Bekende boer toon glo geen reaksie voor vliegongeluk

Volgens die getuienis van Gerrit Spangenberg, die oorlewende van ’n vliegongeluk, het sy pa en die vlieënier, Jannie Spangenberg, kort voor die ongeluk gebeur het, nie reaksie getoon nie.Die voorlopige ongelukverslag van die direktoraat vir vliegtuigongelukondersoeke (DAAII) in die ministerie van werke en vervoer, toon dat daar tans geen rekord is dat Jannie (53) ’n vlieënierslisensie of die mediese sertifikaat gehad het wat vereis word om ’n vliegtuig te vlieg nie. Beskikbare rekords het ook ten tyde van die vrystelling van DAAII se voorlopige verslag geen rekord opgelewer dat Jannie as deel van ’n lugvaartrekreasie-organisasie (ARO) geregistreer was nie. “Die ultraligte vliegtuig is vir ongeveer 10 ure sonder bewys van registrasie met die reguleerder of formele magtiging vir vlugte, soos vereis onder nasionale regulasies, gevlieg,” lui DAAII se verslag. Volgens die verslag het Gerrit getuig dat die vlug aan die begin sonder enige probleme verloop het nadat hulle op Saterdag 31 Mei omstreeks 09:10 op hul plaas Gras Ranch, sowat 37 km vanaf Kalkrand, opgestyg het. “Ongeveer 15 minute nadat hulle opgestyg het, het Jannie glo ’n jakkals gesien en met Gerrit, wat in die agtersitplek was, bespreek het om die dier te skiet. Gerrit het toe glo twee skote afgevuur en die jakkals gemis, toe sy pa hom aangeraai het om ‘kalm te bly en te fokus’ voor hy in die rigting van die jakkals gedraai het,” lui die verslag. “Hulle het weer die jakkals gesien toe hulle ongeveer 60 m bo die grond was, maar het besluit om dit nie te skiet nie aangesien dit te ver was. Daarna het Jannie glo nie reaksie getoon nie en die vliegtuig het neergestort.” Gerrit, wat volgens die verslag slegs ligte beserings aan sy hande opgedoen het, het glo toe met sy pa probeer praat, maar hy het geen tekens van lewe gewaar nie. DAAII se ontleding van die toneel toon dat die vliegtuig se brandstoftenk omtrent halfvol brandstof was en dat die Aquilla met registrasiemerk ZU-FIW, altesaam 75,4 vlugure op sy kerfstok gehad het. Hierdie verslag is egter slegs ’n voorlopige verslag en inligting wat daarin vervat is mag verander voor die finale ongelukverslag bekend gemaak word, maan DAAII. Die direktoraat sê ook dat die doel van die verslag is nie om blaam of aanspreeklikheid in terme van die wet te bepaal nie, maar dat hul ondersoek eerder daarop gemik is om veiligheid in lugvaart te verbeter en bevorder. – irene-mari@nmh-hub.com.na

Bekende boer toon glo geen reaksie voor vliegongeluk

Kommentaar

Republikein 2025-10-14

Meld asseblief aan om kommentaar te lewer

Bekende boer toon glo geen reaksie voor vliegongeluk

Kommentaar

Republikein 2025-10-14

Meld asseblief aan om kommentaar te lewer

MELD AAN

Advertensie