Swerm voëls voor vliegtuig neerstort

Voor die vliegtuig van die bekende ortopediese chirurg van Oshakati, dr. Andreas Voigt (63), neergestort het, het hy probeer om ’n botsing met ’n swerm voëls te vermy.Voigt en sy vrou was die enigste insittendes in sy private vliegtuig, ’n Tecnam P-2004 Bravo met die registrasiemerk V5-UTD, wat omstreeks 12:56 op 8 Februarie naby Okahao in die Omusatistreek geval het.Die voorlopige vliegtuigongelukverslag van die direktoraat van vliegtuigongelukke (DAAII) in die ministerie van werke en vervoer, is Vrydag deur die waarnemende direkteur, Hafeni Mweshixwa, uitgereik. Voigt, ’n Duitse burger, was ongedeerd, maar sy vrou het ’n geringe rugbesering opgedoen en die vliegtuig het aansienlike skade gely.Volgens die verslag het Voigt ten tyde van die ongeluk meer as 454 uur op vliegtuie gevlieg, waarvan 367 uur op hierdie vliegtuig gevlieg is.“Die egpaar het omstreeks 11:52 vanaf die Ondangwa-lughawe opgestyg met die doel om die aanloopbane van Okahao en Outapi te inspekteer om in die toekoms as alternatiewe vliegvelde te gebruik indien landing by Okahao nie moontlik is nie as gevolg van slegte weerstoestande of enige ander rede.”Daarna sou hulle weer op Ondangwa land, volgens die verslag. “Volgens die vlieënier was die vlug na Okahao sonder enige voorval en tot ongeveer 250 voet bo grondvlak gedaal waar hy links langs die aanloopbaan gevlieg het. Hy het die vliegtuig gekonfigureer vir landing teen 60 knope (alhoewel sy bedoeling nie was om te land nie).”Terwyl dr. Voigt inspeksie van die aanloopbaan gedoen het, het sy vrou hom glo gewaarsku oor ’n swerm voëls voor hom.“Om ’n voëlbotsing te vermy, het die vlieënier die vliegtuig laat begin klim en volgens hom, toe hy op die punt was om die flappe terug te trek, het die vlerke geruk en die vliegtuig het skielik links gekantel.” Hy het glo toe die vliegtuig onsuksesvol na regs probeer swenk, beheer daaroor verloor en die vliegtuig het langs die aanloopbaan neergestort.“Die vliegtuig het neus eerste ’n doringbos getref en die linkervlerk het op die grond gesleep voordat die vliegtuig tot stilstand gekom het. Die enjin het tydens die botsing met die doringbos gestop,” lui die verslag.“Volgens die vlieënier het hy toe die hoofskakelaar afgeskakel en die tenkkrane toegemaak voordat hy en sy passasier uit die vliegtuig geklim het. “’n Ooggetuie het ook verklaar dat sy die vlerke van die vliegtuig sien swenk het voordat dit neergestort het.” Sy het toe na die ongelukstoneel gejaag om hulp aan te bied en die egpaar reeds buite die vliegtuig gevind.DAAII is om 13:26 deur die vlieënier van die ongeluk in kennis gestel en ’n ondersoek is deur die ondersoekbeampte Ben Engelbrecht van stapel gestuur.SKADE AAN VLIEGTUIGDie vliegtuig is volgens die verslag aansienlik beskadig. “Die vliegtuig het skade aan die romp, beide die linker- en regtervlerke opgedoen, sowel as die neusgedeelte, insluitend die houtpropeller. Die onderstel is ook tydens die impak vernietig. Daar was geen ander skade nie.”Volgens DAAII is die laaste jaarlikse inspeksie wat op die vliegtuig uitgevoer is, op 29 September 2025 gesertifiseer. Die vliegtuig het ’n geldige spesiale vliegpermit (eksperimentele sertifikaat) met die vervaldatum 2 Oktober 2026.’n Volledige ondersoek is steeds aan die gang en ’n finale ongelukverslag sal na deeglike ontleding deur DAAII uitgereik word.– francoise@nmh.com.na

Swerm voëls voor vliegtuig neerstort

Kommentaar

Republikein 2026-04-27

Meld asseblief aan om kommentaar te lewer

Swerm voëls voor vliegtuig neerstort

Kommentaar

Republikein 2026-04-27

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.