Vakansieskool vir volhoubaarheid

Orano Mining Namibia in vennootskap met NaDEET se stedelike volhoubare sentrum op Swakopmund, het onlangs sy eerste vakansieskool vir graad 10-leerlinge aan die kus aangebied.Die Orano Empowered-vakansieskool vorm deel van ’n wêreldwye inisiatief wat in alle lande waar Orano in die uraanmynbousektor aktief is, aangebied word. Dit is daarop gemik om gereelde vakansieskole in die vakke wetenskap, tegnologie, ingenieurswese en wiskunde (STEM) en onderwerpe van onderwys vir volhoubare ontwikkeling (ESD) te vestig om leerlinge te help om hul prestasie in wetenskapvakke te verbeter. Terselfdertyd verhoog hul bewustheid van volhoubare ontwikkelingskwessies wat hul gemeenskappe raak. Die eerste STEM-ESD-projek in Namibië het op Swakopmund teen sowat N$100 000 afgeskop. Die loodsprojek het 31 leerlinge van verskillende skole van Walvisbaai en Swakopmund ingesluit en het gefokus op STEM-vakke en ESD-onderwerpe. Die STEM-onderwerpe is ondersteun deur die personeel van die ministerie van onderwys, vernuwing, jeug, sport, kuns en kultuur en die ESD-vakke wat deur die NaDEET-span aangebied is.Gedurende die weeklange program kon leerlinge op ’n heeltemal nuwe manier op STEM-vakke fokus, byvoorbeeld deur die wetenskaplike begrip van energie vanuit ’n oogpunt van volhoubaarheid toe te pas. Hierdie unieke benadering het leerlinge in staat gestel om die groter prentjie te sien en hul rolle verstaan in volhoubare ontwikkeling, die impak van klimaatsverandering en hoe hulle hul wêreld kan beïnvloed deur hul omgewingsvoetspoor te bestuur.Die program het ook besoeke aan die Erongo-ontsoutingsaanleg, die Swakopmund-soutfabriek, die ligeenvelde langs die kus en ’n staptog met die fokus op volhoubaarheid op Swakopmund ingesluit.Tydens die prysuitdeling het die besturende direkteur van Orano Mining Namibia, Marc Méléard, die verbintenis van Orano tot die bestuur van enige potensiële omgewingsimpakte voor die aanvang van mynbou herbevestig.“Ons sal geen operasie begin as ons nie ons impak op die omgewing beoordeel het nie en versagtingsmaatreëls voorgestel het om daardie impak te beperk nie. “Daarvoor is die vaardighede wat julle tydens die vakansieskool geleer het, presies wat vir ons toekomstige werknemers benodig word,” het hy gesê.Die “Orano Empowered”-program is ’n breër inisiatief wat gemik is op verskeie aspekte van onderwys, insluitend vroeë kinderontwikkeling, primêre, sekondêre en tersiêre onderwys, sowel as inisiatiewe binne die organisasie, soos die verskeie opleidings- en ontwikkelingsprogramme wat aan werknemers aangebied word.Die suksesvolle uitkoms van die eerste vakansieskool in Namibië was ’n goeie aanduiding dat die program in die toekoms herhaal kan word.– republikein@republikein.com.na

Vakansieskool vir volhoubaarheid

Kommentaar

Republikein 2026-08-28

Meld asseblief aan om kommentaar te lewer

Vakansieskool vir volhoubaarheid

Kommentaar

Republikein 2026-08-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.