‘Gesondheid vir almal’ op pad
Huidige stelsel moet verbeter
Die finansiering vir Universele Gesondheidsdekking en -sorg kan verkry word uit bestaande bronne soos die begroting, gebruikersfooie en die staat se mediese fonds.
Henriette Lamprecht
Die proses om Universele Gesondheidsdekking en –sorg (UHC) in Namibië ’n werklikheid te maak, is op koers.
“Laat dit die tyd en die ruimte gegee word wat dit verdien om die proses te voltooi.”
Dr. Kalumbi Shangula, minister van gesondheid en maatskaplike dienste, het in die Nasionale Vergadering (NV) gesê die kritieke elemente van UHC is die toegang tot en bekostigbaarheid en gehalte van dienste.
Volgens hom is die ministerie se huidige pogings om dit te verbeter, reeds in plek om sodoende na UHC te vorder.
“Met verwysing na toegang tot, bekostigbaarheid en gehalte van gesondheidsdienste wat die basis van UHC is, voldoen Namibië reeds aan die vereistes.”
Shangula sê finansiering kan verkry word uit die verskillende finansieringsmodaliteite wat in die land bestaan. Dit sluit beskikbare finansiële hulpbronne van gebruikersfooie, regeringsbegroting vir gesondheid, sowel as die mediese fonds vir staatsamptenare en politieke ampsdraers in.
Finansiering gaan egter ook nodig wees vir die bou van nuwe gesondheidsgeriewe, die opgradering van bestaande geriewe, aankoop van nuwe generasie mediese toerusting, die opleiding en werwing van bykomende menslike hulpbronne, sowel as die voorsiening van medisyne en kliniese voorraad.
’n Span rolspelers uit die openbare, private en burgerlike samelewing het in Junie vergader om met die ondersteuning van ’n konsultant van die Wêreldgesondheidsorganisasie (WHO) voor te berei vir die hersiening van die Noodsaaklike gesondheidsdienstepakket.
Veldbesoeke en data-insameling om die 2014 Distrik Gesondheidspakket te evalueer, is vir middel-Julie geskeduleer.
Volgens Shangula is verskeie landswye konsultasies oor die beleid ook in die pyplyn.
“Gegewe die langtermynpogings en uiteenlopenheid van rolspelers wat tot die agenda van UHC gaan bydra, volg die ministerie ’n fasebenadering om dialoog oor die ontwikkeling van die beleid te bestuur.”
Die ministerie het in 2018-’19 ’n konsepplan ontwikkel vir ’n Universele Gesondheidsdekkingbeleid wat die hoofstrategieë uiteensit om universele gesondheidsdekking in Namibië te bereik. Die fokus is op twee sleuteldoelwitte, gebaseer op die riglyne van beskikbaarheid, toeganklikheid, gelykheid, bekostigbaarheid en gehalte in die voorsiening van noodsaaklike dienste.
Dit sluit in die verbetering van die gesondheidstelsel en om finansiële struikelblokke vir toegang tot gesondheidsdienste te verminder.
Die beleid is egter nie gefinaliseer nie weens veranderinge in die plaaslike en globale omgewing. Dit sluit die aanvang van die Covid-19-pandemie in wat die kontinuïteit van noodsaaklike dienste negatief geraak en gelei het tot die inkrimping van die globale ekonomie wat op sy beurt besteding op gesondheid beïnvloed het.
“Die gesondheidstelsel in Namibië dra steeds die gevolge van die skok wat die pandemie veroorsaak het, asook die las van ander oordraagbare en nieoordraagbare siektes,” het hy gesê.
Hy het erken die breër uitdagings tot die gesondheidstelsel duur voort wat tot die lewering van substandaard dienste lei.
Die kabinet het reeds die padkaart vir die ontwikkeling van UHC in die land goedgekeur, sowel as die struktuur wat die weg sal baan vir die bevordering van die deelname van verskeie rolspelers sowel as nasionale beraadslaging.
Die regeringstruktuur wat die ontwikkeling van die beleid sal bestuur, bestaan uit ’n kabinetskomitee oor openbare diens, ’n tegniese raadgewende komitee, verskeie werksgroepe en ’n tegniese komitee vir die ontwikkeling en implementering van die beleid.
