King’s Baton maak Namibiese draai

Leandrea mouers
Leandrea Mouers

Namibië speel tans gasheer vir die King’s Baton-aflos as deel van die aftelling na die Statebondspele in 2026 wat in Glasgow in Skotland plaasvind.

Vir die eerste keer ooit ontvang elke Statebondsland en -gebied hul eie “aflosstok” vir hul vieringe en is gevra om dit so aan te pas en te versier om die land se kultuur te simboliseer. Al 74 van die aflosstokke sal tydens die openingseremonie in Glasgow aanstaande jaar verenig waar die een van Skotland aan koning Charles III oorhandig en die boodskap gelees sal word.

Die aflos vir aanstaande jaar se Spele het in Maart vanjaar by Buckinghampaleis begin en eindig op 23 Julie 2026 tydens die openingseremonie in Glasgow.

Britt Byl, die verteenwoordiger van die Namibiese Nasionale Olimpiese Komitee se raad, verduidelik die aflos behels die reis deur 74 lande en gebiede in net minder as ’n jaar.

“Die aflos en aktiwiteite is weer eens daarop gemik om gemeenskappe te verenig, kultuur te vier, volhoubaarheidsinisiatiewe te bevorder en terselfdertyd die waardes van die Statebond Sport te vier, naamlik menslikheid, gelykheid en lotsbestemming.”

Met elke nasie en gebied wat vanjaar sy eie stok ontvang het, het Namibië syne aangepas om die land se kultuur en erfenis te verteenwoordig.

“Ons betrokkenheid by hierdie opwindende geleentheid bied aan die hele gemeenskap die kans om Namibië aan die res van die wêreld te vertoon,” het Byl gesê.

Volgens haar sluit ’n noodsaaklike deel van die King’s Baton-aflos bedrywighede in wat op oseaanbewaring fokus.

“Ocean Conservation Namibia, gelei deur Katja en Naudé Dreyer, verseker dat ons Namibië se verbintenis tot volhoubare ontwikkeling en omgewingsbewaring handhaaf en ons unieke biodiversiteit en natuurlike hulpbronne beskerm.”

Die King’s Baton-aflos eindig vandag in Windhoek.

[email protected]

Kommentaar

Republikein 2025-10-10

Geen kommentaar is op hierdie artikel gelaat nie

Meld asseblief aan om kommentaar te lewer