Fishrot-prokureurs ontvang glo geld van MTC
N$1,29 miljard glo uit operateur se rekening oorgeplaas
Die fondse is na bewering uit die MTC-hoofrekening na 'n spesifieke ontvanger oorbetaal.
Brigitte Weidlich - Die selfoonoperateur MTC het na bewering N$1,29 miljard herlei om prokureurs te betaal wat beskuldigdes in die verhoor van die Fishrot-korrupsieskandaal verdedig.
Die voorsitter van die Landless People Movement (LPM)-party, Bernadus Swartbooi, het Woensdag vrae aan die minister van finansies en staatsondernemings, Iipumbu Shiimi, in die parlement gestel oor die beweerde oordrag van N$1,29 miljard. Die fondse is na bewering uit die MTC-hoofrekening na ’n spesifieke ontvanger oorbetaal.
Volgens Swartbooi is die geld na bewering vir die regskoste van beskuldigdes.
“’n Stelseladministrateur het die oordrag ontdek, wat ’n duidelike teken is dat fondse van ’n staatsmaatskappy onwettig gebruik word en ook dui op moontlike geldwassery,” het Swartbooi gesê.
“Is dit by die Teenkorrupsiekommissie aangemeld? Dit gaan immers oor ’n groot bedrag,” het die LPM-leier gesê.
Hy wou ook by Shiimi weet hoe dit kan wees dat ’n staatsonderneming betrokke kan wees by die finansiering van regsuitgawes vir hooggeplaastes.
“Of is jy bewus daarvan dat sulke aktiwiteite plaasgevind het?” wou Swartbooi weet. Hy het ook die minister van finansies gevra of hy kan duidelikheid gee of geen belastinggeld van staatsondernemings wat onder die ministerie val, vir die Fishrot-geding en ander hofsake waar hooggeplaaste staatsamptenare betrokke is, gebruik is en nog steeds gebruik mag word nie.
MTC ONTKEN AANTYGINGS
MTC het Woensdagaand die aantygings ontken.
MTC se hoof van menslike kapitaal, korporatiewe sake en bemarkingsbeampte, Tim Ekandjo, het Swartbooi se bewerings as “ongegrond en kwaadwillig” afgemaak.
Ekandjo het in ’n mediaverklaring gesê die telekommunikasiediensverskaffer is “heeltemal geskok en ontsteld oor hierdie valse en misleidende bewerings”.
Volgens Ekandjo is die maatskappy al meer as 27 jaar in Namibië bedrywig en het hy altyd die hoogste standaarde van integriteit en professionaliteit gehandhaaf. “Daar is absoluut geen waarheid aan die bewering nie,” het Ekandjo gesê.
Volgens ingeligte bronne is Swartbooi se vrae na bewering gegrond op inligting dat hierdie bedrag in werklikheid van ’n MTC-rekening na een of ’n paar begunstigdes se rekeninge oorgeplaas is sodat die geld na bewering gebruik kan word om die prokureurs van die beskuldigdes in die Fishrot-korrupsieskandaal te betaal. Die Namibiese Prokureursorde het egter nog nie kommentaar oor die aangeleentheid gelewer nie. – [email protected]
Die voorsitter van die Landless People Movement (LPM)-party, Bernadus Swartbooi, het Woensdag vrae aan die minister van finansies en staatsondernemings, Iipumbu Shiimi, in die parlement gestel oor die beweerde oordrag van N$1,29 miljard. Die fondse is na bewering uit die MTC-hoofrekening na ’n spesifieke ontvanger oorbetaal.
Volgens Swartbooi is die geld na bewering vir die regskoste van beskuldigdes.
“’n Stelseladministrateur het die oordrag ontdek, wat ’n duidelike teken is dat fondse van ’n staatsmaatskappy onwettig gebruik word en ook dui op moontlike geldwassery,” het Swartbooi gesê.
“Is dit by die Teenkorrupsiekommissie aangemeld? Dit gaan immers oor ’n groot bedrag,” het die LPM-leier gesê.
Hy wou ook by Shiimi weet hoe dit kan wees dat ’n staatsonderneming betrokke kan wees by die finansiering van regsuitgawes vir hooggeplaastes.
“Of is jy bewus daarvan dat sulke aktiwiteite plaasgevind het?” wou Swartbooi weet. Hy het ook die minister van finansies gevra of hy kan duidelikheid gee of geen belastinggeld van staatsondernemings wat onder die ministerie val, vir die Fishrot-geding en ander hofsake waar hooggeplaaste staatsamptenare betrokke is, gebruik is en nog steeds gebruik mag word nie.
MTC ONTKEN AANTYGINGS
MTC het Woensdagaand die aantygings ontken.
MTC se hoof van menslike kapitaal, korporatiewe sake en bemarkingsbeampte, Tim Ekandjo, het Swartbooi se bewerings as “ongegrond en kwaadwillig” afgemaak.
Ekandjo het in ’n mediaverklaring gesê die telekommunikasiediensverskaffer is “heeltemal geskok en ontsteld oor hierdie valse en misleidende bewerings”.
Volgens Ekandjo is die maatskappy al meer as 27 jaar in Namibië bedrywig en het hy altyd die hoogste standaarde van integriteit en professionaliteit gehandhaaf. “Daar is absoluut geen waarheid aan die bewering nie,” het Ekandjo gesê.
Volgens ingeligte bronne is Swartbooi se vrae na bewering gegrond op inligting dat hierdie bedrag in werklikheid van ’n MTC-rekening na een of ’n paar begunstigdes se rekeninge oorgeplaas is sodat die geld na bewering gebruik kan word om die prokureurs van die beskuldigdes in die Fishrot-korrupsieskandaal te betaal. Die Namibiese Prokureursorde het egter nog nie kommentaar oor die aangeleentheid gelewer nie. – [email protected]
Kommentaar
Republikein
Geen kommentaar is op hierdie artikel gelaat nie