Beursstudente kan nie klas bywoon

Mediese studente in Zambië wat deur die Namibiese regering ondersteun word, sê hulle is uit hul klasse gedwing en verkeer onder toenemende druk weens vertragings in die betaling van hul klasgelde, wat hul studies ontwrig.

Studente het op voorwaarde van anonimiteit met Network Media Hub (NMH) gepraat en gesê die situasie sleep nou in sy tweede week voort. Universiteite het volgens die studente opdrag gegee dat hulle van klasse moet wegbly totdat hul uitstaande klasgelde vereffen is.  

“Ons het verlede jaar in Julie hier aangekom, maar tot op hede is ons klasgelde nog nie betaal nie,” het die groep studente gesê.

“Hoewel die regering sê die betaling word verwerk, het die universiteit nog geen betaling ontvang nie. Gevolglik is ons aangegesê om huis toe te gaan totdat die klasgelde vereffen is,” sê die groep.

Volgens die studente sluit die groep 22 studente aan die Gideon Robert-universiteit en agt aan die Levy Mwanawasa Mediese Universiteit in. Die studente is in Zambië as deel van ’n drie jaar lange Namibiese beursprogram.

Sommige van die toelaes aan die groep is onlangs betaal, maar die studente het nie die bedrag bekend gemaak nie. Hulle sê egter dat die kernkwessie van onbetaalde klasgelde steeds onopgelos bly. 

“Terwyl ons praat, is ons tuis en woon nie klasse by nie. Vir mediese studente om twee weke van onderrig mis te loop, is ’n ernstige terugslag,” het hulle gesê en beklemtoon dat die onsekerheid ’n geestelike tol eis. 

“Dit is baie stresvol, want ons het hierheen gekom om te studeer, maar nou wag ons net.”

Daar word verwag dat die groep later vandeesmaand met belangrike deurlopende assesserings sal begin.

Korrespondensie wat deur NMH gesien is, wys dat die ministerie van gesondheid en maatskaplike dienste die betaling wel verwerk het. Die volgende stappe lê by die ministerie van finansies, die Bank of Namibia en die Namibiese ambassade voordat fondse die universiteite bereik.

Die ministerie het na bewering ook aan die instellings geskryf en versoek dat studente toegelaat word om klasse by te woon terwyl betalingsprosesse gefinaliseer word, hoewel geen presiese betaaldatum verskaf is nie.

Die ministerie se hoofbeampte vir gesondheidsprogramme, Andreas Shaanika, het by navraag gesê amptenare is reeds in gesprek met studenteverteenwoordigers.

“Ons het selfs ’n brief geskryf en met die studente deur hul verteenwoordiger gekommunikeer,” het hy gesê sonder om enige verdere besonderhede te verskaf. 

Walter Kamaya, die ministerie se woordvoerder, het op sy beurt gesê amptenare evalueer die situasie. Volgens hom is daar teenstrydighede in die aantal geraakte studente wat aangemeld is. 

“Dit is teenstrydig met wat ek meegedeel is – ek is meegedeel dat daar net vyf studente was,” het Kamaya gesê.

“Ons reageer nie vinnig met verkeerde inligting nie. Ons wil hê ons feite moet reg wees,” het hy gesê.

SPREEK KOMMER UIT

Intussen het die Nasionale Afrika Studentevereniging (Nasa) kommer uitgespreek oor die vertragings.

In ’n verklaring wat Dinsdag uitgereik is, het die vereniging se akademiese sekretaris, Abel Miguel, gesê geraakte studente sukkel om klasgeld, verblyf en basiese behoeftes te dek.

“Die welstand van ons studente moet ’n nasionale prioriteit bly,” het hy gesê en ’n beroep op die ministerie van gesondheid gedoen om dringend uitstaande fondse vry te stel en duidelike tydlyne te verskaf.

NMH het ook kommentaar van die ministerie van finansies gevra, maar geen reaksie is teen druktyd ontvang nie. – [email protected]