Meer ongelukke op westelike verbypad

Ongelukke op Windhoek se B1-westelike verbypad het in die twee maande ná die installering van die spoedhobbels meer as verdriedubbel, lui ’n verslag van die Motorvoertuigongelukke (MVA)-fonds.

Volgens die MVA-fonds het ongelukke op die westelike verbypad gestyg van twee voorvalle in die twee maande vóór installering tot sewe in die twee maande daarna, terwyl beserings oor dieselfde tydperk van nul tot 12 toegeneem het.

Nietemin het sterftes van twee tot een afgeneem, wat op ’n moontlike daling in die ernstige aard van ongelukke dui, ondanks die toename in die totale aantal voorvalle.

Die data is ingesluit in ’n korttermynbeoordeling van toestande voor en ná die spoedhobbels op gedeeltes van die roete.

Botsings van agter het vier van die sewe aangetekende ongelukke uitgemaak, terwyl roekelose en nalatige bestuur in vier gevalle as ’n bydraende faktor geïdentifiseer is, vergeleke met een gedurende die voorafgaande tydperk.

Die fonds se voor-en-na-beoordeling vergelyk data van 6 April tot 5 Junie met data van 6 Junie tot 8 Augustus, terwyl sommige van sy breër statistiek van Windhoek en voetgangers 5 Junie tot 16 Augustus dek.

Twee ongelukke met voetgangers is op die verbypad aangeteken nadat die spoedhobbels geïnstalleer is, vergeleke met drie gedurende die ooreenstemmende tydperk in 2025, het die fonds aan Republikein gesê.

Voetgangersterftes het oor die vergelykbare tydperke van drie tot een gedaal, terwyl die twee aangetekende voetgangerongelukke op 5 Julie en 3 Augustus plaasgevind het en voetgangers ingesluit het wat glo skielik oor die pad gehardloop het.

Die syfers kom te midde van voortgesette debat oor die geskiktheid van spoedhobbels op die westelike verbypad, ’n hoëvolume-roete wat oorspronklik ontwerp is om verkeer te laat vloei eerder as om soos ’n gewone straat in die stad te funksioneer.

Voetgangerongelukke bly egter ’n groter probleem in die hoofstad en het 85 van Windhoek se 234 ongelukke tussen 5 Junie en 16 Augustus vanjaar uitgemaak, gelykstaande aan 36% van alle aangetekende voorvalle.

Daardie ongelukke het tot 96 beserings en vier sterftes gelei, wat 26% van alle beserings en 44% van die padsterftes verteenwoordig wat gedurende die tydperk in die stad aangeteken is.

Die getalle het nietemin verbeter teenoor die ooreenstemmende tydperk verlede jaar, toe Windhoek 99 voetgangerongelukke, 102 beserings en sewe sterftes aangeteken het.

’n Dosent in vervoeringenieurswese van die departement siviele, mynbou- en prosesingenieurswese aan die Universiteit van Wetenskap en Tegnologie (Nust), Candidus Tomeka het gewaarsku teen die gevolgtrekking uit die toename in ongelukke dat die spoedhobbels self daarvoor verantwoordelik was.

Hy het gesê om te beoordeel of die ingryping padveiligheid verbeter of versleg het, sou aansienlik meer verg as om ongelukketotale oor twee kort tydperke te vergelyk. 

“Hoeveel die spoedhobbels, of enige ander ingrypingsmaatreël, padveiligheid verbeter het, behoort dit beoordeel te word deur statistiese data oor spoed, ongelukke, volume van verkeersvloeien voetgangeraktiwiteite te evalueer,” het Tomeka gesê. 

“Die ontleding behoort nie net te fokus op of die totale aantal ongelukke toegeneem of afgeneem het nie. Dit behoort ook veranderinge in die tipe en erns van ongelukke te ondersoek.”

Tomeka het voorheen gewaarsku teen die toepassing van spoedhobbels op hoëvolume-, hoëspoedpaaie soos die westelike verbypad, en aangevoer dat ingrypings onbedoelde risiko’s kan skep as dit nie by die ontwerp en funksie van die pad pas nie.

NEKKUNDI BLAMEER BESTUURDERS

Die minister van werke en vervoer, Veikko Nekundi, het die maatreëls verdedig en die verantwoordelikheid by motoriste geplaas om by die padtekens en veiligheidsingrypings aan te pas. 

“Die kwessie is eenvoudig: ons bestuurders moet die reëls van die pad respekteer en nakom,” het Nekundi gesê.

Die minister het volgehou dat motoriste wat spoedhobbels en ander verkeersbeheermaatreëls nader, verplig is om spoed te verminder en waarskuwingstekens te gehoorsaam, eerder as om teen hoë snelhede voort te ry wat bykomende gevaar kan skep.

Die jongste syfers van die MVA-fonds stel nie vas of buitensporige hoë spoed, skielike rem by die hobbels of ander kenmerke van die ingryping tot die toename in botsings van agter bygedra het nie.

Die syfers dek ook slegs ’n kort tydperk, wat langertermyn-monitering noodsaaklik maak voordat gevolgtrekkings gemaak kan word oor of die skynbare veranderinge ’n volgehoue tendens verteenwoordig.

Vroeëre syfers wat die breër B1-hoofweg dek, insluitend die dubbelweg tussen Windhoek-Okahandja en aangrensende stedelike gedeeltes, het 88 ongelukke, 177 beserings en 17 sterftes oor 14 maande aangeteken.

Die MVA-fonds se hoofbeampte vir korporatiewe sake, John Haufiku, het gesê monitering sal voortgaan namate meer bewyse beskikbaar word. 

“Die fonds sal voortgaan om ongeluktendense op die B1-hoofweg te monitor en praktiese, bewysgebaseerde ingrypings in padveiligheid te ondersteun om beserings te verminder en lewens te red,” het hy gesê.

– [email protected]