– [email protected]
Die proses om Universele Gesondheidsdekking en –sorg (UHC) in Namibië ’n werklikheid te maak, is op koers.
“Laat dit die tyd en die ruimte gegee word wat dit verdien om die proses te voltooi.”
Dr. Kalumbi Shangula, minister van gesondheid en maatskaplike dienste, het in die Nasionale Vergadering (NV) gesê die kritieke elemente van UHC is die toegang tot en bekostigbaarheid en gehalte van dienste.
Volgens hom is die ministerie se huidige pogings om dit te verbeter, reeds in plek om sodoende na UHC te vorder.
“Met verwysing na toegang tot, bekostigbaarheid en gehalte van gesondheidsdienste wat die basis van UHC is, voldoen Namibië reeds aan die vereistes.”
Shangula sê finansiering kan verkry word uit die verskillende finansieringsmodaliteite wat in die land bestaan. Dit sluit beskikbare finansiële hulpbronne van gebruikersfooie, regeringsbegroting vir gesondheid, sowel as die mediese fonds vir staatsamptenare en politieke ampsdraers in.
Finansiering gaan egter ook nodig wees vir die bou van nuwe gesondheidsgeriewe, die opgradering van bestaande geriewe, aankoop van nuwe generasie mediese toerusting, die opleiding en werwing van bykomende menslike hulpbronne, sowel as die voorsiening van medisyne en kliniese voorraad.
’n Span rolspelers uit die openbare, private en burgerlike samelewing het in Junie vergader om met die ondersteuning van ’n konsultant van die Wêreldgesondheidsorganisasie (WHO) voor te berei vir die hersiening van die Noodsaaklike gesondheidsdienstepakket.
Veldbesoeke en data-insameling om die 2014 Distrik Gesondheidspakket te evalueer, is vir middel-Julie geskeduleer.
Volgens Shangula is verskeie landswye konsultasies oor die beleid ook in die pyplyn.
“Gegewe die langtermynpogings en uiteenlopenheid van rolspelers wat tot die agenda van UHC gaan bydra, volg die ministerie ’n fasebenadering om dialoog oor die ontwikkeling van die beleid te bestuur.”
Die ministerie het in 2018-’19 ’n konsepplan ontwikkel vir ’n Universele Gesondheidsdekkingbeleid wat die hoofstrategieë uiteensit om universele gesondheidsdekking in Namibië te bereik. Die fokus is op twee sleuteldoelwitte, gebaseer op die riglyne van beskikbaarheid, toeganklikheid, gelykheid, bekostigbaarheid en gehalte in die voorsiening van noodsaaklike dienste.
Dit sluit in die verbetering van die gesondheidstelsel en om finansiële struikelblokke vir toegang tot gesondheidsdienste te verminder.
Die beleid is egter nie gefinaliseer nie weens veranderinge in die plaaslike en globale omgewing. Dit sluit die aanvang van die Covid-19-pandemie in wat die kontinuïteit van noodsaaklike dienste negatief geraak en gelei het tot die inkrimping van die globale ekonomie wat op sy beurt besteding op gesondheid beïnvloed het.
“Die gesondheidstelsel in Namibië dra steeds die gevolge van die skok wat die pandemie veroorsaak het, asook die las van ander oordraagbare en nieoordraagbare siektes,” het hy gesê.
Hy het erken die breër uitdagings tot die gesondheidstelsel duur voort wat tot die lewering van substandaard dienste lei.
Die kabinet het reeds die padkaart vir die ontwikkeling van UHC in die land goedgekeur, sowel as die struktuur wat die weg sal baan vir die bevordering van die deelname van verskeie rolspelers sowel as nasionale beraadslaging.
Die regeringstruktuur wat die ontwikkeling van die beleid sal bestuur, bestaan uit ’n kabinetskomitee oor openbare diens, ’n tegniese raadgewende komitee, verskeie werksgroepe en ’n tegniese komitee vir die ontwikkeling en implementering van die beleid.
– [email protected]
Kommentaar
Republikein
Geen kommentaar is op hierdie artikel gelaat nie