Burgemeester glo nie onder die prop

Bewerings van wangedrag het die munisipaliteit van Tsumeb geruk ná gerugte dat burgemeester Hofni Hamunyela ’n gemeenskapsvergadering bygewoon het terwyl hy glo onder die invloed van alkohol was.

Die voorval het na bewering Saterdag tydens ’n openbare byeenkoms by Nomtsoub plaasgevind. Inwoners wat die vergadering bygewoon het, het beweer dat die burgemeester dronk voorgekom het terwyl hy die publiek toegespreek het.

Die situasie het opslae op sosiale media veroorsaak, met inwoners wat teleurstelling uitgespreek het.

Een gemeenskapslid, Johannes John, het geskryf dat dit “oneerbiedig teenoor die kiesers” is om ’n “dronk raadslid” in ’n vergadering te hê en het gevra vir verantwoordbaarheid rakende munisipale leierskap.

‘VUIL POLITIEK’

Hamunyela het egter teen die bewerings teruggekap en dit as ’n smeerveldtog beskryf wat daarop gemik is om sy beeld te ruïneer.

In ’n onderhoud met Network Media Hub (NMH) het die burgemeester sy onskuld volgehou en die vingerwysers uitgedaag om bewyse te lewer.

“Ek was nie dronk nie. Ek was net moeg,” het Hamunyela gesê.

“Daar is geen bewyse dat ek dronk was nie – of dit nou ’n foto of ’n video is. Dis net mense wat vuil politiek speel.”

Hamunyela, wat onlangs die amp betree het, glo die bewerings word deur politieke mededingers opgemaak om sy werk te belemmer.

“Ek is nuut in die kantoor en mense begin reeds met vuil politiek. Hulle wil net my reputasie skaad. Ek is gefokus op die ontwikkeling van die dorp,” het hy bygevoeg.

INTERNE WRYWING

Ten spyte van die burgemeester se ontkenning, dui bronne binne die raad daarop dat die bewerings nie net van die publiek afkomstig is nie.

Mederaadslede wat tydens die vergadering langs Hamunyela gesit het, het glo beweer dat hy na alkohol geruik het. Die erns van die beskuldigings het tot ’n hoëvlak-ingryping gelei.

NMH het verneem dat die streekleierskap van Swakop, gelei deur streekkoördineerder van Oshikoto, Armas Amukwiyu, na Tsumeb gereis het om die saak te ondersoek.

Nadat ’n ondersoek gedoen is, het die partyleierskap bevind dat daar geen “wetenskaplike bewyse soos ’n asemtoets of mediese verslag was om te bevestig dat die burgemeester toe dronk was nie”.

Omdat die bewerings uitsluitlik op ooggetuieverslae en “reuk” staatmaak, het die leierskap tot die gevolgtrekking gekom dat die saak nie bewys kon word nie.

Gevolglik is die saak amptelik ter ruste gelê en geen dissiplinêre stappe sal teen die burgemeester geneem word nie.

– [email protected]