of ander aangewese regter moet aflê voordat hy/sy amptelik ’n lid van die parlement of kabinet is.“Soortgelyk bepaal afdeling 91 van die streekradewet dat elke lid, voordat hy/sy die amp betree, ’n eed op die voorgeskrewe manier en voor ’n regter of aangewese owerheid moet aflê. “Hierdie eed bevestig hul verbintenis om die mense eerlik, regverdig en in ooreenstemming met die Grondwet en die wette van Namibië te dien. Ek hoop hierdie boodskap vind aanklank by elke streekraadslid. “Toe ek ’n brief aan die raad onder afdeling 81 van die streekradewet geskryf het, het dit duidelik gesê geen lid sal die rol van voorsitter beklee, voordat hy/sy die amptelike eed soos voorgeskryf deur die wet, aflê nie. “Hierdie vereistes beklemtoon die beginsel dat alle verkose beamptes, ongeag hul titel, die Grondwet van Namibië moet onderhou en nie kies en keur watter wette om te volg nie,” het Sankwasa gemaan.Hy het ook gevra hoe raadslede kan beweer hul doen dit wel en die Grondwet verdedig, maar tree op so ’n wyse op wat teenstrydig is met die wette wat die basis van die land se demokrasie vorm. “Dis die wortel van baie van die uitdagings wat ons vandag in die gesig staar – wydverspreide wanbestuur en korrupsie in talle plaaslike owerhede, met sommige wat blyk hulle regeer op hul eie en weg van die sentrale regering en meer in pas is met partybelange as met nasionale beginsels,” het die minister gesê.“Ons moet ’n einde maak aan hierdie politieke afwyking en pogings weerstaan om plaaslike rade in onafhanklike entiteite te omskep wat onder die invloed van individuele politieke partye bedryf word. Dis wat ek eerstehands ervaar het. “Diegene met die sterkste menings, veral dié wat tot ’n politieke partye verbind is, moet erken dat plaaslike en streekowerhede verteenwoordigers van Namibië is.“Hulle het die mandaat om nasionale beleide, beide polities en finansieel en nie partygebaseerde agendas, te implementeer nie. Enige ander benadering is nie net misleidend nie, maar ook onregverdig,” het Sankwasa gesê.Hy het bygevoeg dat die land dit veral in die bestuur van grond sien, waar plaaslike owerhede grond sonder ministeriële goedkeuring toeken met die bewering dat hulle die finansies later sal uitsorteer.“Dis onaanvaarbaar en ondermyn goeie regering,” het Sankwasa benadruk. – republikein@republikein.com.na

Kommer oor korrupsie by streekrade

Kommentaar

Republikein 2025-11-04

Meld asseblief aan om kommentaar te lewer

Kommer oor korrupsie by streekrade

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.