Geen betaling, geen water

’n Totaal van 753 besighede op Okahandja se munisipale rekeninge is tans agterstallig. Dié syfer is deel van ’n opdrag van die ministerie van landelike en stedelike ontwikkeling aan plaaslike owerhede om die watertoevoer na besighede en regeringsinstellings af te sny, sou hulle versuim om hul uitstaande rekeninge te vereffen. Minister Sankwasa James Sankwasa se opdrag het ten doel om munisipaliteite se invordering van inkomste te versterk deur hulle te dwing om teen kliënte met agterstallige rekeninge op te tree.Inligting wat in die verband deur die munisipaliteit van Okahandja verskaf is, dui egter daarop dat net ’n beperkte aantal besigheidsrekeninge uiteindelik binne die omvang van die opdrag geval het.Volgens die munisipaliteit is die meerderheid van die rekeninge wat geïdentifiseer is, reeds afgesny voordat die ministeriële opdrag uitgereik is.Ander het weer verband gehou met onaktiewe besighede wat hul bedrywighede gestaak of hul persele ontruim het, insolvente entiteite, leë erwe, of rekeninge wat steeds onder dispuut is of op administratiewe terugvoer van die munisipaliteit gewag het.Dié rekeninge word steeds ooreenkomstig die munisipaliteit se beleid vir kredietbeheer- en skuldinvordering bestuur, met verskeie agterstallige rekeninge wat by die Information Trust Corporation (ITC) gelys is as deel van voortgesette pogings om skuld in te vorder.Wat regeringsinstellings betref, het slegs ses instellings op die betrokke tydstip binne die mandaat van die ministeriële opdrag geval en wel met ’n gesamentlike uitstaande balans van sowat N$1,3 miljoen. Volgens die munisipaliteit het die ministerie van werke en vervoer, die ministerie van verdediging en veteranesake en die regbank op Sankwasa se opdrag gereageer deur met die plaaslike owerheid oor hul uitstaande rekeninge in gesprek te tree. Dit het daartoe gelei dat die meerderheid van die betrokke rekeninge se munisipale skuld vereffen is. Die munisipaliteit het egter nie bekend gemaak hoeveel besighede of regeringsinstellings hul uitstaande rekeninge – sedert die opdrag uitgereik is – vereffen het nie. Sommige regeringsinstellings se rekeninge is steeds in die rooi. Die munisipale rekeninge van die ministeries van onderwys, vernuwing, jeug, sport, kuns en kultuur, asook binnelandse sake, immigrasie, veiligheid en sekuriteit, is reeds opgeskort terwyl toekennings vir betalings geverifieer en geskille opgelos word. Munisipale rekeninge wat aan die ministerie van gesondheid en maatskaplike dienste verbind is, insluitend dié vir hospitale en klinieke, is egter weens operasionele vereistes en in oorheersende openbare belang van die proses uitgesluit. Volgens die munisipaliteit bestuur hy tans 9 460 aktiewe rekeninge, bestaande uit 8 593 formele rekeninge en 867 rekeninge in informele nedersettings. Hoewel Sankwasa se opdrag pogings versterk het om landswye munisipaliteite se invordering van inkomste te verbeter, is die implementering daarvan grootliks beïnvloed deur die wetlike en administratiewe stand van individuele rekeninge. Volgens die munisipaliteit het hy die aantal besighede en staatsinstellings beperk wat uiteindelik die gevaar geloop het dat hul watertoevoer weens uitstaande rekeninge afgesny sou word. – aurelia@nmh-hub.com.na

Geen betaling, geen water

Kommentaar

Republikein 2026-07-21

Meld asseblief aan om kommentaar te lewer

Geen betaling, geen water

Kommentaar

Republikein 2026-07-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.