'Namibië rou saam met julle'

In wat as ‘n uiters donker dag vir Namibië se manne en vroue in uniform bestempel kan word, het die dodetal ná ‘n grubotsing tussen twee voertuie van die Namibiese polisie (Nampol) en korrektiewe dienste (NCS) teen druktyd tot 16 gestyg. Dit sluit in 12 NCS-lede, drie lede van die polisie en een burgerlike.Die kop-teen-botsing het Saterdag tussen 06:30 en 07:00 op die B1-hoofpad vyf kilometer noord van Mariental . Die voertuig van NCS het korrektiewe beamptes na hul diensstasie by die Hardap-korrektiewe dienste vervoer, terwyl die Nampol-voertuig van die Withuis-nedersetting na Mariental onderweg was. Volgens ‘n verklaring wat aanvanklik deur die ministerie van binnelandse sake, immigrasie en veiligheid en sekuriteit uitgereik is, het 14 mense in die ongeluk gesterf waarvan 12 persone in uniform en twee burgerlikes was. Die verklaring is gister opdateer nadat nog ‘n persoon in uniform en ‘n burgerlike in die hospitaal gesterf het wat die totaal op 16 gebring het. Volgens inligting verskaf het die polisievoertuig ses passasiers vervoer en die NCS-voertuig 13 passasiers. Ses beamptes van beide Nampol en NCS is ná die botsing vanaf die staatshospitaal op Mariental na Windhoek vir verdere behandeling vervoer. Die liggame van die oorledenes is na die polisie se lykhuis in Windhoek vervoer. In ‘n verklaring deur die presidentskantoor het president Netumbo Nandi-Ndaithwah namens die regering haar simpatie met die oorledenes se naasbestaandes betuig.“My hart gaan uit na die families wat geliefdes en die mans en vroue van die Namibiese polisie en korrektiewe dienste wat rou oor hul kollegas. Geen woorde kan werklik die diepte van hierdie verlies vasvang nie,” het Nandi-Ndaitwah gesê.Sy het beklemtoon “ons nasie rou saam met julle” en dat die beamptes, tesame met die burgelike slagoffer “deel van ons Namibiese familie was” en ‘n gat los wat nie maklik gevul sal kan word nie.“Hul toewyding en diens tot ons land sal altyd met respek en dankbaarheid onthou word.” Die NCI het deur die kantoor van sy kommissaris-generaal ‘n kennisgewing uitgereik dat alle besoeke aan die korrektiewe dienste op Hardap tot verdere kennisgewing opgeskort is. Dit het onderneem om onverpoos te werk om te verseker dat normale besoekersure sou gou as moontlik weer kan voortgaan. Lucia Iipumba, minister van veiligheid en sekuriteit, het intussen ‘n beroep op die publiek gedoen om hulle daarvan te weerhou om grafiese foto’s wat op die ongelukstoneel geneem is, in die openbaar te sirkuleer. Name wat glo aan die slagoffers van die tragiese ongeluk behoort, is ook wyd op sosiale media versprei. Teen druktyd het die ministerie se woordvoerder Margaret Kalo nie gereageer op vrae of dit wel aan die slagoffers behoort en wanneer die name van die oorledenes amptelik vrygestel sou word nie. – henriette@republikein.com.na

'Namibië rou saam met julle'

Kommentaar

Republikein 2026-01-30

Meld asseblief aan om kommentaar te lewer

'Namibië rou saam met julle'

Kommentaar

Republikein 2026-01-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.