Karasberge in ligte laaie

Elvira Hattingh

Gistermiddag het krete kort-kort uit die Karasberg-omgewing opgeklink vir hulp met die bestryding van ’n reuseveldbrand, wat teen Woensdagaand al 53 000 hektaar verswelg het en “elke dag letterlik ’n hele plaas van hoek tot kant afbrand”.

Brandbestryders moes Woensdag en gister mediese hulp ontvang nadat hulle in die bergagtige gebied seergekry het, terwyl hulle die vuur naby ’n huis op die plaas Stormlaagte bestry het.

Terselfdertyd was daar ook ’n brand in die Stampriet-omgewing by die Derm-pad, terwyl die een in die Kalk-rand- of Hoachanas-omgewing ná ’n stryd van 24 uur onder bedwang gebring is, het mnr. Sean Naudé van die Namibian Marshall Rangers aan Republikein gesê.

“My plaas is nou besig om te brand, maar ons is ’n klomp hier en ons fight hom maar soos ons kan,” het mnr. Abré van der Merwe gistermiddag van sy plaas Inhoek uit die omgewing van die Karasberge laat weet.

Hy sê gisteroggend het sy broer, George, met behulp van satelliet-toeps, vasgestel dat die vuur toe reeds oor 100 km beweeg het.

Mnr. Lourens van Staden, wat toe ook reeds sowat 18 ure lank besig was om dié brand te bestry, het aan die koerant gesê dat hul grootste behoefte meer hande is.

“Ons kort hulp – mense wat ingerig is teen ’n brand. Bo-op die berg is dit baie moeilik, die beskikbaarheid van water is ’n probleem.

“Gisteraand se vuur was byvoorbeeld ’n uur en ’n half ver van water af,” het Van Staden gesê.

Hy sê die brand het Dinsdagmiddag begin en word deurentyd deur ’n sterk noordewind aangedryf.

“Hy gaan nog ’n tydjie lank brand, as ek hom so kyk.”

Van Staden sê die berg is moeilik begaanbaar en soms brand dit op plekke buite die brandbestryders se bereik.

“Die weiding ná die droogte is so baie, dit brand teen die wind op. Jy kan nie ’n voorbrand maak nie, want dan het jy self nog ’n brand gestig. Dit brand nie net een rigting nie. As jy hom nie stop nie, hou hy nie op nie; hy brand alle kante toe,” het hy gesê.

Mnr. George van der Merwe het in ’n boodskap op ’n WhatsApp-groep vir veldbrande gevra dat almal wat kan, gaan help om die brand in die Karasberge onder beheer te bring.

“Daar brand nou elke dag plase af – letterlik van hoek tot kant.

“Wat ook nou besig is om te gebeur, is dat die mense besig is om moeg te word. Hulle kan eenvoudig net nie meer nie. Hulle het vars mense nodig om hulle te kom bystaan. . .” het hy gesê.

NOG BRANDE

Naudé het bevestig die Karasberge brand nog erg.

“Die strook wat brand is sowat 30 km lank en dit is in die berge,” het hy gesê.

Hy was Woensdag met sy ambulans in dié omgewing om hulp te verleen aan mense wat beseer is, waarvandaan hy na Kalkrand vertrek het.

“Die Karasberge is ruwe klipwêreld en mense het geval en is beseer. Hulle kan nie daar inkom met hul bakkies en toerusting nie. Hulle moet dus per voet ingaan,” het hy gesê.

Naudé het gistermiddag pas teruggekeer “van 24 uur daar buite”, waartydens hulle veldbrande by Hoachanas oor ’n strook van 25 km ver bestry het. “Ons het dié vuur teen seweuur vanoggend geblus,” het hy gesê.

Intussen het me. Julia Fouché, ’n verteenwoordiger van die suide se Farmer’s Watch op Koës, gehelp dat skenkings, medikasie en ander benodighede by die brandbestryders en geraakte mense in die Karasberge uitkom.

Sy sê ruim skenkings ter waarde van minstens N$50 000 is reeds deur plaaslike ondernemings, boere uit die Koës- en Aranos-omgewing asook deur Droogtehulp Namibië ontvang.

– [email protected]