Aanlyn vervoerdienste in hoofstad ‘ongemagtig’

Openbare vervoer in Namibië se hoofstad is vir menigte ’n groot kopseer.Volgens terugvoering van ’n besoek deur Swakopmund se plaaslike owerheid om Windhoek se oplossings vir openbare vervoerkwessies te bestudeer, worstel die hoofstad se munisipale busdiens om tred te hou met die aanvraag.Swakopmund se bevindinge is verlede week tydens dié dorpsraad se spesiale vergadering op 26 Junie bekend gemaak.Ten spyte van Windhoek se volhoubare stedelike vervoermeesterplan (SUTMP) wat busse ter waarde van N$3,4 miljoen elk op die hoofstad se paaie gebring het, het operasionele uitdagings dié diens die afgelope paar jaar gekniehalter. Swakopmund se besoek het aan die lig gebring dat slegs 22 van Windhoek se totale busvloot van 56 tans in werkende toestand is en volgens die verslag het “hierdie verminderde kapasiteit ’n groot impak op die betroubaarheid van die diens en die passasiersvertroue daarin”.Die Windhoek-busdiens ry ook net tussen sekere woon-, kommersiële en nywerheidsgebiede, en slegs gedurende spitstye, met geen diens oor naweke of na werksure nie, is verder bevind.Windhoek het reeds in 2011 ’n uitvoerbaarheidstudie uitgevoer om openbare vervoer in die hoofstad te probeer verbeter, en met finansiering van Duitsland, is die studie in 2012 voltooi. ’n Twintigjaarplan is ontwikkel, teen ’n geraamde koste van meer as N$700 miljoen, met N$59 miljoen wat reeds aan die studies en aanvanklike implementering bestee is.Intussen het die inkomste wat deur Windhoek se busdiens gegenereer word, van ’n jaarlikse inkomste van N$17,6 miljoen in 2013-14 tot slegs N$1,05 miljoen vir die 2022-23-boekjaar gedaal.Van 3,31 miljoen passasiers per jaar het die gebruik van die busdiens in die hoofstad tot slegs 59 444 passasiers jaarliks afgeneem, volgens die Swakopmund-besoekers se bevindinge. Die besoekers is egter ingelig dat studente, pensioenarisse en huishulpe steeds die busdiens verkies, volgens hul terugvoering.Op navraag het die Windhoek-munisipaliteit gesê hulle het tussen 25 en 30 werkende busse, wat 30 roetes oor sewe lyne tussen 05:30 en 17:30 van Maandag tot Saterdag bedien, en dat 102 106 kliënte dié diens in Mei gebruik het. Volgens die Windhoek-munisipaliteit se woordvoerder, Lydia Amutenya, voldoen bestaande bus- en taxidienste nie aan die groeiende aanvraag na openbare vervoer in Windhoek nie, veral gedurende spitstye. Sy het bevestig dat die munisipaliteit alle openbare vervoer binne sy grense reguleer en toestemming daarvoor moet verleen.Afgesien van busse, reik die Windhoek-munisipaliteit permitte vir minibusse, pendeldienste, sleepdienste en taxidiensverskaffers in die hoofstad uit.Verder kon die stadspolisie bevestig dat daar tans meer as 7 000 taxilisensies op die stelsel geregistreer is, met 363 registrasiesertifikate wat verval het of hernu moet word.Daar is ook verskeie aanlyn dienste in gebruik in die hoofstad, waardeur kliënte saamrygeleenthede kan bespreek teen betaling. CoW sê egter dat hierdie dienste, soos die gewilde Yango-, InDriver-, Dail-a-Cab- en Lefa-handelsmerke, onwettig binne die munisipale gebied bedryf word.“Hulle moet magtiging van die stadsraad verkry om wettiglik binne Windhoek te bedryf. Tans is hierdie operateurs nie deur die raad gemagtig nie en hul bedrywighede word as ongemagtig beskou.“CoW het konsultasieprosesse van stapel gestuur om belanghebbendes in die bedryf te betrek en hulle te lei oor die toepaslike prosedures en voldoeningsvereistes,” het Amutenya uitgebrei.Die Windhoek-stadspolisie kan boetes van tot N$1 000 uitreik, beslag lê op die betrokke voertuie, of regstappe teen verskaffers van hierdie tipe dienste instel, voeg sy by.Intussen nader Windhoek se bevolking vinnig die halfmiljoen-kerf en die behoefte om bekostigbaar van plek tot plek in die hoofstad te kan beweeg, word dringender, aangesien armoede groot dele van die bevolking binne hul woongebiede vasvang.Dit alles skep die agtergrond vir Donderdag 10 Julie se stedelike mobiliteitskonferensie, wat deur die munisipaliteit by die Windhoek Buitekluboord aangebied word.CoW belowe dat sleutelrolspelers van die regering, die private sektor, ontwikkelingsagentskappe, akademie en burgerlike organisasies sal saamkom om oor inklusiewe, doeltreffende en volhoubare vervoerstelsels te besin. – augetto@nmh-hub.com.na

Aanlyn vervoerdienste in hoofstad ‘ongemagtig’

Kommentaar

Republikein 2026-03-26

Meld asseblief aan om kommentaar te lewer

Aanlyn vervoerdienste in hoofstad ‘ongemagtig’

Kommentaar

Republikein 2026-03-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.