Nóg stappers uit Visrivier-canyon gered

Nog drie stappers moes verlede week per helikopter uit die Visrivier-canyon gered word. Dit volg byna twee weke nadat ’n reddingsoperasie om 13 mense uit die canyon te red, wat ongeveer 35 uur geduur het, van stapel gestuur is.In daardie stadium het die ministerie van die omgewing, bosbou en toerisme gesê hy oorweeg om die staproete te sluit na aanleiding van verskeie reddingsoperasies wat uitgevoer is sedert die stapseisoen op 1 Mei geopen het.Kommer het ontstaan oor die veiligheid van stappers in die canyon en of daar genoeg water is.MR24/7 se nasionale bedryfsbestuurder, Conrad Jacobs, het aan Republikein se susterkoerant Namibian Sun gesê dat twee ander reddingsoperasies verlede week uitgevoer is waarby ’n bejaarde man Woensdag en twee bejaarde vroue Vrydag betrokke was, almal Suid-Afrikaners. Jacobs het gesê hulle is almal ervare stappers en medies geskik, maar almal het van diarree gekla.Soos met die vorige groep sodra hulle weer begin water drink het, het hulle beter begin voel. “Hierdie is ervare stappers, waarvan sommige die canyon reeds sewe keer gestap het. Hulle weet wat om te doen, so daar is beslis iets fout hier,” het hy gesê. Jacobs het verder gesê dat hulle soos met die vorige gevalle ook weer probleme ondervind het met die mediese fonds in Suid-Afrika om ’n helikopter te stuur om die twee vroue te red.“Die mediese fonds het bloot gesê hulle sal nie daarvoor betaal nie. Die mediese fonds verwag ’n mediese vorm van die stappers in die canyon en daar is gebiede waar mens nie mag ingaan nie. “Die twee vroue was Vrydag 5 ure weg van enige beskawing af. So net om my personeel van Keetmanshoop af te stuur is drie ure se ry, dan moet hulle vyf ure in die canyon instap net om toetse te neem vir byvoorbeeld bloeddruk en suikervlakke om aan die mediese fonds te verskaf.“Dan moet hulle weer uitstap om die uitslae te verskaf, voor die mediese fonds sal besluit of hulle gaan betaal of nie.” Jacobs het gesê die Suid-Afrikaanse mediesefondsvereistes is dus dat daar eers ’n mediese verslag gelewer moet word om te bepaal of dit ’n mediese noodgeval is. “As jou suikervlakke en bloeddruk normaal is, sal hulle nie ’n helikopter stuur nie. Dan moet ons besluit wat om te doen, terugsit en wag dat die situasie vererger of gaan dood.”Hy het verduidelik wat hulle doen is nie soek en redding nie, wat hulle doen is ontruiming en dit is wat die mediese fondse moet verstaan. Jacobs het ook beklemtoon wanneer toeriste ander lande besoek, hul mediese fondse daarvan bewus gemaak moet word.“Mense bel nie net van die canyon af omdat hulle moeg is nie. Hulle is beseer en soms kan hulle net nie fisiek voortgaan met die staptog nie, want daar is ’n tekort aan water,” sê Jacobs.Die omgewingsministerie se woordvoerder, Romeo Muyunda, het gesê die ministerie is bekommerd oor hoe gereeld stappers uit die canyon gered moet word. Hy het gesê dit kan ook lig werp op die vereistes wat die ministerie het vir stappers om die canyon binne te gaan, soos ’n fiksheidsertifikaat.“Miskien moet ons hierdie vereistes opskerp. Waarskynlik is daar ook ’n element van valse verklaring, wat beteken dat dokters miskien nie ’n ware weergawe van die fiksheid van hierdie mense gee nie. “As dit waar is, speel die dokters eintlik met mense se lewens.”Muyunda het verder gesê dat die canyon ’n moeilike terrein is om te stap en dat diegene wat die staptog onderneem, fisiek en geestelik daarop voorbereid moet wees.Hy het gesê dat ’n ander vereiste is dat hierdie stappers hul eie versekering moet hê, wat beteken dat die koste van die ontruiming van stappers uit die canyon nie deur die ministerie gedek sal word nie. “Hulle moet daardie reëlings tref voor hulle die canyon stap en voorbereid wees in noodgevalle.”Hy het gesê hy kan nie kommentaar lewer of daar enige planne is om die staproete te sluit nie. Daar is egter positiewe terugvoering van stappers op die Facebookgroep, I Hiked the Fish River Canyon, oor hoe hulle die staptog voltooi het en bygevoeg dat daar genoeg water in die canyon is. Hulle het ook hul lof teenoor die Namibia Wildlife Resorts (NWR) uitgespreek wat water aan hulle verskaf het.– republikein@republikein.com

Nóg stappers uit Visrivier-canyon gered

Kommentaar

Republikein 2026-02-03

Meld asseblief aan om kommentaar te lewer

Nóg stappers uit Visrivier-canyon gered

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.