#DokJan se ma’s

As jy al op ’n sloertoer saam met Republikein was, het jy beslis al met die koerant se gelukbringer #DokJan kennis gemaak wat saam klim as die wiele uit Windhoek rol.

#DokJan is ’n besige, bont verkleurmannetjie met reismiere – vernoem na dr. Jan Spies, die gewilde storieverteller en een van die medestigters van Die Republikein saam met Dirk Mudge op 1 Desember 1977 – en het vanjaar al van Walvisbaai se strandmeer, Swakopmund se pier en Okahandja se gewilde houtwerkmark tot die Outjo Wildsfees besoek.

#DokJan is die produk van Justine Gowases en Elfriede Tsaes, twee inspirerende en vlytige Damara-vroue op Khorixas wat deel is van ’n modeontwerpgroep wat binne ’n kwessie van twee jaar van werkloos tot ’n groep vaardige en suksesvolle jong vroue ontwikkel het wat hul produkte aan veral toeriste verkoop.

Die lekkerste produkte om te maak is die verkleurmannetjies, olifante en kameelperde, vertel Elfriede uit Khorixas. Sy en Justine is deel van ’n groep van vyf vroue wat hul passie in die ontwerp en maak van handwerk- en mode-items gevind het.

“Die groep het gevorm uit die gratis gemeenskapsopleiding wat Cosdef, die Namibiese stigting vir die ontwikkeling van vaardighede in gemeenskappe, aan ons en baie ander gebied het,” sê Elfriede.

Die opleiding het in 2016 begin en Cosdef mentor en ondersteun steeds die vroue.

Die inkomste wat Elfriede uit die verkoop van die handgemaakte speelgoed en klere genereer, help haar om haar huisrekeninge te betaal.

Buiten vir die ontwerp en maak van opvoedkundige speelgoed vir onder meer sentrums vir vroeë kinderontwikkeling (ECD’s) vir Palms for Life, maak hulle ook handpoppe en help om San-vroue by Tsintsabis op te lei.

Die groep vroue waarvan hulle deel is, was die eerste wat opleiding in modeontwerp deur Cosdef ontvang het, vertel Justine.

“Ons het toe verander na handwerk omdat ons in ’n toeristegebied bly en het verskillende opgestopte speelgoeddiere soos kameelperde, renosters en leeus gemaak. Cosdef op Swakopmund staan agter ons om ons produkte te ontwikkel,” sê sy.

Die inkomste help baie, maar hulle kry net ’n paar bestellings.

“Ons hoop die mediablootstelling sal help. Ons droom is om ’n kunsvlytsentrum op Khorixas oop te maak en ons het reeds met die dorpsraad gepraat om vir ons ’n ruimte daar te gee.”

Na afloop van opleiding in besigheid en naaldwerk deur die Oyetu-uitreikprojek, wat onder Cosdef val, het die vroue geleer om oorspronklike en baie gewilde produkte uit materiaal te maak.

’n Nuwe produklyn is ontwikkel gebaseer op die wildlewe in die gebied, wat opgestopte dierespeelgoed vir die toerismemark in die Kunenestreek insluit. Die groep vlytige vroue het nou ’n besigheid op die been gebring en verkoop hulle unieke, plaaslik-vervaardigde produkte aan toeriste deur dit aan kunsvlyt- en geskenkwinkels oraloor die land te bemark.

Oyetu beteken “ons s’n” in Oshiwambo en is ’n uitreikprogram vir vaardigheidsopleiding vir minderbevoorregte Namibiërs en handwerkers op die platteland. Die doel is om hulle potensiaal te verhoog om ’n inkomste te genereer deur opleiding en mentorskap vir die ontwikkeling, bemarking, etikettering en verpakking van hul produkte. Die opleiding sluit ook die ontwikkeling van beroepsgerigte- en sakevaardighede soos kosteberekening, die uitwerk van pryse en ook boekhouding in wat hulle in staat stel om ’n klein besigheid te begin.

Dit word geborg deur die Duitse organisasie Bread for the World en Oyetu lei een groep per streek oraloor Namibië op, met alle opleiding wat geborg word en opleidingsmateriaal wat verskaf word.

Die doel is dat deelnemers ’n klein onderneming op die been kan bring met die vaardighede waarmee hulle toegerus is om innoverende en nuwe ontwerpe vir produkte te skep.

– [email protected]