Gratis krag vir Hoachanas

“’n Totaal van 30 huishoudings op Hoachanas sal gedurende 2026 gratis elektrisiteitsaansluitings ontvang. Dit sal inwoners bevoordeel wat huise gebou het, maar nog nie aan die kragnetwerk gekoppel is nie.” Só het Kenneth Rheent van die Hoachanas-kinderfonds verlede week ná ’n gemeenskapsvergadering in die nedersetting se gemeenskapsaal gesê.Dié inisiatief is deel van die regering se pogings om lewensomstandighede in die nedersetting te verbeter.Die vergadering is deur die raadslid van die Mariental- landelike kiesafdeling en voorsitter van die Hardap-streekraad, Simon Kooper, aangebied. Die adjunkminister van binnelandse sake, immigrasie, veiligheid en sekuriteit, Edward Wambo, was teenwoordig, asook amptenare van die ministerie en die Hardap-streekraad.KRAGHoewel kragaansluitings deel gevorm het van groter ontwikkelingsplanne, was die hooffokus van die betrokkenheid burgerlike registrasie, met inwoners wat aangespoor is om hul dokumentasie te formaliseer.“Talle Namibiërs bly ongedokumenteer, wat hul toegang tot noodsaaklike dienste en geleenthede beperk,” het Rheent gesê.Hy het bygevoeg “gemeenskapslede is sterk aangemoedig om te verseker dat alle kinders by geboorte geregistreer word, geboortesertifikate betyds bekom word en sonder versuim vir volledige geboortesertifikate en nasionale identiteitsdokumente aansoek te doen”.Om toegang tot dienste te verbeter, het Rheent gesê dat “inwoners wat identiteitskaarte, volledige geboortesertifikate en ander nasionale dokumente benodig, aangemoedig word om hul behoeftes by die nedersettingskantoor te registreer, wat die ministerie van binnelandse sake in staat sal stel om maandelikse uitreikbesoeke aan Hoachanas af te lê”.Die ontwikkeling van infrastruktuur het ook ter sprake gekom, met Rheent wat gesê het dat “ineenskakelende plaveisel vanaf die polisiestasie tot by die nedersetting aangebring sal word, insluitend die bou van spoedhobbels om stofbesoedeling te verminder, openbare gesondheid te verbeter en padveiligheid te versterk, veral vir skoolkinders”.PAAIE EN WATEROor padopgraderings het hy gesê “die Hoachanas-Kalkrand-pad is as prioriteit no. 3 op die streek se ontwikkelingsagenda geïdentifiseer en sal na verwagting binne die volgende vyf jaar geteer word”. Dit terwyl ’n pad wat Hoachanas met die Intu Afrika-roete verbind, binne die volgende dekade opgegradeer sal word.Watersekerheid bly ’n kernbekommernis, met Rheent wat gesê het “die Hardap-streekraad het reeds begin om twee boorgate aan die hoofwaterreservoir te koppel, met beduidende vordering wat gemaak word om Hoachanas se wateruitdagings te takel”.JEUGDie jeug is ook aangemoedig om ’n aktiewe rol in ontwikkeling te speel. “Jongmense is aangemoedig om hulself in groepe te organiseer, te verseker dat hul dokumentasie in orde is en hulself so te posisioneer dat hulle voordeel uit toekomstige geleenthede kan trek,” het Rheent gesê.Hy het bygevoeg “die gemeenskapsvergadering was hoogs insiggewend, produktief en inspirerend, wat die regering se verbintenis toon om die lewensgehalte in Hoachanas deur dienslewering, infrastruktuurontwikkeling en jeugbemagtiging te verbeter”.Volgens Rheent het Kooper hom daartoe verbind “om sleutelministeries en ministers na Hoachanas te bring om ontwikkeling te bespoedig”.– elizabeth@nmh-hub.com.na

Gratis krag vir Hoachanas

Kommentaar

Republikein 2026-05-14

Meld asseblief aan om kommentaar te lewer

Gratis krag vir Hoachanas

Kommentaar

Republikein 2026-05-14

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.