Britse vlieënier, navorser is slagoffers

Die twee Britte wat Woensdagnamiddag in ’n vliegtuigongeluk naby Gobabeb in die Namib-Naukluft Nasionale Park, gesterf het, was skaars ’n week in die land toe die noodlot tref.

Volgens inligting van die Namibiese polisie in die Erongostreek het die navorsers, John Lowe en Alan Martin Wilson (62) en vlieënier Neil Thomas Oakman (63) op Woensdag 25 Februarie 2026 in Namibië aangekom om navorsing by Gobabeb te doen.

Oakman was agter die stange met Wilson as sy passasier Woensdag omstreeks 17:00 in die ligte vliegtuig opgestyg om na wild met opsporingshalsbande in die omliggende duine te soek as deel van navorsing oor gemsbokke in die Namib-Sandsee.

Toe die twee nie terugkeer nie, het Lowe sy kommer uitgespreek, omdat hulle nie terugkeer nie, waarna ’n soektog omstreeks 19:00 in die omgewing van stapel gestuur is. Die wrak van die vliegtuig met die registrasiemerk G-SMLI is later naby die Gobabeb-vliegveld ontdek.

Wilson en Oakman is met noodlottige beserings gevind en is op die toneel dood verklaar.

Hul liggame is na die Walvisbaaise polisielykshuis vervoer terwyl ondersoeke na die oorsaak van die ongeluk aan die gang is.

In ’n verklaring het Gobabeb gesê die twee mans was op pad terug van ’n waarnemingsvlug toe die ongeluk plaasgevind het.

“Die voorval het in die Namib-Naukluft Nasionale Park plaasgevind en ’n uitstaande wetenskaplike en ’n hoogs ervare vlieënier was betrokke,” lui die verklaring.

Wilson was ’n bekende vlieënier in Brittanje waar hy ’n vlieginstrukteur vir Harvard-oorlogvliegtuie was, asook voorsitter van die ligtevliegtuigvereniging. 

Gobabeb het bygevoeg dat die navorsingspan die nodige werk- en navorsingspermitte verkry het om die studie in samewerking met die sentrum en in oorleg met die ministerie van omgewing, bosbou en toerisme (MEFT) en die hoofnatuurbewaarder van die Namib-Naukluft Nasionale Park, Manie le Roux, uit te voer.

“Gobabeb is diep geskok en hartseer oor hierdie tragiese ongeluk. Ons betuig ons opregte meegevoel aan die families, vriende en kollegas van diegene wat hul lewens verloor het,” lui die verklaring.

Hafeni Mweshixwa, die ondersoekbeampte in die direktoraat van vliegtuigongelukondersoeke in die ministerie van werke en vervoer, het gisteroggend vroeg na die toneel vertrek en aan Republikein gesê die ligte vliegtuig is in Brittanje geregistreer en deur Groppo vervaardig.

Hy het gister met die media op die ongelukstoneel gepraat en gesê die ondersoek is nog in ’n vroeë stadium.

"Na deeglike ontleding sal ons presies kan deel wat gebeur het."

Mweshixwa het bygevoeg dat ’n behoorlike verklaring later uitgereik sal word.

– [email protected]