Geen skuldigbevindings in 224 sake van dieremishandeling

Die Dierebeskermingsvereniging van Namibië (DBV) meen die verouderde wet en skamele boete van N$200 vir dieremishandelaars faal diere.Dieremishandeling bly ’n nimmereindigende krisis in Namibië, met 224 sake wat tot dusver vanjaar aangemeld is, maar nie tot een enkele skuldigbevinding gelei het nie. Die nasionale direkteur van DBV Namibië, Silke van der Merwe, het aan Republikein gesê die probleem van wreedheid teenoor diere vererger.“Wreedheid bly ’n ernstige en voortdurende probleem in Namibië. Dit lyk of daar oor die jare ’n geringe toename is, maar dit kan ook wees weens beter data en meer aanmeldings. “Die eerlike antwoord is dat die probleem nie krimp nie en baie sake word steeds nie aangemeld nie, veral buite die groter dorpe,” het sy gesê.Oor sewe takke heen versorg die DBV tans ongeveer 600 diere met skuilings wat op of bo hul kapasiteit moet funksioneer. Die Windhoek-tak alleen het in Oktober 410 diere ingeneem.Van der Merwe het gesê verwaarlosing is die mees algemene vorm van dieremishandeling soos diere sonder kos, skoon water, skuiling, skaduwee of veeartsenykundige sorg. Die vasmaak van honde aan kort kettings in die son is tweede, gevolg deur uithongering van vee en die slaan van werkdiere, vergiftiging, verlating, hondediefstal en ’n toename in hondegevegte.Die meeste aanmeldings van sake kom uit Windhoek, Walvisbaai, Otjiwarongo en Oshana, nie omdat wreedheid daar erger is nie, maar sy het aangedui dit is omdat inspekteurs daar gesetel is.Sy het ook bevestig Namibië het net vier inspekteurs vir meer as 820 000 vierkante kilometer: Twee in Windhoek en een elk op Otjiwarongo en Oshakati.“Dit is nie genoeg nie. Verskeie van ons takke het geen toegewyde inspekteur nie en die grootste deel van die land, veral landelike en noordelike streke, het geensins DBV-teenwoordigheid nie,” het Van der Merwe gesê.Selfs wanneer sake aangemeld word, dien die verouderde wet nie juis as ’n groot afskrikmiddel nie. Namibië steun steeds op die Wet op Dierebeskerming 71 van 1962, met ’n maksimum boete van ongeveer N$200 wat nog nooit vir inflasie bygewerk is nie.“Dit is minder as die koste van een sak hondekos. Geen dieremishandelingsaak is ooit suksesvol in die hof beveg nie,” het Van der Merwe gesê.DBV-data vir 2024-’25 toon dat die meeste sake opgelos is deur onderrig en waarskuwings, of deur die dier in sorg te neem. Slegs een tot drie strafsake is by die Namibiese polisie geopen en “nul het tot vervolging of skuldigbevinding gelei”.Sy sê die gaping tussen aanmeldings en skuldigbevindings is die duidelikste teken van hoe swak die huidige wet is.Befondsing bly die DBV se grootste uitdaging. Die organisasie ontvang geen gereelde staatsbefondsing nie en steun volledig op skenkings, fondsinsamelings en aannemingsfooie, terwyl veeartsenykoste, kos en brandstof aanhou styg.Die DBV-hoof het bygevoeg inspekteurs kan uitstekende werk aan ’n saak kan doen, maar sonder betekenisvolle strawwe is daar min wat herhaalde oortreders afskrik.Die DBV doen ’n beroep op die parlement om die lankverwagte wetsontwerp op dierebeskerming en -welsyn te aanvaar vir die polisie om wreedheid as ’n werklike misdaad te hanteer. Dit geld ook vir munisipaliteite om verordeninge af te dwing en bekostigbare sterilisasieveldtogte te ondersteun. Dit wil ook hê dat Stad Windhoek vir DBV Windhoek moet vergoed vir hul dienste om honde te konfiskeer wat ’n munisipale mandaat is ingevolge die Wet op Plaaslike Owerhede van 1992.Die publiek kan wreedheid teenoor diere by 081 124 4520 of by hul naaste DBV-tak aanmeld, of via http://www.spcawindhoek.org.na met die presiese ligging en foto’s indien dit veilig is. ’n Van der Merwe het bevestig sosialemediaplasings alleen sal nie tot ’n ondersoek lei nie.Sy het dieremishandelaars gewaarsku dat die dier in hul sorg volkome van hulle afhanklik is, en pyn en vrees voel. “As jy sukkel, vra vir hulp by die DBV, maar as jy vir wreedheid kies, ons sal op elke aanmelding reageer en ons sal ’n strafsaak open.”– loise@nmh-hub.com.na

Geen skuldigbevindings in 224 sake van dieremishandeling

Kommentaar

Republikein 2026-10-29

Meld asseblief aan om kommentaar te lewer

Geen skuldigbevindings in 224 sake van dieremishandeling

Kommentaar

Republikein 2026-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.