TransNamib moet Vrydag sê oor ongelukke

Die minister van werke en vervoer, Veikko Nekundi, het die TransNamib-raad opdrag gegee om sy interne proses oor twee treinongelukke teen Vrydag af te handel. Sy opdrag volg nadat hy die raad gekritiseer het vir vertragings in die hantering van die saak.“Ek het met hulle gepraat; hulle het eenvoudig op hul pos geslaap. Dankie dat jy my aan die saak herinner het. Ek het nou aan die voorsitter opdrag gegee om die interne proses teen Vrydag af te handel,” het Nekundi Maandag aan Republikein gesê.Die minister se opdrag volg op ondersoeke na die botsing by die Swakoprivierbrug in Januarie 2025, asook die ontsporing van ’n Rovos Rail-passasierstrein in Maart vanjaar, waarin twee treindrywers, Namibiër Richard Wimmerth (49) van TransNamib en Suid-Afrikaner Hendrik du Plessis (55) van Rovos Rail hul lewens verloor het.Nekundi het die raad reeds op 22 Junie opdrag gegee om gepaste stappe na aanleiding van die ondersoeke te neem en om binne 14 dae terugvoer te gee. Dit is drie maande later steeds nie gedoen nie.Die minister het gesê die raad het hom ingelig verkrygingsprosesse duur te lank. Volgens Nekundi het die twee partye wel met mekaar gekommunikeer.Hy het ook bevestig hy is bewus van dissiplinêre prosedures teen ’n TransNamib-bestuurder in die Suide, wat glo vrygespreek is.“Ek is deeglik bewus daarvan; dit is juis daarom dat ek die raad opdrag gegee het om die saak te hanteer, aangesien ek glo dat die bestuur op een of ander manier ’n botsende belang het,” het hy gesê.In sy brief van 22 Junie aan die raad het Nekundi gesê die ondersoek na die ontsporing van die Rovos Rail het bevind die trein het op die betrokke gedeelte gery sonder voorafkennisgewing oor die swak toestand van die spoorlyn.“Die afwesigheid van patrollering, wat direk verband hou met ’n gebrek aan kommunikasie, was die vernaamste bydraende faktor tot die ongeluk,” het hy gesê. Wat die botsing by die Swakoprivierbrug betref, het die minister gesê die bevindinge dui op nalatigheid deur personeel, sowel as tekortkominge ten opsigte van inspeksies en kommunikasie.“In die lig van die kwessies wat uit die ondersoekverslag na vore gekom het – waaronder beduidende bevindinge – kan dit grootliks toegeskryf word aan nalatigheid deur personeellede van TransNamib,” het Nekundi gesê. UITVOERENDE HOOF’n Vertroulike voorlegging aan die TransNamib-raad beveel dissiplinêre stappe teen die uitvoerende hoof, Desmond van Jaarsveld, en ander bestuurders in verband met die twee treinongelukke aan. Volgens die voorlegging moet verantwoordelikheid nie by die operasionele personeel eindig nie. Die voorlegging, gedateer 15 Julie 2026 en deur Republikein gesien, doen ’n beroep op die raad om te ondersoek of mislukkings van uitvoerende bestuur bygedra het tot die botsing by die Swakoprivierbrug in Januarie 2025 en die noodlottige Rovos Rail-ontsporing in Maart vanjaar naby Naute in die Suide. Die uitvoerende hoof vir menslike kapitaal, Webster Gonzo, het die verslag geskryf waarin swakpunte by die maatskappy geïdentifiseer word.“Die bewyse wat in die ondersoekverslae bekend gemaak is, toon dat die ontsporing nie bloot die gevolg van individuele operasionele foute was nie. Dit weerspieël oënskynlike mislukkings van uitvoerende leierskap, bestuur, risikobestuur en organisatoriese toesig,” het Gonzo geskryf.Hy het gesê die ongeluk weerspieël breër mislukkings in leierskap en toesig, eerder as bloot individuele operasionele foute.