Hoop en glimlagte vir kinders

Omne Jesus Guzman Acevedo het die omneGospel Uitreikprogram van stapel gestuur nadat hy die daaglikse stryd van kinders in die Havana-gemeenskap in Windhoek aanskou het, met talle wat sonder kos, sorg en betekenisvolle mentorskap moes klaarkom.

Deur deernis en geloof in God se transformerende liefde, was pastoor Omne se missie om in die lewens van die mees kwesbares te belê – een daad van barmhartigheid op ’n slag.

“Elke kind verdien hoop en die kans om in ’n veilige en koesterende omgewing groot te word,” het pastoor Omne gesê.

LEWENSFILOSOFIE

Hierdie lewensfilosofie lei die organisasie vandag nog.

Tans word die uitreikprogram deur ’n toegewyde span van sewe vrywilligers bedryf, wat elkeen hul tyd, vaardighede en energie tot die missie bydra.

Van die nederige begin in ’n huis in Havana, het die organisasie gegroei en na Okahandja en Otjinene uitgebrei. Vanuit toegewyde sentrums word gestruktureerde aktiwiteite, maaltye en geestelike en emosionele ondersteuningsdienste aan die kinders gebied word. 

Planne is reeds aan die gang om die sentrums na landelike gebiede uit te brei, sodat meer kinders by die program en bykomende weeklikse aktiwiteite kan baat.

“Ek wil ’n beroep op regeringsowerhede en individue doen om ons te help om die las wat gemeenskappe in nood dra, te verlig deur arm gesinne met basiese onderhoud en onderwyskoste te ondersteun,” het Volly James, die waarnemende direkteur van die omneGospel Uitreikprogram, gesê.

AKADEMIE, VAARDIGHEDE 

James het verklaar dat die ondersteuning jongmense in staat sal stel om hul akademiese pad sonder onderbreking voort te sit, waardevolle vaardighede te ontwikkel en hul vermoë te versterk om in die toekoms ’n blywende en positiewe bydrae tot die land se ekonomie te lewer.

In die vroeë dae het die program beduidende struikelblokke in die gesig gestaar. Befondsing was skaars en betrokkenheid van die gemeenskap was aanvanklik swak, aangesien gesinne onder die druk van daaglikse oorlewing gesukkel het. 

Tog het die program deur geloof, volharding en ondersteuning van die gemeenskap bly voortbestaan en stadigaan ’n fondament van vertroue en hoop binne die gemeenskap opgebou.

Hy beskryf die vroeë werk as “’n belegging van liefde”, gegrond in die oortuiging dat ’n klein begin ’n groot impak kan hê. 

Vandag bedien die program gemiddeld 100 kinders elke Saterdag in Windhoek en Okahandja en bied voedsame maaltye, mentorskap en ’n veilige ruimte vir betrokkenheid en bemoediging. 

Elke jaar hou die omneGospel Uitreikprogram ’n grootskaalse gemeenskapsfunksie op Okahandja, wat byna 1 000 kinders in feesviering, vreugde en vriendskap byeenbring .

Ten spyte van sy groei, is die program steeds op eksterne ondersteuning aangewese. Skenkings is nodig om die geriewe uit te brei en op te gradeer, veiligheid vir kinders te verbeter en die voedings- en sorgprogramme te versterk. 

Vrywillige werkers met ’n passie vir mentorskap, administrasie en gemeenskapswerk is altyd welkom, net soos skenkings van kos en ondersteuning vir bedryfskoste soos onder meer water en elektrisiteit.

Hierdie bydraes help om te verseker dat elke kind die sorg en voeding ontvang wat hulle verdien, benewens die weeklikse maaltyd op Saterdae.

Terwyl die omneGospel Uitreikprogram aanhou uitbrei, bly sy boodskap eenvoudig: Deur geloof, liefde en die betrokkenheid van die gemeenskap kan elke kind ’n blinker toekoms beleef. 

Die organisasie verwelkom ondersteuners, vennote en vrywillige werkers om by hierdie lewensveranderende werk aan te sluit, sodat geen kind agtergelaat word nie – een maaltyd, een glimlag en een daad van barmhartigheid op ’n slag.

– [email protected]