Italianers wil skoene maak op Ondangwa

Hoop vir die herlewing en uiteindelike uitbreiding van die Ondangwa Noordelike looiery het weer opgevlam ná die ondertekening van ’n ooreenkoms ter waarde van N$58 miljoen wat oor 25 jaar strek.Die ooreenkoms is deur die adjunk- eerste minister en minister van nywerheidsontwikkeling, myne en energie, Natangue Ithete, verwelkom en is gesluit tussen die regering, die agentskap vir nywerheidsontwikkeling in Namibië (Nida) en Desert Planet Industies (DPI) in Italië.“Die ondertekening van die ooreenkoms is die moeite werd om te vier, aangesien dit al lank kom,” het Ithete gesê.“Ten spyte van ons beste bedoeling het verskeie faktore daartoe gelei dat die aanleg vir 15 jaar in onbruik was,” het Ithete gesê.“Ons is dus gelukkig om uit vorige foute te leer en die lesse in hierdie nuwe hoofstuk van die bedryf in te sluit. Vandag is ’n nuwe begin en ’n deurslaggewende oomblik in ons industriële herlewingsreis,” het Ithete gesê.Die looiery is in 2001 teen ’n beraamde koste van N$42 miljoen gebou. In November 1997 het die ministerie van finansies en die Offshore Development Company (ODC), NIDA se voorloper,US$6 miljoen (destyds ongeveer N$40 miljoen) by die Export-Import (Exim) Bank van China geleen.Meer as die helfte van die lening is direk aan China se Shanghai Corporation for Foreign Economic and Technological Cooperation betaal vir masjinerie, toerusting en verwante dienste. Die oorblywende N$18,5 miljoen is na Namibië oorgeplaas vir die bou van die leerlooierygeboue en infrastruktuur. Plaaslike aandeelhouers (25) moes ’n verdere N$10 miljoen bydra om die aanleg uiteindelik in werking te stel. Net N$1 miljoen kon egter ingesamel word en wat die begin van die einde vir die looiery was al is dit amptelik in April 2002 geopen. Al is dit gebou om 10 000 velle per maand te kan verwerk, was dit voortdurend onbenut weens ’n gebrek aan insette en teen 2006 kon die looiery net tussen 8 000 en 15 000 velle ’n jaar verwerk. In 2016 het die regering ’n verdere N$60 miljoen belê om die aanleg weer aan die gang te probeer kry, maar teen 2020 was die looiery egter steeds in ’n vervalle toestand. In 2020 het NIDA ’n amptelike versoek geplaas vir die bestuur van die aanleg, nadat fondse wat die vorige jaar vir opknapping toegeken is, te min was om te verseker dat afdelings soos die werkswinkel sowel as die meganiese en elekriese bedrading voltooi word.Adami Doriano, Desert Planet Industries se uitvoerende hoof, is egter nou optimisties dat die looiery teen Maart of April volgende jaar weer in werking sal wees. Volgens Doriano sal daar aanvanklik 20 en later 30 werksgeleenthede geskep word. Die direkteur van DPI in Namibië, Sivhute Katamba, het op sy beurt gesê die Italianse skoenmakers beplan om uiteindelik ’n nuwe skoenfabriek en groter looiery by die aanleg te vestig. Doriano verwag dat die uitbreiding van die aanleg en verhoging van werksgeleenthede oor ’n tydperk van drie jaar verwesenlik sal word. Volgens hom sal jongmense voorkeur vir die werksgeleenthede geniet, aangesien hulle vinniger nuwe vaardighede kan aanleer.“Die finale projek is om die looiery met ’n skoenfabriek aan te vul om die verwerking van velle tot ’n finale produk moontlik te maak. Dit sal ’n baie belangrike projek wees wat ’n 1 000 werkers in diens het en 2 000 skoene per dag vervaardig.”Kliek hier vir ’n video van die ondertekening: q.my.na/I5HT

Italianers wil skoene maak op Ondangwa

Kommentaar

Republikein 2026-01-12

Meld asseblief aan om kommentaar te lewer

Italianers wil skoene maak op Ondangwa

Kommentaar

Republikein 2026-01-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.