“Waar sistemiese mislukkings bydra tot die verlies van lewens, kan aanspreeklikheid nie by die ingenieursdepartement stop nie. Dit moet strek tot elke vlak van bestuur wie se besluite, versuim of mislukkings die onveilige toestande wat tot die tragedie gelei het, moontlik geskep of toegelaat het,” het hy geskryf.Gonzo het aanbeveel dat dissiplinêre stappe teen TransNamib se uitvoerende hoof en ander betrokke lede van die uitvoerende bestuur ingestel word.“Dit is wetlik gepas en in ooreenstemming met die beginsels van goeie bestuur dat dissiplinêre stappe teen die uitvoerende hoof en alle betrokke lede van die uitvoerende bestuur ingestel word, met verantwoordelikheid wat bepaal moet word deur ’n onafhanklike en prosedureel billike dissiplinêre proses,” het hy geskryf.Die verslag bevraagteken of voldoende finansiële en menslike hulpbronne aan spoorwegveiligheid toegeken is en of die bestuur opgetree het.“Wat die groot belegging betref wat die afgelope twee jaar in die maatskappy gemaak is – watter deel daarvan is opsygesit of aangewend om die maatskappy se operasionele veiligheid te verbeter?” het Gonzo gevra.Hy het verder beweer dat die terrein van die noodlottige ontsporing van die Rovos Raiul reeds binne TransNamib as ’n gevaarsone bekend was weens vorige verspoelings, maar dat geen doeltreffende herstelwerk gedoen is nie.Gonzo het gesê gevestigde prosedures vereis fisiese inspeksies van kwesbare spoorlyngedeeltes voordat treine toegelaat word om voort te ry, veral na reënval.Toe hy om kommentaar gevra is, het Van Jaarsveld Maandag meer tyd versoek. Die voorsitter van die raad, Esther McLeod, het nie gereageer nie, en haar adjunk, Gilroy Kasper, het Republikein na die maatskappysekretaris verwys.BOTSING’n Botsing in Januarie 2025 by die spoorwegbrug oor die Swakoprivier het ook onder die loep gekom in Gonzo se verslag. Daarin word gevra of werknemers wat verantwoordelik is vir vraginspeksies en treinbedrywighede, ter verantwoording geroep is.Die trein het uit Walvisbaai met ’n gemengde vrag vertrek wat 13 gelaaide brandstoftenkwaens, agt vraghouers en ander vrag ingesluit het.Die ondersoek het bevind dat sommige vraghouers die brug se toegelate hoogte oorskry het, wat daartoe gelei het dat tien brandstoftenkwaens en drie vraghouers beskadig is.Agt brandstoftenkwaens het gelek en is deur kliënte weens veiligheidsoorwegings verwerp.Gonzo het gesê die voorval het ernstige oortredings van gevestigde spoorwegprosedures blootgelê en aangevoer dissiplinêre stappe teen diegene wat verantwoordelik is, was onvoldoende.“Daar is ook ’n lang lys van groot oortredings van lank gevestigde spoorwegprotokolle waarvoor geen dissiplinêre of baie min dissiplinêre stappe tot op hede teen die oortreders geneem is nie,” het hy geskryf.Die verslag het die vervoer- en waensafdeling, wat onder die ingenieursdepartement val, gekritiseer en gesê dit het nie sy pligte nagekom het nie.“Ten spyte van al die bogenoemde, is dit egter duidelik dat die afdeling, wat onder die ingenieursdepartement val, in die eerste plek nie hul pligte so pligsgetrou uitgevoer het as wat hulle kon nie en dissiplinêre stappe dus geneem moes word,” het Gonzo geskryf.“Dit maak die uitvoerende beampte en sy bestuurspan ook aanspreeklik,” het hy geskryf. – sonja@nmh-hub.com.na

TransNamib moet Vrydag sê oor ongelukke

Kommentaar

Republikein 2026-10-28

Meld asseblief aan om kommentaar te lewer

TransNamib moet Vrydag sê oor ongelukke

Kommentaar

Republikein 2026-10-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.