65% sonder seep en water

Elizabeth Kheibes

Namibië het elke jaar meer as 184 000 gevalle van diarree en 719 kinders onder die ouderdom van vyf verloor hul lewens aan voorkombare siektes.

Dit is te wyte aan slegs 45% van huishoudings wat toegang tot handwasgeriewe en seep het, volgens die Verenigde Nasies se Kinderfonds (Unicef).

Unicef het ’n waarskuwing uitgereik oor die stand van handewashigiëne in Namibië en aangedui dat minder as die helfte van die land se huishoudings toegang het tot basiese handewasgeriewe met seep, ’n tekort wat elke jaar honderde jong lewens eis.

Unicef se verteenwoordiger in Namibië, Samuel Kweku Ocran het gister tydens die viering van Wêreldhandwasdag in Windhoek die situasie as ’n dringende oproep tot optrede beskryf en alle sektore van die samelewing aangepor om dringende stappe te doen om higiëne-infrastruktuur en onderwys te verbeter.

Ocran het beklemtoon dat die gevolge van swak higiëne verder strek as openbare gesondheid en gesê dit eis ’n erge tol op die ekonomie. “Elke jaar verloor Namibië meer as N$3,8 miljard weens onvoldoende infrastruktuur” met verwysing na water-, sanitasie- en higiëne-infrastruktuur (Wash). “Dit is ’n verlies wat ons eenvoudig nie kan bekostig nie, veral wanneer die oplossings binne bereik is.”

Die verteenwoordiger het ook ernstige leemtes in Namibië se skool-infrastruktuur uitgelig. Volgens hom het altesaam 224 skole (10% van alle skole), steeds nie toegang tot behoorlike sanitasiegeriewe nie en 101 skole (5% van alle skole), het geen drinkwater nie.

“Hierdie toestande plaas nie net ons kinders se gesondheid in gevaar nie, maar belemmer ook hul vermoë om te leer en te floreer.”

Hy het aangedui dat wêreldwyd ongeveer 2,3 miljard mense, byna drie uit tien, steeds nie toegang tot seep en water by die huis het nie, terwyl 462 miljoen leerlinge skole sonder basiese higiënegeriewe bywoon.

“Skoon hande is een van ons sterkste verdedigings teen infeksies en siektes. Ons kan nie toelaat dat hierdie voorkombare tragedies voortduur nie.”

Ocran het Unicef se vennootskap met plaaslike owerhede herbevestig om toegang tot Wash-dienste uit te brei. “Ons voortgesette vennootskap met Stad Windhoek en die dorpsrade van Oniipa en Rundu om sanitasie-inisiatiewe uit te rol, sal laekoste- en klimaatsbestande Wash-geriewe aan gemeenskappe beskikbaar stel,” het hy verduidelik.

HANDWASHELDE

Vanjaar se Wêreldhandwasdag, wat jaarliks ​​op 15 Oktober gevier word, se tema is “Wees ’n Handwasheld.” Die veldtog moedig individue, gemeenskappe en leiers aan om persoonlike verantwoordelikheid te neem om goeie higiënepraktyke te bevorder.

“Hierdie tema nooi ons almal, vriende, bure, gemeenskapsleiers en openbare amptenare, uit om op te tree en leierskap te neem in die bevordering van handwas,” het Ocran gesê.

Ndeshihafela Larandja, burgemeester van Windhoek, het die stad se dekade lange verbintenis tot gesondheids- en higiënebevordering beklemtoon.

“Hierdie Oktober herdenk Windhoek in samewerking met ons belanghebbendes, met trots Gesondheids- en Higiënebevorderingsmaand,” het Larandja gesê. Sy het beklemtoon dat die tema burgers bemagtig om persoonlike verantwoordelikheid vir hul gesondheid en dié van hul gemeenskappe te neem.

Larandja het ook verskeie maatreëls uiteengesit van higiënebevordering in informele markte en skole, tot inspeksies van voedselverkopers en openbare geriewe, alles daarop gemik om die nakoming van gesondheidstandaarde te verbeter.

“Herhalende uitbrekings van siektes soos diarree, die onlangse ervarings met Covid-19, en voortdurende bedreigings soos hepatitis E, beklemtoon die kritieke noodsaaklikheid van ywerige higiënepraktyke,” het sy gesê.

- [email protected]