Bouraad wink weer

Die Federasie vir die Konstruksiebedrywe van Namibië (CIF) het die vordering verwelkom wat gemaak is met die vestiging van ’n bouraad vir die land se konstruksiebedryf.Dit volg nadat die minister van werke en vervoer, Veikko Nekundi, gesê het die langverwagte wetsontwerp vir die konstruksiebedryf sal binnekort aan die kabinet voorgelê word.Nekundi het gereageer op ’n vraag wat deur parlementslid Justina Jonas – die voormalige sekretaris-generaal van die Metaal- en Verwante Werkersunie van Namibië (Manwu) – in die parlement gestel is.Volgens Bärbel Kirchner, uitvoerende hoof van CIF, het CIF en Manwu reeds lank gesamentlik vir die instelling van die Namibiese Konstruksieraad gepleit.“Die federasie is verheug hierdie langlopende inisiatief maak weer vordering en hoop dit sal tot ’n spoedige voorlegging aan Namibië se parlement lei,” sê sy.Sy waarsku egter teen vertragings uit die verlede en leë beloftes. “’n Vroeëre wetsontwerp het die Nasionale Vergadering tydens die ampstermyn van die voormalige minister Erkki Nghimtina in 2010 bereik.“Tydens die beraad vir ekonomiese groei in 2019 het die regering onderneem om teen die einde van die 2019-’20-boekjaar ’n bouraad te vestig. “Voormalige eerste minister Saara Kuugongelwa-Amadhila het ook in die parlement gesê ’n konstruksieraad sou gestig word om die plaaslike bedryf te ondersteun,” het Kirchner beklemtoon.Sy noem die goeie werk wat die voormalige minister van werke en vervoer, Sankwasa James Sankwasa, gedoen het deur uitgebreide konsultasies te voer en ’n hersiene wetsontwerp teen 2022 aan die kabinetskomitee oor wetgewing – onder die voorsitterskap van minister John Mutorwa, met Nekundi as sy adjunk – voor te lê.“Oor die jare het ons aansienlike steun van ministers binne ons lynministerie ontvang en ons hoop minister Nekundi sal die nodige ondersteuning kry en dat die wetsontwerp nou die nodige steun sal verseker om die proses te voltooi. “’n Bouraad sou ook groter deursigtigheid by die toekenning van kontrakte bevorder en ’n duideliker beoordeling van kontrakteurs se kapasiteit moontlik maak. “Groter deursigtigheid is in openbare belang en behoort ’n rede te wees om die raad in te stel en nooit as ’n rede om dit te vertraag nie,” sê sy.Vorige weergawes van die wetsontwerp vir die instelling van die bouraad het onder meer voorsiening gemaak vir die registrasie van konstruksie-ondernemings, kategorisering om te verseker dat maatskappye by die omvang van projekte pas, vaardigheidsontwikkeling en ’n ontwikkelingsprogram vir plaaslike kontrakteurs ter ondersteuning van kleinsakeondernemings.Volgens die CIF kan registrasie by die raad onmiddellik begin – terwyl die raad nog ingestel word – tesame met vaardigheidsontwikkeling vir tegniese, toesighoudende en senior beamptes.“Die federasie versoek die jongste konsepwetsontwerp vóór die indiening daarvan, ’n duidelike implementeringskedule, asook voortgesette betrokkenheid by die ontwikkelingsprogram,” volgens Kirchner.– augetto@nmh-hub.com.na

Bouraad wink weer

Kommentaar

Republikein 2026-10-29

Meld asseblief aan om kommentaar te lewer

Bouraad wink weer

Kommentaar

Republikein 2026-10-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.