Karasburg se finansies 'bloei'

Die burgemeester van Karasburg se persoonlike assistant, Kalle Goliath, sê dié suidedorp “is in ’n wurggreep” midde die politieke stryd wat daar aan die gang is. Die minister van stedelike en landelike ontwikkeling, Erastus Uutoni, het die afgelope Donderdag die dorp besoek, glo vergesel deur verskeie polisiebeamptes. Hy het met die dorpsraad en munisipale leiers vergader, en het ’n openbare vergadering met inwoners gehou. “Ek het gehoop met die minister se besoek sou dinge verander het,” het Goliath gesê. Uutoni se besoek is reeds die onderwerp van ’n stel vrae deur die adjunkleier van die Landless People&#039;s Movement (LPM), Henny Seibeb, wat die minister op 6 Julie voor die parlement sal moet beantwoord.Volgens Goliath bloei die dorp se finansies, met N$10 miljoen wat vermoedelik in 2018 verdwyn het en steeds die onderwerp is van ’n interne dissiplinêre verhoor teen die destydse uitvoerende hoof van die munisipaliteit, Nico Titus. Meer onlangs het N$2,8 miljoen oor 36 maande weggeraak, sê Goliath. Boonop moet die dorp uitkom met ’n ontwikkelingsbegroting van slegs N$35 000 vir die volgende drie jaar, sê hy. Hierdie begrotingstoekenning is ook die onderwerp van een van die vrae wat Seibeb aan Uutoni gestel het.Die dorpsraad bestaan uit vier LPM-raadslede, twee van Swapo en een raadslid van die Independent Patriots for Change (IPC). Die voorsitter van die LPM-beleidseenheid, Lazarus Kairabeb, het gister in ’n mediavrystelling gesê die geld het weggeraak onder die toesig van die munisipaliteit se geskorste uitvoerende hoof, Hansina Isaacks. Dit oor kort tydperke van twee tot drie weke, toe N$841 380 verdwyn het, gevolg deur N$880 532, nog N$460 008 en weer N$2226 360 - met niemand wat enige antwoord oor die kwessie kan verskaf nie, sê hy. Kairabeb sê Uutoni wil hê die dorpsraad moet misluk, en dit is hoekom hy die kwessie van die uitvoerende hoof-pos aan die dorp se administrasie oorlaat.Volgens Goliath het Isaacks Vrydag haar kantoor oopgebreek en haar werk hervat, waarna ’n saak van betreding by die polisie aangemeld is. LEWENSOMSTANDIGHEDEDie minister het inowners wel ingelig dat ’n komitee op die been gebring word om ondersoek in te stel na die rede dat plaaslike owerhede soos Karasburg nie hul skuld aan NamPower en NamWater delg nie. Wat die tekort aan grond rondom Karasburg betref het Erika Nehunga, Karasburg se tegniese direkteur, gesê meeste van die erwe is reeds aan sekere mense toegeken. Terwyl die dorpsraad reeds die stukke grond uitgepen het, is dit nog nie gediens nie. “Ons wil Build Together weer aktiveer,” sê Uutoni, en voeg by dat ’n gepaste begroting daarvoor toegeken is. Die laekoste-lening van tussen N$40 000 en N$80 000 is vir baie meer bekostigbaar as om ’n huis van N$600 000 te koop, sê die minister. By die geleentheid het Jacobus Basson, ’n lid van die Build Together-gemeenskapskomitee, gesê die program het op Karasburg vasgeval weens ’n tekort aan fondse. “Oor die laaste drie jaar het ons net drie huise gebou,” sê hy, en voeg by dat eienaars ook nie die lenings terugbetaal het nie. Burgemeester Maria Veldskoen kon bevestig dat die ministerie N$500 000 vir die Build Together-program beskikbaar gestel het, wat dalk voor die einde van die maand oorbetaal sal word. Volgens haar is N$130 000 reeds in die betrokke rekening. “Ek is baie omgekrap dat die komitee nie daarvan ingelig is nie,” het sy gesê.Build Together is ontwikkel met die doel om elke Namibiese gesin, wat weens lae inkomste geen toegang tot behuising het nie, &#039;n billike geleentheid te gee om grond met water, krag en &#039;n afvalverwyderingstelsel te bekom.augetto@republikein.com.na

Karasburg se finansies 'bloei'

Kommentaar

Republikein 2025-09-19

Meld asseblief aan om kommentaar te lewer

Karasburg se finansies 'bloei'

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie