‘Hoekom bly hulle in ons park?’

Henriette Lamprecht – “Waar kom hulle vandaan en hoekom kom bly hulle in ons park? Hulle het niemand gevra nie, sommige kom van Angola en het geen dokumente nie.” Volgens die voorsitter van die Bwabwata Omega 1-gemeenskapskomitee, Mushavanga Tieni, weet die plakkers in die nasionale park “nie hoe om in harmonie met die natuur te lewe nie”.“Om die grond skoon te maak, steek hulle alles aan die brand, al die bome word afgekap,” het Tieni gesê.Volgens hom is die San Khwe-gemeenskap van Omega 1 ontevrede, aangesien “ons diere weghardloop omdat die nuwe plakkers bly waar die diere veronderstel is om te wees. Ons het gebiede wat aan mense toegeken is, maar hulle [plakkers] bly sonder toestemming.” Die gemeenskap het ’n vreedsame optog in die Bwabwata Nasionale Park gehou uit protes teen onbeheerde onwettige besettings in die wildlewe-korridor. Sowat 250 gemeenskapslede het aan die 10 km-staptog deelgeneem, waarna ’n petisie aan die parkopsigter oorhandig is, wat dit namens die streekhoof in ontvangs geneem het. “Ons jaag nie die inwoners weg nie. Ons sê kom na waar ons bly en nie waar die diere is nie en werk saam met die reeds bestaande gemeenskap.”Tieni sê die Khwe word nie toegelaat om buite die grense te jag of kos te versamel nie, “anders word ons in hegtenis geneem of geskiet”.“Die rede waarom die polisie of die veldwagters niks doen nie, is omdat hulle betrokke is by die skoonmaak en omheining van die grond. Ons weet hulle het ’n stuk grond.”Bwabwata, wat in Kavango-Oos geleë is, is ’n beskermde gebied en bekend vir sy ryk biodiversiteit en kulturele belang. Dit is ook die tuiste van verskeie inheemse gemeenskappe, insluitend die San Khwe. Die afgelope maande is ’n toename waargeneem in onbeheerde en onwettige besettings binne die park se grense, wat lei tot kommer oor die bewaring van inheemse regte en ook die impak op die omgewing. Die San Khwe-gemeenskap het in die petisie ernstige kommer uitgespreek oor die minagting van die wette en regulasies wat die beskermde gebiede bestuur en het ’n beroep gedoen op ondersoeke en optrede om verdere vernietiging te keer. Die gemeenskap voel voorts hul regte, as inheemse inwoners met ’n historiese verbintenis tot die park, word nie voldoende erken en gerespekteer nie en het gevra vir die beskerming van hul kulturele erfenis en tradisionele lewensbestaan. Die groep het ook verwys na die gebrek aan insluiting by besluitnemingsprosesse wat met die bestuur van die park verband hou en wat reeds geruime tyd voortduur. In dié verband dring die San Khwe aan op ’n meer betekenisvolle en deelnemende konsultasieproses wat hul perspektiewe en behoeftes in ag neem. Parkowerhede het ontvangs van die petisie erken en moet binne 30 dae daarop reageer. Die gemeenskapskomitee beplan om ook die goewerneur van die streek oor die kwessie te besoek en ook die petisie aan die parlementêre staande komitee oor natuurlike hulpbronne te oorhandig. – henriette@republikein.com.na

‘Hoekom bly hulle in ons park?’

Kommentaar

Republikein 2025-11-03

Meld asseblief aan om kommentaar te lewer

‘Hoekom bly hulle in ons park?’

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.