GIPF verbind hom tot nog N$500 m. vir behuising

Die regering se pensioenfonds (GIPF) het ’n verdere N$500 miljoen vir behuisingsontwikkelings landswyd geoormerk.Die fonds sê egter beperkte toegang tot gedienste grond is steeds ’n groot struikelblok om die geld te belê en die land se groeiende behuisingstekort te takel.GIPF se algemene bestuurder vir beleggings, Immanuel Kadhila, het die bykomende toekenning tydens die amptelike oorhandiging van die Uitbreiding 16-behuisingsontwikkeling in Kuisebmond op Walvisbaai aangekondig.Die ontwikkeling is deur die pensioenfonds gefinansier en deur PAM Tree Investments en Fillemon Mbago Investment CC ontwikkel.Hy het gesê die GIPF-raad het verlede week die bykomende befondsing goedgekeur en aangedui die fonds is bereid om verdere hulpbronne aan behuisingsontwikkeling toe te wys, mits geskikte grond en ontwikkelingsgeleenthede beskikbaar is.“Ons raad het ’n verdere N$500 miljoen vir behuisingsontwikkeling oraloor die land toegewys,” het Kadhila gesê.Hy het egter gewaarsku die beskikbaarheid van beleggingskapitaal sou nie op sigself die behuisingskrisis oplos nie, veral nie terwyl ontwikkelaars steeds probleme ondervind om toegang tot grond te verkry nie.“Dit verg krag om daardie N$500 miljoen ten volle te belê. Daarom wil ons graag vir toegang tot grond vra sodat ons behuising vir die mense kan voorsien,” het Kadhila gesê.Hy het gesê Namibië se geraamde behuisingstekort het van ongeveer 80 000 huise in 2007 tot sowat 300 000 toegeneem, terwyl meer as 200 000 Namibiërs in informele nedersettings woon.Die stygende behuisingskoste is nog ’n bron van kommer, met Kadhila wat daarop gewys het dat ’n ordentlike huis in baie dele van die land nou meer as N$1,5 miljoen kos, wat huiseienaarskap buite die bereik van baie werkende mense plaas.“Dit plaas huiseienaarskap buite die bereik van baie werkende Namibiërs, veral diegene wat ’n lae- en middelinkomste ontvang. Daar is baie wat minder as N$2 000 per maand verdien. “Vir baie onderwysers, verpleegkundiges en ons mans en vroue in uniform – in wese ons lede – beteken dit, indien hierdie syfers so bly, dat hulle nooit in hul leeftyd ’n huis sal besit nie.”Kadhila het gesê GIPF se kernverantwoordelikheid bly die beveiliging van staatswerknemers se aftreespaargeld, hoewel sy posisie as langtermyn-institusionele belegger ook geleenthede bied om ekonomiese en maatskaplike ontwikkeling te ondersteun.“Dit help nie om lede te hê wat met baie geld aftree, maar geen huise het om in te woon of paaie waarop hulle met hul motors kan ry nie,” het hy gesê.BELê N$3,1 MILJARDOor die afgelope vyf jaar het GIPF ongeveer N$1,6 miljard in bekostigbare behuisingsontwikkelings en ’n verdere N$1,5 miljard in die finansiering van huislenings belê, wat sy gesamentlike belegging op hierdie twee gebiede op N$3,1 miljard te staan bring.Volgens Kadhila het dié beleggings bygedra tot die konstruksie van meer as 7 800 huise, terwyl meer as 5 900 wonings in dieselfde tydperk van dienste voorsien is.Die pensioenfonds se behuisingsbeleggings het residensiële ontwikkelings, gedienste grond en verwante infrastruktuur ingesluit, asook deelname aan die Königstein Affordable Housing Fund (KAHF), wat daarop fokus om behuising te verskaf wat binne die finansiële bereik van werkende Namibiërs val.“KAHF het reeds meer as 1 100 huise en eenhede landswyd voltooi, met die huidige portefeulje wat tussen 1 600 en 1 700 eenhede teiken.”Ten spyte van hierdie beleggings het Kadhila aangevoer die tekort aan gedienste grond en die bou van huise, algemeen bekend as topstrukture, is steeds van die grootste struikelblokke vir die uitbreiding van behuisingsvoorsiening.“Ons probleem in hierdie land is nie kapitaal nie. Ons probleem is gedienste grond en topstrukture. Buiten bestaande projekte het GIPF ’n breër pyplyn van tussen 5 000 en 10 000 huise geïdentifiseer wat hy oraloor Namibië wil ondersteun.”Hy het beklemtoon die pensioenfonds kan nie die land se behuisingstekort takel sonder groter samewerking van die regering, plaaslike owerhede, ontwikkelaars, fondsbestuurders, finansierders en ander institusionele beleggers nie.Kadhila het gesê plaaslike owerhede speel ’n belangrike rol om grond beskikbaar te stel en behuisingsontwikkelings binne hul jurisdiksie te fasiliteer, terwyl die private sektor en ander beleggers bykomende finansiering moet bydra.“Ons kan nie ontwikkelings binne die plaaslike owerhede se gebied onderneem nie, terwyl dit eintlik hulle is wat die leiding met daardie ontwikkelings behoort te neem.“Hulle [plaaslike owerhede] het aan boord gekom. Ons het vennote in die vorm van plaaslike owerhede nodig. Ons het vennote in die vorm van ontwikkelaars nodig. Ons het vennote in die vorm van fondsbestuurder nodig. Maar die belangrikste, dit behoort dit nie net GIPF se geld te wees nie. Dit behoort almal se geld te wees.”– leandrea@nmh-hub.com.na

GIPF verbind hom tot nog N$500 m. vir behuising

Kommentaar

Republikein 2026-10-15

Meld asseblief aan om kommentaar te lewer

GIPF verbind hom tot nog N$500 m. vir behuising

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.