Nuwe klaskamers vir Laerskool Tsumeb

Leerlinge van Laerskool Tsumeb sal nie meer oorvol klaskamers hoef te trotseer nie en dit is te danke aan die MTC Rural Schools-projek waardeur agt bykomende klaskamers gebou en aan die skool geskenk is.Die minister van onderwys, kuns en kultuur, Anna Nghipondoka, het Woensdag dié klaskamers asook ’n laboratorium en stoorkamer aan die skool oorhandig. Die geriewe is gebou met die ondersteuning van MTC en die Motorvoertuigongelukkefonds (MVAF) en het sowat N$3,4 miljoen gekos.Die skoolhoof Petrina Shafewa het haar dank teenoor MTC en die MVAF uitgespreek vir hul hulp met infrastruktuur wat “noodsaaklik vir die skool was”.“Die skool het 992 leerlinge en het te min klaskamers gehad wat tot te veel leerlinge in ’n klas gelei het en dit is ongunstig vir onderrig en leer nie. Ons het regtig ’n probleem gehad omdat ons so baie leerlinge het.”PROJEKDie projek is in 2019 van stapel gestuur en dien as ’n korporatiewe maatskaplike beleggingsinisiatief wat daarop gemik is om die regering te help om leeromgewings te verbeter en bestaande onderwyspraktyke landswyd te standaardiseer.“Skole met vervalle strukture word opgeknap en in die meeste gevalle word nuwe klaskamerblokke bygevoeg.“Altesaam 49 klaskamers is vanaf 2019 tot dusver deur die projek gebou.“Die streke wat by die projek baat gevind het, is Kunene, Otjozondjupa, Oshana, Hardap, ||Kharas, Kavango-Wes, Zambezi, Ohangwena en nou Oshikoto,” lui ’n mediaverklaring wat MTC se woordvoerder, Erasmus Nekundi, uitgereik het.Luidens die verklaring poog die samewerking tussen MTC en die MVAF om die ministerie van onderwys, kuns en kultuur by te staan om te verseker dat die onderrigreis vir die Namibiese kind met waardigheid uitgevoer word deur ’n aanvaarbare leeromgewing te skep. “Die impak van hierdie skenking strek ver buite die mure van Laerskool Tsumeb. Dit weerklink regdeur die gemeenskap, die streek, en inderdaad die hele land.“Deur opvoedkundige infrastruktuur te verbeter, belê ons in die toekoms van Namibië om te verseker dat ons kinders die gereedskap en omgewing het wat nodig is om akademies en sosiaal te presteer. “Die ministerie werk ook ywerig om die agterstand in infrastruktuur van meer as 3 000 klaskamers en ander noodsaaklike opvoedkundige geriewe te takel,” het Nghipondoka tydens die oorhandiging gesê.Benewens Laerskool Tsumeb, beoog MTC en die MVAF om ook klaskamers en stoorgeriewe by Laerskool Zadan in die Kavango-Oosstreek te bou en dit voor die einde van die jaar te voltooi.TROTSDie uitvoerende hoof van die MVAF, Rosalia Hausiku, het ook tydens die oorhandiging in haar toespraak – wat namens haar voorgelees is – genoem dat die MVAF slim vennootskappe aangegaan het om hul missie en visie te dryf.“Daarom werk ons saam met MTC wat al ’n geruime tyd goeie werk op hierdie gebied doen. Onderwys is nie die enigste mandaat van die regering nie; dit is almal se plig.“Dit is almal se plig om die land te help om die hoogste standaarde van onderwys te bereik. Die MVAF is dus trots om in ’n sinvolle projek soos hierdie te belê.”MTC se hoof van kommunikasie, Tim Ekandjo, het ’n beroep op ander sektore gedoen om hul projekte van korporatiewe maatskaplike verantwoordelikhede sigbaar en bekend aan die publiek te maak.Ekandjo het ’n beroep op beide die private en openbare sektore gedoen om saam te werk om uitdagings in die onderwys- en behuisingsektor aan te pak asook om die kwessie van armoede te takel.“Ek doen ’n beroep op diegene wat groot winste in die vissektor maak om selfs 1% van die inkomste wat uit hul groot viskwotas gegenereer word, te neem en dit terug in die plaaslike onderwyssektor te ploeg.“Dryf dit vorentoe. Onderwys is ons almal as ’n nasie se verantwoordelikheid en die kwessie van onderwys is ’n kwessie van elke korporatiewe entiteit.”– republikein@republikein.com.na

Nuwe klaskamers vir Laerskool Tsumeb

Kommentaar

Republikein 2025-08-04

Meld asseblief aan om kommentaar te lewer

Nuwe klaskamers vir Laerskool Tsumeb

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie