Boere sit steeds sonder water

Die kanaal wat water vanaf die ou Berg Aukas-myn na die Omatakodam vervoer, is sedert verlede Vrydag droog en talle boere langs die kanaal is raadop.Peter Mutschler sê NamWater het hom in kennis gestel dat dit weens ’n tegniese probleem is.“Hulle het geen verdere inligting verskaf of gesê wanneer die water terug sal kom nie. Ek is nie heeltemal so afhanklik van die water soos ander boere nie, omdat ek ’n boorgat het. Ek gebruik ook NamWater, maar ek is vir nou oukei,” het hy gesê.Hy sê jare gelede het NamWater klomp boorgate in die berge by Uitkoms geboor en het dié water in die kanaal gepomp.“Toe het hulle ’n pyplyn na Berg Aukas gelei en nou pomp hulle die water uit die ou myn. Boere kan die water ingevolge ’n ooreenkoms met hulle gebruik. Daar is ’n toevoerpunt met ’n watermeter waar hulle water kry en dan betaal hulle vir die water.”Nog ’n boer Petrus Ndume is heeltemal afhanklik van die kanaal se water.“Ek boer met beeste, skape en bokke en ons het verlede Vrydag soos mal hoenders rondgehardloop toe die water opgedroog het. My neef is ’n grootkop by die weermagbasis en hy het vir ons ’n tenk water gegee. NamWater het Woensdag ’n 500 liter-tenk met water hier kom aflaai,” het Ndume gesê.Hy sê daar is twee pompe by Berg Aukas waarvan die een verlede jaar gebreek het.“NamWater het dit nooit herstel nie en nou het die ander een ook gebreek. Nou sit hulle met twee stukkende pompe en ons sonder water.”Die boer Piet Smit ry daagliks water vir sy diere uit Grootfontein aan.“Ons het nie baie diere nie, maar dit ruk nog steeds ons sak. Ons moet nou munisipale water koop, die tenks om die water te vervoer en natuurlik die brandstof.”Hy het ook gesê hy ontvang geen terugvoer of inligting van NamWater nie.“Ons bel en bel en hulle tel nie eens hul fone op nie. Vir die boere is dit ’n ramp, veral vir diegene wat heeltemal van die kanaalwater afhanklik is en wat in die kommunale gebiede is.”Smit is die voorsitter van die Upper Swakop Basin Management Committee, wat ook na Windhoek se watervoorsiening kyk.“Een van die korttermyn-projekte was om die volume water van Berg Aukas en Abenab te verhoog om Windhoek van meer water te voorsien.“Nou is die kanaal kurkdroog en soos ek gehoor het, is die pompe nooit eens geïnstalleer nie, en niemand sê iets nie. So selfs die korttermyn-plan wat Windhoek se waterkrisis moes takel, is nie geïmplementeer nie.”Sam Kriel wat hoofsaaklik perde op sy plot het, is ook heeltemal van die kanaal afhanklik.“Ek ry water uit die dorp aan vir my perde en my werkers. Die perde drink 1 000 liter per dag, so ek ry maar aan.NamWater het teen druktyd nog nie op navrae gereageer nie.HARDAPUit die Suide het Dawie de Klerk, die voorsitter van die Hardap Boerevereniging, bevestig dat die Hardapdam tans 18,9% vol is.“Dit beteken alle boere kan tot en met die einde van Maart ten volle – dit wil sê op 100%-kapasiteit – besproei. Dan behoort die dam so ongeveer 6% water oor te hê, wat genoeg water vir etlike jare vir die dorp en almal in die omgewing is. Dit is slegs as daar geen invloei die reënseisoen is nie. Ons reënseisoen lê nog voor – dit begin die laaste week in Januarie en duur tot in April.”Volgens hom het dit nog nooit in die geskiedenis gebeur dat die dam twee jaar agtereenvolgend geen invloei gehad het nie.“Dit sal die eerste keer wees want verlede jaar het hy nie water ingekry nie, so ek is vol moed dat die dam dié jaar water sal kry.”Hy sê almal is bekommerd en dit gaan nie net oor die dam nie, dit gaan oor die hele land.“As hierdie land nie dié jaar reën kry nie gaan dit ’n astronomiese fiasko wees– nie net vir Hardap nie – maar landswyd. Vir nou is daar egter geen probleem nie.”– tanja@republikein.com.na

Boere sit steeds sonder water

Kommentaar

Republikein 2026-02-03

Meld asseblief aan om kommentaar te lewer

Boere sit steeds sonder water

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.