NTA-raad bly onveranderd

“Die raadslede is in Januarie 2023 aangestel ná ’n deeglike keuringsproses wat daarop gemik is om hul geskiktheid en bevoegdheid te verseker om die verantwoordelikhede wat aan hulle toevertrou is, na te kom.”So het die minister van hoër onderwys, opleiding en vernuwing, dr. Itah Kandjii-Murangi, Maandag tydens ’n mediakonferensie gesê en dat die raad van die Namibiese Opleidingsowerheid (NTA) nie herroep of verander sal word nie. “Verder is dit betreurenswaardig dat die kommer oor die samestelling van die raad eers op hierdie tydstip geopper is, al is die raad nou al meer as ’n jaar in werking. Dit is van kardinale belang om die tydsberekening van hierdie besware te bevraagteken en te oorweeg of hulle gedryf word deur opregte kommer oor die doeltreffende funksionering van die NTA of deur ander motiewe,” sê sy.Volgens haar het sy kommer oor die raad met betrokke vakbonde en werkgewersorganisasies bespreek, en ook die ministerie van arbeid, nywerheidsbetrekkinge en werkskepping gevra om vier name van mense voor te stel wat bykomend tot die raad aangestel kan word. Kandjii-Murangi het egter beklemtoon dat die ontbinding van “’n behoorlik aangestelde en funksionerende raad die kontinuïteit van die NTA se bedrywighede sal ontwrig”.Die Namibiese Werkgewersfederasie (NEF), die Namibiese Werkgewersvereniging (NEA), die Namibiese Nasionale Werkersunie (NUNW) en die Vakbondkongres van Namibië (Tucna) het verlede week in ’n gesamentlike mediakonferensie en verklaring hul griewe met die raad geopper.Die werkgewersorganisasies en die vakbonde is onder meer ontevrede dat hulle nie meer in die raad verteenwoordig word nie, soos uiteengesit in die Wet op Beroepsonderrig en -opleiding no. 1 van 2008 (die VET-wet).Werkgewers is ook ontevrede dat hulle nie meer toegang het tot inligting oor hoe die VET-fonds, waaraan hulle deur die wet verplig word om by te dra, bestee word nie. Vrae aan die ministerie van hoër onderwys oor waar die fonds se finansiële inligting beskikbaar is of wanneer dit laas openbaar gemaak is, is nie teen druktyd beantwoord nie.Die NEF se president, Elias Shikongo, het gister in ’n verklaring ontken dat hulle hul kommer eers onlangs geopper het.“Die gesprekke met die minister was van die begin af en voor haar onwettige inhuldiging van die raad. Dit maak dit nogal onverklaarbaar dat so ’n ooglopende waarheid ontken word,” lui die verklaring.“Die minister het self die tekortkominge in die wettigheid van die aanstellings erken. Die maatreëls wat die minister voorstel skiet tekort aan wat die NTA se wet vereis, en kon dus nie aanvaar word nie. “Die NEF en sy vennote herhaal dienooreenkomstig sy standpunt en gebruik hierdie geleentheid om ’n dringende beroep op die huidige raadslede te doen om te bedank. Dit het ten doel om te verseker dat die raadslede, wat voorlopig onskuldig behoort te wees, geen persoonlike aanspreeklikheid in die geval van litigasie neem nie,” sê die werkgewers se verteenwoordigers.Namens die vakbonde het Ndjizuvee Haakuria van Tucna gesê: “Dit is jammer dat die minister besluit het om die vakbonde en werkgewersfederasies te teiken in plaas daarvan om die ongewone gedrag te takel wanneer dit kom by die wyse waarop die huidige NTA-raad aangestel is.In die vergadering verlede week Vrydag tussen die minister en die federasies se leierskap is ooreengekom dat beide partye hulle daarvan sal weerhou om verdere uitsprake in die media oor dié kwessie te maak. “Die minister het verkies om die publiek deur weglating te mislei, deurdat sy nie verduidelik het wat die wet bepaal nie, maar eerder fokus op algemene regsterme.” Kandjii-Murangi se uitsprake in die media dui egter duidelik daarop dat die status quo bly, volgens die vakbondleier Dit ondermyn vertroue in die owerhede en belemmer persepsies oor openbare administrasie, sê hy. – augetto@republikein.com.na

NTA-raad bly onveranderd

Kommentaar

Republikein 2025-11-04

Meld asseblief aan om kommentaar te lewer

NTA-raad bly onveranderd

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.