Havana se ‘doodloopstraat’

Stad Windhoek kry die wind van voor in sy pogings om die vierrigtingkruising in die Havana-woonbuurt te voltooi, met families wat in die omgewing woon, wat weier om te trek.

Dit het Vrydag aan die lig gekom toe die parlementêre staande komitee oor stedelike en landelike ontwikkeling en grondhervorming die Havana-padbouprojek besoek het. Die doel was om ter plaats uit te vind waarom die betrokke kruising steeds erg deur swaar verkeer geraak word en waarom die bouprojek sloer.

Munisipale amptenare het aan die komitee gesê die vertragings is nie uitsluitlik ’n konstruksieprobleem nie. ’n Groot struikelblok is die hervestiging van huishoudings uit gebiede wat vir padinfrastruktuur en beplande ontwikkelings geoormerk is.

Amptenare het gesê 98 van die 169 huishoudings wat vir hervestiging geïdentifiseer is, is tot dusver na Havana-uitbreiding 8 verskuif. Die munisipaliteit en die ontwikkelaar het volgens die amptenare probeer om weerstand teen die verskuiwings deur middel van gemeenskapsvergaderings en bewusmaking te ontlont. Tydens die vergaderings en gesprekke is planne vir ontwikkeling, reëlings vir hervestiging en die verwagte voordele wat dit vir die betrokke gemeenskappe sal inhou, met inwoners bespreek.

Ten spyte van dié pogings is 71 van die 169 huishoudings wat vir verskuiwing geïdentifiseer is, steeds nie verskuif nie. Dit het nou die punt bereik waar die munisipaliteit die regsroete volg om die vereiste gebiede vir ontwikkeling beskikbaar te stel, ná pogings om vrywillige hervestiging te verseker.

Die munisipaliteit beoog om N$110 miljoen in Havana-uitbreiding 8 en ’n verdere N$62 miljoen in Uitbreiding 11 te belê. Die gesamentlike ontwikkelingsprogram van N$172 miljoen sluit gronddienste in wat vir 2026 en 2027 beplan word.

Die planne sal na verwagting die weg vir die konstruksie van 425 laekoste-behuisingseenhede gedurende die 2027- en 2028-boekjaar baan.

Volgens amptenare beteken dit dat die geskil oor hervestiging nie bloot daaroor gaan om ruimte vir ’n pad te skep nie. Die beskikbaarheid van die vereiste grond hou verband met ’n veel breër program vir die voorsiening van gronddienste en die ontwikkeling van laekostebehuising in Havana.

FRUSTRASIE

Vir motoriste wat deur die Havana-vierrigtingkruising beweeg, is die onmiddellike probleem die verkeer.

Die munisipaliteit kan verkeersbeamptes van die stadspolisie ontplooi om te help om die kruising te bestuur en orde te handhaaf, maar amptenare het erken dat dié ingryping slegs tydelike verligting sou bied.

Nog ’n stok in die wiel van die voorgestelde ontwikkeling is informele handelaars wat langs die pad hul ware verkoop. Handelaars wat langs die padreserwe sake doen, vrees dat hulle kliënte sal verloor as hulle weg van hul bestaande ligging geneem word. Die munisipaliteit het egter gesê dié handelaars maak nie deel uit van die huishoudings wat vir hervestiging geoormerk is nie.

Die plan is om die informele handelaars tydelik op ’n nabygeleë ligging te huisves, terwyl die Monte Christo-gemeenskapsmark gebou word. Die permanente mark word naby die hoofpad beplan, wat handelaars in staat sal stel om toegang tot hul kliënte te behou sodra die geriewe voltooi is. Tans belemmer dié handelaars se bedrywighede egter konstruksiewerk en dra by tot vertragings.

Munisipale amptenare het dit duidelik gestel dat die nodige ruimtes beskikbaar gestel moet word, voordat die pad en die gepaardgaande ontwikkelings kan voortgaan. 

Die besluit om die regsroete te volg, dui op ’n verskuiwing van pogings om die saak deur vrywillige hervestiging op te los, na formele maatreëls wat daarop gemik is om die oorblywende struikelblokke uit die weg te ruim.

Tydens Vrydag se besoek het komiteelede, saam met Windhoek se burgemeester, Sakarias Uunona, en senior amptenare, beide die padkonstruksieterrein en die hervestigingsgebiede in Uitbreidings 8 en 11 besoek.

Die parlementêre komitee sal nou oorweeg hoe dit die munisipaliteit kan help om die knelpunte wat die projek beïnvloed, aan te pak. – [email protected]