Meeste vragmotorongelukke in Erongo

Ten minste 48 mense is dood en 211 beseer in 112 vragmotorongelukke wat teen 16 September 2026 oraloor Namibië aangeteken is. 

Dít is volgens die hoof van korporatiewe sake van die Motorvoertuigongelukke (MVA)-fonds, John Haufiku.

Erongo het die hoogste aantal ongelukke met 30 en die meeste sterftes van 15 aangeteken, terwyl Khomas 21 ongelukke en die hoogste aantal beserings met 59 aangeteken het.

Otjozondjupa het 14 ongelukke, 36 beserings en 14 sterftes aangeteken. Saam is Erongo en Otjozondjupa verantwoordelik vir 29 van die 48 sterftes.

Haufiku het gesê botsings was die mees algemene ongeluktipe, wat verantwoordelik was vir die 57 ongelukke, 157 beserings en 37 sterftes.

Voetgangerverwante ongelukke was verantwoordelik vir 24 voorvalle, 17 beserings en tien sterftes, wat die kwesbaarheid van voetgangers in ongelukke met swaar voertuie beklemtoon.

Hy het gesê die syfers versterk die behoefte aan groter fokus op vragmotorbestuurdersveiligheid, verantwoordelike -bedrywighede, voetgangerbewusmaking en die voorkoming van ongelukke.

– [email protected]