Nust-hoës ‘wil versoen’

Ogone Tlhage – Die Namibië Universiteit van Wetenskap en Tegnologie (Nust) se visekanselier, dr. Erold Naomab, en die instelling se regshoof, Joshua Kaumbi, het hulself daartoe verbind om hul verskille op te los ná ’n versoeningsvergadering wat twee weke gelede gehou is.

Die gespanne verhouding tussen dié twee het die instelling se werksaamhede nadelig begin beïnvloed.

Die situasie was so erg, volgens ingeligtes, dat Kaumbi nie raadsvergaderings bygewoon het nie en Naomab het na bewering eksterne regsadvies ingewin in plaas daarvan om die interne prokureur te gebruik.

Die verhouding tussen die twee was só gespanne dat een van dr. Itah Kandjii-Murangi, die minister van hoër onderwys, tegnologie en vernuwing, se opdragte, toe sy die sittende raad in Augustus 2023 aangestel het, was dat hulle ’n blywende oplossing vir die dooiepunt moes vind.

“Jy onthou dat een van die take wat die agbare minister hierdie huidige tussentydse raad versoek het om te doen, is om die gespanne verhouding tussen [Naomab] en [Kaumbi] te takel.

“Die minister het vir ons gesê dat die verhouding tussen die twee Nust-bestuurders die werksomgewing negatief begin beïnvloed het, en daarom moet dit dringend getakel word,” het dr. Leake Hangala, Nust se raadsvoorsitter, ’n week gelede in ’n e-pos aan sy mederaadslede gesê.

Binnestanders het onthul dat die raad sonder ophou werk om die spanning te ontlont, wat daartoe gelei het dat die twee vir ’n geruime tyd nie met mekaar praat nie.

Vroeër die maand is ’n deurbraak gemaak toe Hangala die mans om dieselfde tafel gebring het om hul kwessies uit te stryk, en hulle het uiteindelik ’n versoeningsooreenkoms onderteken waarin hulle hul daartoe verbind het om te versoen.

WERKSOMGEWING

Die bittere verhouding tussen Naomab en Kaumbi is tydens ’n vergadering op 14 Maart uiteengesit, asook die negatiewe impak wat dit op die werksomgewing tot gevolg gehad het.

“Die verhouding tussen Naomab en Kaumbi het so gespanne geraak en het die professionele verhouding tussen die twee begin beïnvloed. Gevolglik het dit ook begin om die werksomgewing tussen die twee kantore sowel as die doeltreffendheid en bestuur van die hele universiteit te beïnvloed,” luidens ’n opsomming van die vergadering wat aan Republikein se susterkoerant Namibian Sun verskaf is.

Namibian Sun het die ooreenkoms onder oë gehad waarin die twee mans toegegee het dat hul werksverhouding verbrokkel het en gered moes word tot voordeel van die instelling.

“Beide het hul mening uitgespreek oor wat hulle glo die oorsprong en oorsake van die gespanne verhouding is. Hulle het albei erken dat die teëspoed nie goed is vir hul onderskeie kantore of vir die algehele bedrywighede en bestuur van die hele universiteit nie,” lui die ooreenkoms.

DIE OOREENKOMS

Volgens die dokument onderneem Naomab en Kaumbi om hul professionele verhouding te herstel, mekaar te vergewe en dié hoofstuk van hul verhouding af te sluit.

Die ooreenkoms stipuleer verder dat Kaumbi ’n klag wat hy teen Naomab ingedien het, sal terugtrek.

Kaumbi het ook ingestem om raadsvergaderings by te woon om “hom in staat te stel om doeltreffende regsadvies aan die visekanselier en die raad te verskaf”.

Die raad het ook besluit om al Nust se uitvoerende komiteelede op ’n verpligte kursus oor korporatiewe bestuur te stuur.

Volgens Hangala is die saak nog nie afgehandel nie.

“Dit is ’n interne saak en alle prosesse is nog nie afgehandel nie, gee my asseblief tyd,” het Hangala op navraag gesê.

In reaksie op die ooreenkoms het Kaumbi gesê dit sal in die beste belang van Nust wees.

“Ek sal die leierskap van [Hangala] verskuldig bly, ’n produk van die goue generasie van jongmense wat die stigtersvaders van ons republiek op ’n vroeë ouderdom met verantwoordelikhede toevertrou het om geloofwaardige instellings te vestig,” het hy gesê.

GEEN REAKSIE

Naomab het nie op enige navrae gereageer nie.

Die verhouding tussen die twee het na bewering versuur ná sensitiewe inligting van Naomab se gedrag uitgelek het. Hy staar nou ’n ondersoek deur die Teenkorrupsiekommissie van Namibië (ACC) in die gesig.

Naomab word aangekla van die misbruik van openbare fondse, nepotisme, stamgebondenheid en magsmisbruik.

“Dit is ernstige bewerings van administratiewe korrupsie teen die bestuur van die openbare akademiese instelling, wat nie ligtelik opgeneem moet word nie,” het Paulus Noa, die hoof van die ACC, in ’n brief gedateer 22 Junie 2023 geskryf.

Kaumbi was vermoedelik die een wat die inligting aan die publiek uitgelek het en is daarna deur Naomab geskors. Sy skorsing is uiteindelik opgehef.

– [email protected]