‘Nuwe skole bring verligting’

Minstens 53 375 preprimêre en 98 253 graad 1-leerlinge het gister die nuwe skooljaar saam met die leerlinge in ander grade in sowat 1 722 staatskole landswyd afgeskop. Die uitvoerende direkteur van onderwys, kuns en kultuur, Sanet Steenkamp, het tydens die geleentheid gesê dat verskeie nuutgevestigde skole die druk op gevestigde skole in verskeie streke verlig het. Die ministerie het die afgelope vyf jaar 537 klaskamers opgerig. Sewe splinternuwe skole in die Ohangwenastreek slaag volgens Steenkamp daarin om die nood in landelike gebiede te verlig, maar sy sê daar is steeds rede tot kommer in Eenhana. Ten spyte hiervan glo Steenkamp dat daar geen merkwaardige kwessies vir Eenhana se graad 1’s en graad 8’s ondervind is nie. In die Zambezistreek ervaar die ministerie egter uitdagings as gevolg van verstedeliking. “Talle ouers dring daarop aan om hul kinders in die Katima-omgewing te plaas – dit veroorsaak dat talle skole in stedelike gebiede oorvol is met skole in landelike gebiede wat leegloop,” sê Steenkamp. Die leerlinge wat hul AS-kwalifikasie wil voltooi, sal na verwagting teen 22 Januarie in skole geakkommodeer word.Die Sekondêre Skool Swakopmund (SSS) se skoolhoof, Sinvula Sibanga, sê die integrasie van graad 8-leerlinge by die skool het vlot verloop. Hy sê SSS kan ses graad 8-klasse akkommodeer, maar moes ook plek in hierdie klasse maak vir ongeveer een en ’n halwe klas se leerlinge wat vanjaar die graad moet herhaal.“Die proses word baie goed bestuur. Ouers oorweldig ons nie wat kom aanklop vir plek nie, omdat dít op streekvlak hanteer word. Ek het vandag geweet die ouers wat hier opdaag, is die ouers wie se kinders reeds aanvaar is,” sê hy. Sibanga raai ouers aan wat steeds hoop om plek in ’n skool vir hul kind te kry, om geduldig te wees“Ons moet net eers die skole kans gee. Elke kind sal in ’n skool geplaas word ongeag van hul graad. Laat die skole eers die nuwe leerlinge se aankoms bestuur. Daarna kan daar gekyk word na die kapasiteit om te help met diegene wat nog nie plek het nie,” sê hy.Janine Diergaardt van Keetmanshoop Sekondêre Skool (KSS) skets ’n ander prentjie. Sy sê ongeveer 30% van die leerlinge wat gisteroggend by KSS verwag is, het nie vir die eerste skooldag opgedaag nie. Sy skryf dit toe aan uitdagings met betrekking tot skooluniforms en skryfbehoeftes, asook die feit dat baie van die leerlinge wat by KSS skoolgaan nie in Keetmanshoop woon nie en van elders moet reis.Diergaardt sê ongeveer 400 leerlinge het gisteroggend vir die eerste skooldag opgedaag.“Ons het vandag probeer om die ouers van die afwesige leerlinge in die hande te kry en die meerderheid het aangedui dat hulle terug skool toe kom,” sê sy. Sy het ook bygevoeg: “Ek glo ons sal in die week nog kinders akkommodeer wat plek soek. Baie ouers wat nie in Keetmanshoop is nie het gebel en gevra of daar plek is.” - irene@republikein.com.na

‘Nuwe skole bring verligting’

Kommentaar

Republikein 2025-08-05

Meld asseblief aan om kommentaar te lewer

‘Nuwe skole bring verligting’

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie