Pionierspark-vliegramp: Enjins in Kanada ontleed

Die direktoraat van vliegtuigondersoeke (DAAII) in die ministerie van werke en vervoer, sê die twee enjins van die Cessna F406, wat Saterdag ’n jaar gelede in Pionierspark neergestort het, is na die vervaardiger in Kanada gestuur. Die enjins is uitmekaar gehaal en drie onderdele is vir verdere toetsing en ontleding geïdentifiseer. Twee van dié onderdele is reeds getoets met een se uitslae wat nog uitstaande is.Die ongeluk op 3 Mei 2024 het die lewens van die vlieënier Rozanne de Beer-Olivier (33), haar medevlieënier Ruan van Schalkwyk (24) en die vliegtuigingenieur Armand Lubbe (25) geëis.Hulle het die vliegtuig op ’n toetsvlug vanaf Eros-lughawe geneem nadat die regterenjin vervang is. Kort nadat die vliegtuig om 17:06 opgestyg het, het dit in die Pionierspark-woonbuurt neergestort. Geen burgerlikes is beseer toe die vliegtuig in die tuin van ’n huis tot stilstand gekom het nie. De Beer-Olivier het 4 450,4 vlugure in haar loopbaan aangeteken, waarvan meer as die helfte – 2 448,1 vlugure – aan boord ’n Cessna F406 was. Van Schalkwyk het slegs ’n jaar voor die noodlottige ongeluk by WestAir aangesluit en het in sy loopbaan 345,4 vlugure aangeteken, waarvan 72 ure aan boord hierdie tipe vliegtuig was. Op geslotekringtelevisie (CCTV)-beeldmateriaal kan ’n rookwolk by die vliegtuig se linkerenjin gesien word. Volgens die voorlopige verslag strook dit met die linkerenjin wat onklaar geraak het.“Toe die rook om die linkerenjin waargeneem is, het die vliegtuig skerp na links gekantel en neergestort,” lui die verslag. Daar was geen toerusting aan boord wat die laaste woorde van sy bemanning of enige inligting van die vlug opgeneem het nie, aangesien dit nie van hierdie tipe vliegtuig vereis word nie. Volgens die DAAII-verslag maak die ondersoekspan staat op ooggetuieverklarings, CCTV-beeldmateriaal van omliggende huise en fisieke bewysstukke van die vliegtuig se wrak om die finale fase van die vlug te rekonstrueer.DAAII waarsku in die verslag dat nuwe inligting aan die lig kan kom wat die bevindings in die voorlopige verslag kan wysig. Ben Engelbrecht van DAAII is tans die hoofondersoeker. – irene-mari@nmh-hub.com.na

Pionierspark-vliegramp: Enjins in Kanada ontleed

Kommentaar

Republikein 2026-01-30

Meld asseblief aan om kommentaar te lewer

Pionierspark-vliegramp: Enjins in Kanada ontleed

Kommentaar

Republikein 2026-01-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.