Kwesbare jeug ondersteun

Die minister van geslagsgelykheid en kinderwelsyn, Emma Kantema, het die regering se verbintenis herbevestig om kinderwelsyn te versterk deur doelgerigte ondersteuningsprogramme wat op kwesbare kinders gemik is.

Kantema het hierdie opmerkings gemaak tydens ’n besoek aan die Nasionale Jeugdiens (NYC) se opleidingsentrum op Hentiesbaai, waar meer as 80 tieners wat tans op straat leef en werk, ’n vyf weke lange rehabilitasie- en herintegrasieprogram bywoon.

In haar toespraak het die minister die belangrikheid beklemtoon om kinders se welsyn eerste te stel. Sy het daarop gewys dat die regering voortgaan om inisiatiewe uit te voer wat onderwys ondersteun, toegang tot gesondheidsorg verbeter, voeding bevorder en psigososiale dienste verskaf.

“Ek wil julle gerusstel dat die regering in Namibië se jongmense glo. Dit gee ons groot vreugde om te sien hoe jongmense geleenthede kry om produktiewe burgers te word,” het sy gesê.

Die ministerie het in vennootskap met die NYC, onlangs ’n omvattende vyf week lange proef-opleidingsprogram van stapel gestuur wat ontwerp is om kinders wat op straat leef en werk te rehabiliteer en weer in samelewing te laat inskakel.

Die inisiatief is die eerste van sy soort in Namibië.

MAATSKAPLIKE WERKERS

Die program word gesamentlik deur die ministerie se maatskaplike werkers en NYC-instrukteurs geïmplementeer en kombineer praktiese opleiding met psigososiale ondersteuning.

Dit huisves tans meer as 80 kinders tussen 12 en 18 jaar, afkomstig uit die streke van Hardap, Khomas, Erongo, Otjozondjupa en Omaheke.

Deelnemers aan die program ontvang opleiding met fokus op dissipline, patriotisme, vrywillige werk en basiese landbouvaardighede, tesame met psigoterapeutiese dienste wat daarop gemik is om die emosionele en sielkundige uitdagings wat hulle in die gesig staar, aan te pak.

Kantema het beklemtoon dat die inisiatief deel vorm van breër regeringspogings om te verseker dat elke kind – veral dié uit kwesbare gemeenskappe – toegang het tot geleenthede wat hul fisieke, emosionele en intellektuele ontwikkeling ondersteun.

Sy het verder opgemerk dat sulke programme noodsaaklik is om hul waardigheid te herstel, lewensvaardighede op te bou en kinders in staat te stel om suksesvol weer in die samelewing te integreer.

Die regering het sy verbintenis herhaal om soortgelyke inisiatiewe landswyd uit te brei as deel van sy voortgesette pogings om die regte en welsyn van alle kinders in Namibië te beskerm.

– [email protected]