Hierdie held altyd daar vir ander, vertel weduwee

“Ek het altyd geweet my man sal sy lewe vir my seuns en vir my opoffer – ek is vervul met ontsag in die besef dat sy hart soveel groter was en ook sy medemens omvou het.”Só het me. Ute Diergaardt, weduwee van die 47-jarige mnr. Quinton (Doefie) Diergaardt, gister van haar man vertel.Diergaardt het die naweek aan die ernstige brandwonde beswyk wat hy tydens ‘n veldbrand in die omgewing van Tsumis opgedoen het. Hy het sy vriend en die burgemeester van Rehoboth, mnr. Enrico (Toes) Junius, op laasgenoemde se plaas Waldesruhe uit die vlamme probeer red.“Ons verlies het ons wêreld aan stukke geruk”, sê Ute.“Dit het my hart gebreek toe my jongste my vra hoekom sy Dadda nie aan ons gedink het toe hy omgedraai het om vir oom Toes te help nie. My enigste antwoord aan hom was dat dit inherent aan sy (Quinton se) karakter was en dat hy nooit enigeen alleen sou agterlaat in so ‘n bedreiging nie.”Sy het snikkend vertel hoe haar man op pad na sy buurman en vriend, mnr. Chris Smith, se plaas was toe Junius hom gebel en gevra het hy moet op sy plaas kom help.“Hy het hom na Toes se plaas gehaas waar hy vir Junius en ‘n werker opgelaai het,” vertel Ute. “Onderweg na ‘n goeie uitkykpunt van waar hulle die brand kon bestry, het hulle ‘n groot gat getref wat onsigbaar was weens die dig begroeide veld. Hulle het vergeefs gesukkel om die Cruiser uit te kry.”Volgens Ute kon die mans nie weer die masjien aan die gang kry nie. “Toe was die vuur op hulle en die voertuig het aan die brand geslaan.”Die werkers het volgens haar begin hardloop en vir Quinton geskree om ook te vlug, maar toe hy omdraai, het hy gesien Toes is nog by die bakkie en hy het teruggehardloop en hom te help.Smith was glo eerste op die toneel en volgens Ute het hy haar gebel om dadelik na Rehoboth te kom omdat Doefie “erg seergekry” het. Sy het hulle by Rehoboth se mediese sentrum gekry, waar dr. Van Wyk die twee pasiënte probeer stabiliseer het voordat hulle na die Rooms-Katolieke Hospitaal in Windhoek afgevoer is.Volgens Ute het die volgende Bybelvers haar die afgelope week bygebly: “Dit verseker Ek julle: Vir sover julle dit aan een van die geringste van hierdie broers van My gedoen het, het julle dit aan My gedoen.”Sy bedank elkeen wat die gesin en familie ondersteun het en vir Quinton gebid het. “Die vriende wat soos familie geword het en nooit by hand gelos het nie; die vreemdelinge wat vriende geword het.”Die liefde en vertroosting wat hulle ontvang het, is volgens Ute ‘n weerspieëling van die edele karakter wat haar man op daardie noodlottige dag getoon het.

Hierdie held altyd daar vir ander, vertel weduwee

Kommentaar

Agnes De Waldt 2 Jaar Gelede 27 September 2022

Meld asseblief aan om kommentaar te lewer

Hierdie held altyd daar vir ander, vertel weduwee

Kommentaar

Agnes De Waldt 2 Jaar Gelede 27 September 2022

Meld asseblief aan om kommentaar te lewer

MELD AAN

Advertensie