Help bou ’n klaskamer

’n Gemeenskapstigting wat in 2013 op die been gebring is om kwesbare kinders en mense wat met MIV saamleef te ondersteun, het finansiële ondersteuning nodig om tydelike klaskamers vir 53 kinders in Babylon Village in Kavango-Oos op te rig. Sou die tydelike klaskamers nie spoedig opgerig word nie, bestaan die moontlikheid dat leerlinge die 2027-skooljaar kan misloop. Monika Alfred, stigter van die Heart of Hope Foundation, het aan Republikein gesê die organisasie het reeds grond by Ten Mile in Babylon Village vir die klaskamers bekom. Die geriewe moet 21 kleuters en 32 graad 0-leerlinge huisves wanneer skole aanstaande jaar, ná die Desember-vakansie, heropen.Volgens Alfred woon sommige gesinne ver van bestaande skole, wat dit vir jong kinders moeilik maak om toegang tot vroeë onderrig te kry. Onder diegene wat hulp nodig het, is ’n sewejarige wat nog nie met skool begin het nie – ’n situasie wat sy graag vir ander kinders wil voorkom.Die stigting is op soek na ondersteuning om twee tydelike klaskamers van sinkplate op te rig, asook drie tydelike toilette en ’n klein kantoor. Stoele, lessenaars, twee skryfborde, asook vier swaaie en ’n skaduryke area is nodig waar die kinders tydens pouses kan ontspan.“Dit is nie ’n permanente baksteengebou nie. Dis ’n tydelike sinkstruktuur wat 53 kinders in staat sal stel om met hul vroeë onderrig te begin,” het Alfred gesê.Die stigting se begroting vir die projek sluit in N$130 999 vir boumateriaal, N$32 000 vir arbeid, N$10 000 vir die vervoer van die materiaal na die perseel, N$10 070 vir stoele en N$7 200 vir lessenaars. Alfred het ’n beroep op individue en besighede gedoen om tot die projek by te dra – hetsy deur materiaal te skenk of deur verskaffers direk te betaal.“Enige hulp – of dit nou ’n sak sement, ’n stoel, ’n lessenaar, sinkplate of ’n geldelike bydrae is – sal ’n verskil maak,” het sy gesê. KWESBARE GEMEENSKAPPEAlfred het in 2013 die Heart of Hope Foundation in Kavango-Oos gestig om kwesbare kinders en mense wat met MIV saamleef en uit benadeelde gesinne kom, te ondersteun. Dié ondersteuning is deur middel van voedingsprogramme en hulp met onderwysverwante behoeftes.Alfred is ’n haarkapper op Rundu en vertel dat sy aanvanklik die inkomste uit haar besigheid gebruik het om kos vir behoeftige mense te koop. Dit was voordat haar jonger suster en ander gemeenskapslede by die inisiatief aangesluit het.“Ek sou klaar hare vleg, daardie bietjie geld neem en kos gaan koop om te kook vir mense uit arm gesinne wat met MIV saamleef en antiretrovirale (ARV)-behandeling ontvang, sowel as vir kinders wat in die strate van Rundu ronddwaal,” het sy gesê.Die stigting het voorheen twee maaltye per dag aan 47 pasiënte by die Ndama-kliniek en 64 kinders by sy sentrum in Sun City verskaf.Deur die jare het die stigting onder meer bystand van die Amerikaanse ambassade, die voormalige presidentsvrou Monica Geingos, ’n plaaslike private skool, asook Rent-A-Drum ontvang.Hierdie ondersteuning het die stigting in staat gestel om kos, skooluniforms, skryfbehoeftes en ander noodsaaklikhede aan kwesbare kinders te verskaf.Alfred vertel die stigting is voorheen vanuit ’n tydelike skuiling van sinkplate, wat deur ’n plaaslike sakevrou geskenk is, bedryf. Volgens haar het gemeenskapslede egter later die struktuur afgebreek en die materiaal gebruik om ’n huis te bou. Dit het die stigting genoodsaak om voortaan vanaf ’n eiendom van die Alfred-gesin te werk.Alfred sê die verkryging van grond in die stigting se naam by Ten Mile het ’n geleentheid geskep om ’n toegewyde onderrigsentrum te vestig. Die stigting beskik egter steeds nie oor die nodige hulpbronne om die terrein vir die kinders se onderrig in te rig nie. “Ek is steeds net ’n haarkapper. Ek kan nie alleen bou nie,” het sy gesê.Alfred het ’n beroep op Namibiërs gedoen om kwesbare mense in hul gemeenskappe te ondersteun en het beklemtoon gesamentlike pogings kan ’n verskil in hul lewens kan maak.“Geld behoort jou nie te keer om iemand anders te help nie; dit is jou hart, jou geduld en jou medelye wat die weg baan om ’n verskil te maak,” het sy gesê. – eliot@nmh-hub.com.na

Help bou ’n klaskamer

Kommentaar

Republikein 2026-10-23

Meld asseblief aan om kommentaar te lewer

Help bou ’n klaskamer

Kommentaar

Republikein 2026-10-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.